നാം നിത്യവും ഉപയോഗിക്കുന്ന ബ്ലൂടൂത്ത് ഇയർബഡുകളും ഹെഡ്ഫോണുകളും ഹാക്ക് ചെയ്യപ്പെടാൻ സാധ്യതയുണ്ടെന്ന് ഗവേഷകർ മുന്നറിയിപ്പ് നൽകുന്നു. ബെൽജിയത്തിലെ കെ.യു ലുവെൻ സർവകലാശാലയിലെ ഗവേഷകരാണ് പുതിയ സുരക്ഷാ പിഴവ് കണ്ടെത്തിയത്. കൃത്യമായി അപ്ഡേറ്റ് ചെയ്യാത്ത ഓഡിയോ ഗാഡ്ജെറ്റുകൾ വഴി ഉപയോക്താക്കളെ ട്രാക്ക് ചെയ്യാനും അവരുടെ സംഭാഷണങ്ങൾ രഹസ്യമായി കേൾക്കാനും ഹാക്കർമാർക്ക് സാധിക്കുമെന്നാണ് പഠനം വ്യക്തമാക്കുന്നത്.
ഗൂഗിളിന്റെ ‘ഫാസ്റ്റ് പെയർ’ ഫീച്ചറുമായി ബന്ധപ്പെട്ട സുരക്ഷാ പിഴവാണ് ഹാക്കർമാർ ചൂഷണം ചെയ്യുന്നത്. ‘വിസ്പർ പെയർ’ എന്ന് വിളിക്കപ്പെടുന്ന ഈ ആക്രമണത്തിലൂടെ, സമീപത്തുള്ള ഹാക്കർക്ക് നിങ്ങളുടെ അനുവാദമില്ലാതെ തന്നെ ഇയർബഡുകളിലേക്ക് കണക്ട് ചെയ്യാനാകും. ഇതുവഴി ഫോൺ കോളുകൾ വിച്ഛേദിക്കാനോ, അനാവശ്യ ശബ്ദങ്ങൾ കേൾപ്പിക്കാനോ, ഗൂഗിളിന്റെ “ഫൈൻഡ് മൈ ഡിവൈസ്” സൗകര്യം ഉപയോഗിച്ച് നിങ്ങളുടെ ലൊക്കേഷൻ കണ്ടെത്താനോ ഹാക്കർമാർക്ക് കഴിയും.
Also Read: ചിരി മനോഹരമാക്കാൻ മുത്തശ്ശി വിദ്യ; ഹോളിവുഡ് കീഴടക്കി ഓയിൽ പുള്ളിംഗ് ട്രെൻഡ്
ഏതെങ്കിലും ഒരു പ്രത്യേക ബ്രാൻഡിനെ മാത്രമല്ല ഈ പ്രശ്നം ബാധിക്കുന്നത് എന്നതാണ് ഗൗരവകരമായ വസ്തുത. സോണി, ജെ.ബി.എൽ , വൺപ്ലസ്, ഷവോമി, ലോജിടെക്, നത്തിംഗ്, സൗണ്ട്കോർ തുടങ്ങി വിപണിയിലെ പ്രമുഖ കമ്പനികളുടെയെല്ലാം ഓഡിയോ ഉപകരണങ്ങളിൽ ഈ പിഴവ് കണ്ടെത്തിയിട്ടുണ്ട്. അതിനാൽ, ഇത്തരം ഉപകരണങ്ങൾ ഉപയോഗിക്കുന്നവർ അതത് കമ്പനികൾ പുറത്തിറക്കുന്ന സെക്യൂരിറ്റി അപ്ഡേറ്റുകൾ കൃത്യസമയത്ത് ഇൻസ്റ്റാൾ ചെയ്യാൻ ശ്രദ്ധിക്കണമെന്ന് ഗവേഷകർ നിർദ്ദേശിക്കുന്നു.
The post സംഗീതം കേൾക്കുമ്പോൾ ശ്രദ്ധിക്കുക; നിങ്ങളുടെ ഇയർബഡുകളും ഹാക്ക് ചെയ്യപ്പെട്ടേക്കാം! appeared first on Express Kerala.