നവകേരള ബസ് ഇനി മുതൽ ഗരുഡ പ്രീമിയം: ഞായറാഴ്ച മുതൽ സർവീസ് തുടങ്ങും

ഒരു സമയത്ത് ചർച്ചകളിൽ സജീവമായി ഉണ്ടായിരുന്ന ഒന്നാണ് നവ കേരള ബസ്. നവ കേരള സദസ്സിന്റെ ഭാ​ഗമായി മുഖ്യമന്ത്രിയും മന്ത്രിമാരും സഞ്ചരിച്ചത് നവ കേരള ബസ്സിലായിരുന്നു. മേയ് അഞ്ച് മുതൽ നവ കേരള ബസ്സ് സർവീസ് ആരംഭിക്കുകയാണ്. മികച്ച സൗകര്യങ്ങളോടെയാണ് ​ഗരുഡ പ്രീമിയം എന്ന പേരിലുള്ള നവ കേരള ബസ്സിൽ ഒരിക്കിയിരിക്കുന്നത്. കെ എസ് ആർ ടി സിയുടെ അന്തർ സർവീസായാണ് നവ കേരള ബസ് സർവീസ് നടത്തുന്നത്.‌കോഴിക്കോട് - ബെം​ഗളൂരു റൂട്ടിലാണ് സർവീസ്. 1171 രൂപയാണ് ടിക്കറ്റ് നിരക്ക്. കൂടാതെ എ സി ബസ്സുകൾക്കുള്ള അഞ്ച് ശതമാനം ലക്ഷ്വറി ടാക്സും നൽകണം, രാവിലെ 4 മണിക്ക് കോഴിക്കോട്ട് നിന്ന് യാത്ര തിരിക്കുന്ന ബസ് കല്പറ്റ, ബത്തേരി, ​ഗുണ്ടൽപ്പേട്ട്, മൈസൂർ, മാണ്ഡ്യ വഴി 11. 35 ന് ബെം​ഗളൂരുവിൽ എത്തിച്ചേരും. ഉച്ചയ്ക്ക് 2. 30 ന് ബെം​​ഗളൂരുവിൽ നിന്ന് തിരിച്ച് ഇതേ റൂട്ടിലൂടെ രാത്രി 10. 5 ന് കോഴിക്കോട് എത്തും. കോഴിക്കോട്, കല്പറ്റ, ബത്തേരി, മൈസൂരു, ബെം​ഗളൂരു ( സാറ്റ്ലെറ്റ്, ശാന്തിനഗർ ) എന്നിവയാണ് സ്റ്റോപ്പുകൾ.