അത്തരത്തില്‍ ഒരു കഥയാണ് ഇന്നു പറയുന്നത്. ഈ കഥയ്ക്ക് അധികം ദൂരം ഒന്നുമില്ല. നമ്മുടെ ഇന്ത്യയില്‍ നിന്ന് തന്നെയാണ് ലോകത്തെ അതിസമ്പന്നനായ ഭിക്ഷക്കാരന്റെ കഥ ഉയരുന്നത്. മുംബൈ സ്വദേശിയായ ഭരത് ജെയിന് ആണ് നിലവില്‍ ലോകത്തെ ഏറ്റവും ധനികനായ ഭിക്ഷാടകന്‍ എന്നു റിപ്പോര്‍ട്ടുകള്‍ വ്യക്തമാക്കുന്നു. ഈ ഭിക്ഷക്കാരന്‍ നിങ്ങളുടെ മനസിലെ പരമ്പരാഗത സങ്കല്‍പ്പങ്ങള്‍ ഉടച്ചുവാര്‍ക്കുമെന്നതില്‍ ഒരു തര്‍ക്കവുമില്ല.
വളരെ കഷ്ടതകള്‍ നിറഞ്ഞ കുട്ടിക്കാലമായിരുന്നു ജെയിന് ഉണ്ടായിരുന്നത്. സാമ്പത്തിക ബുദ്ധിമുട്ടുകള്‍ കാരണം പഠിക്കാന്‍ പോലും സാധിച്ചില്ല. വെല്ലുവിളികള്‍ക്കിടയിലും അദ്ദേഹം ജീവിതം തള്ളിനീക്കി. ഇതിനിടെ വിവാഹം കഴിക്കുകയും, രണ്ടു ആണ്‍കുട്ടികള്‍ക്കു ജനനം നല്‍കുകയും ചെയ്തു. തന്റെ കഷ്ടതകള്‍ കുട്ടികള്‍ അറിയാതിരിക്കാന്‍ അദ്ദേഹം പരിശ്രമിച്ചു. കുട്ടികള്‍ക്കു മികച്ച വിദ്യാഭ്യാസം നല്‍കണമെന്ന വാശിയായിരുന്നു അദ്ദേഹത്തിന്.
ഇന്ന് ഇദ്ദേഹത്തിന്റെ ആസ്തി ഏകദേശം 7.5 കോടി രൂപ വരുമെന്നാണ് റിപ്പോര്‍ട്ടുകള്‍ വ്യക്തമാക്കുന്നത്. മാസം 60,000- 75,000 രൂപ സമ്പാദിക്കുന്നു ഈ ഭിക്ഷക്കാരന്‍ എന്നതാണ് സത്യം. ഇന്ത്യയിലെ മികച്ച പ്രൊഫഷണലുകള്‍ക്കു പോലും ഈ ശമ്പളം ഇല്ലെന്നതാണ് യാഥാര്‍ത്ഥ്യം. ഭിക്ഷാടനത്തില്‍ നിന്നുള്ള സമ്പാദ്യത്തിന് പുറമേ, മികച്ച നിക്ഷേപങ്ങള്‍ നടത്തിയതാണ് ജെയിനിന്റെ ആസ്തി വര്‍ധിക്കാനുള്ള കാരണം.
മുംബൈയില്‍ 1.4 കോടി രൂപ വിലമതിക്കുന്ന രണ്ട് ഫ്ളാറ്റുകള്‍ ഇയാള്‍ സ്വന്തമാക്കി. താനെയിലെ മികച്ച ലൊക്കേഷനുകളില്‍ രണ്ട് കടകളില്‍ നിക്ഷേപിച്ചിട്ടുണ്ട്. ഈ കടകളില്‍ നിന്നു മാത്രം പ്രതിമാസം 30,000 രൂപ വാടക വരുമാനം നേടുന്നു. അതായത്, ഭിക്ഷാടനത്തില്‍ നിന്നുള്ള വരുമാനത്തിനു പുറമേ സ്ഥിരമായ വാടക വരുമാനവും ജെയിനിനുണ്ട്.
കാര്യങ്ങള്‍ ഇങ്ങനെയൊക്കെ ആണെങ്കിലും ആള്‍ ഇന്നും ഭിക്ഷാടനം തുടരുന്നു. മുംബൈ യാത്രയില്‍ ഒരുപക്ഷെ നിങ്ങള്‍ക്കു മുന്നിലും ജെയിന് ഭിക്ഷക്കാരന്‍ ആയി എത്തിയിട്ടുണ്ടാകാം. മുംബൈയിലെ ഛത്രപതി ശിവജി ടെര്‍മിനസ്, ആസാദ് മൈതാനം തുടങ്ങിയ സ്ഥലങ്ങളിലാണ് ജെയിന് പതിവായി ഭിക്ഷ യാചിക്കുന്നത്. മുബൈ പരേല്‍ പ്രദേശത്താണ് അദ്ദേഹം താമസിക്കുന്നത്.
ജെയിനിന്റെ കുട്ടികള്‍ ഇന്ന് ഒരു കോണ്‍വെന്റ് സ്‌കൂളില്‍ പഠിക്കുന്നു. കുടുംബാംഗങ്ങള്‍ ഒരു സ്റ്റേഷണറി സ്റ്റോര്‍ നടത്തുന്നു. ഇത് കുടുംബത്തിന് മറ്റൊരു വരുമാന മാര്‍ഗം നല്‍കുന്നു. പലരും പുച്ചിച്ചു തള്ളുന്ന ഒരു ആശയം വഴി പലര്‍ക്കും സ്വപ്‌നം കാണാന്‍ പോലും പറ്റാത്ത ഉയരങ്ങളാണ് ജെയിന് കീഴടക്കുന്നത്. ഏതൊരു തൊഴിലിനും അതിന്റേതായ അന്തസ് ഉണ്ടെന്ന് ജെയിന് ഒരിക്കല്‍ കൂടി തെളിയിക്കുന്നു.
നിങ്ങളും ഭിക്ഷ യാചിക്കണം എന്നല്ല പറഞ്ഞുവരുന്നത്. പക്ഷെ നാളെ നിങ്ങളുടെ മുന്നില്‍ ഭിക്ഷ യാചിച്ചു വരുന്ന പലരും ഒരുപക്ഷെ നിങ്ങളേക്കാന്‍ ഉയര്‍ന്ന ജീവിതം നയിക്കുന്നവര്‍ ആകാം എന്ന ഓര്‍മ്മപ്പെടുത്തല്‍ മാത്രമാണ്. നിരാശാജനകമെന്ന് തോന്നുന്ന ഒരു സാഹചര്യത്തെ ഒരാള്‍ക്ക് എങ്ങനെ ലാഭകരമായ ഒന്നാക്കി മാറ്റാം എന്നതിന്റെ ശ്രദ്ധേയമായ ഉദാഹരണങ്ങളില്‍ ഒന്നാണ് ജെയിനിന്റെ ജീവിതം.
0 Comments