ഇറാഖ് സമുദ്രാതിർത്തിയിൽ അമേരിക്കൻ കപ്പലിന് നേരെ ഇറാൻ്റെ ചാവേർ ആക്രമണം; ഇന്ത്യക്കാരൻ കൊല്ലപ്പെട്ടതായി സൂചന

ഇറാഖ് സമുദ്രാതിർത്തിയിൽ അമേരിക്കൻ ഉടമസ്ഥതയിലുള്ള ടാങ്കർ കപ്പലിന് നേരെയുണ്ടായ ഇറാനിയൻ ചാവേർ ബോട്ട് ആക്രമണത്തിൽ ഇന്ത്യക്കാരൻ കൊല്ലപ്പെട്ടു. അമേരിക്കൻ കമ്പനിയുടെ കീഴിലുള്ള ‘സേഫ്‌സീ വിഷ്ണു’ എന്ന കപ്പലിന് നേരെയാണ് ആക്രമണമുണ്ടായത്. കൊല്ലപ്പെട്ട വ്യക്തിയെക്കുറിച്ചുള്ള കൂടുതൽ വിവരങ്ങൾ അധികൃതർ പുറത്തുവിട്ടിട്ടില്ലെങ്കിലും ഇയാൾ ഒരു മലയാളി ആണെന്നാണ് പ്രാഥമിക സൂചനകൾ.

തെക്കൻ ഇറാഖിലെ ഖോർ അൽ സുബൈർ തുറമുഖത്തിന് സമീപമാണ് സംഭവം. മാർഷൽ ദ്വീപുകളുടെ പതാക ഘടിപ്പിച്ച് സർവീസ് നടത്തിയിരുന്ന കപ്പലിന് നേരെ ആളില്ലാ ചാവേർ ബോട്ട് ഇടിച്ചു കയറുകയായിരുന്നുവെന്ന് ഇറാഖ് തുറമുഖ അധികൃതർ വ്യക്തമാക്കി. കപ്പലിലുണ്ടായിരുന്ന മറ്റ് 27 ജീവനക്കാരെയും സുരക്ഷിതമായി ബസ്രയിലേക്ക് മാറ്റിയിട്ടുണ്ട്.

Also Read: പിസ്റ്റളുമായി ലക്ഷ്യം പിഴയ്ക്കാതെ കിം ജുഎ ഒപ്പം ഉന്നംപിടിച്ച് കിം ജോങ് ഉന്നും ! ഉത്തരകൊറിയയിൽ എന്താണ് നടക്കുന്നത്?

ഹോർമുസ് കടലിടുക്കിലൂടെയുള്ള അന്താരാഷ്ട്ര ചരക്കുനീക്കം തടസ്സപ്പെടുത്താനുള്ള ഇറാൻ്റെ നീക്കങ്ങളുടെ ഭാഗമായാണ് ഈ ആക്രമണമെന്നാണ് വിലയിരുത്തപ്പെടുന്നത്. പേർഷ്യൻ ഗൾഫിൽ ഇതിനോടകം തന്നെ അന്തർവാഹിനി ഡ്രോണുകൾ ഉപയോഗിച്ച് രണ്ട് കപ്പലുകൾ ഇറാൻ തകർത്തിരുന്നു. 2007-ൽ നിർമ്മിച്ച സേഫ്‌സീ വിഷ്ണുവിന് 228.6 മീറ്റർ നീളവും 32.57 മീറ്റർ വീതിയുമുണ്ട്. സംഭവത്തെത്തുടർന്ന് മേഖലയിൽ കനത്ത സുരക്ഷാ ജാഗ്രത പ്രഖ്യാപിച്ചിരിക്കുകയാണ്.

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)

The post ഇറാഖ് സമുദ്രാതിർത്തിയിൽ അമേരിക്കൻ കപ്പലിന് നേരെ ഇറാൻ്റെ ചാവേർ ആക്രമണം; ഇന്ത്യക്കാരൻ കൊല്ലപ്പെട്ടതായി സൂചന appeared first on Express Kerala.