നേപ്പാളിലെ മഹാപ്രളയം; മരണസംഖ്യ 1000 കടന്നു, നാലായിരത്തോളം പേർ ഇപ്പോഴും കാണാമറയത്ത്; രക്ഷാപ്രവർത്തനം തുടരുന്നു | Nepal flash flood

കാഠ്മണ്ഡു: നേപ്പാൾ–ചൈന അതിർത്തി മേഖലയിലുണ്ടായ രൂക്ഷമായ മിന്നൽപ്രളയത്തിൽ മരണസംഖ്യ 1,003 ആയി ഉയർന്നതായി റിപ്പോർട്ട് (Nepal flash flood). 583 വിദേശികൾ ഉൾപ്പെടെ ഏകദേശം 4,000 പേരെ ഇനിയും കണ്ടെത്താനായിട്ടില്ല. നിരവധി സുരക്ഷാ ഉദ്യോഗസ്ഥരും കാണാതായവരിൽ ഉൾപ്പെടുന്നതായാണ് വിവരം. കാണാതായവർക്കായുള്ള വ്യാപക തിരച്ചിലും രക്ഷാപ്രവർത്തനവും തുടരുകയാണ്.

ദുരന്തബാധിത മേഖലകളിൽ രക്ഷാപ്രവർത്തനത്തിനായി 21,300-ലധികം സുരക്ഷാ ഉദ്യോഗസ്ഥരെയും ഹെലികോപ്റ്ററുകളെയും വിന്യസിച്ചിട്ടുണ്ട്. എട്ട് ജില്ലകളിൽനിന്നായി കൂടുതൽ മൃതദേഹങ്ങൾ കണ്ടെത്തിയതോടെയാണ് മരണസംഖ്യ ഉയർന്നത്. ഇതുവരെ 12,000-ത്തോളം പേരെ സുരക്ഷിതമായി രക്ഷപ്പെടുത്തിയതായി ദേശീയ ദുരന്തനിവാരണ അതോറിറ്റി അറിയിച്ചു.

കിഴക്കൻ, മധ്യ, പടിഞ്ഞാറൻ നേപ്പാളിലെ നിരവധി നദികളിൽ ജലനിരപ്പ് ഉയരുന്നതായും മഴ തുടരാനുള്ള സാധ്യത കണക്കിലെടുത്ത് പുതിയ മുന്നറിയിപ്പുകൾ നൽകുന്നതായും അധികൃതർ അറിയിച്ചു. പ്രളയത്തിൽ ഒറ്റപ്പെട്ടുപോയവരെ കണ്ടെത്താനുള്ള ശ്രമം ശക്തമായി തുടരുകയാണ്.

അതേസമയം, മിന്നൽപ്രളയത്തെ തുടർന്ന് നേപ്പാളിൽ കുടുങ്ങിയ ആറു മലയാളി വംശജരുമായി ഇതുവരെ ആശയവിനിമയം സ്ഥാപിക്കാനായിട്ടില്ല. ഓസ്ട്രേലിയൻ പൗരത്വമുള്ള നാലുപേരും ബ്രിട്ടീഷ് പൗരത്വമുള്ള ഒരാളും അമേരിക്കൻ പൗരത്വമുള്ള കൃഷ്ണകുമാർ രാഘവൻ (59) എന്നിവരുമായാണ് ബന്ധപ്പെടാൻ സാധിക്കാത്തത്. ഇവരുടെ ബന്ധുക്കളാണ് നോർക്ക ഹെൽപ്പ് ഡെസ്കിൽ വിവരങ്ങൾ രജിസ്റ്റർ ചെയ്തിരിക്കുന്നത്.

ഓഗസ്റ്റ് 26ന് നേപ്പാൾ–ടിബറ്റ് അതിർത്തിക്ക് സമീപമുണ്ടായ ശക്തമായ മഴയും ഹിമാലയൻ മേഖലയിലെ കാലാവസ്ഥാ വ്യതിയാനങ്ങളും തുടർന്നാണ് വടക്കൻ, മധ്യ നേപ്പാളിലെ നിരവധി പ്രദേശങ്ങളിൽ വൻ നാശനഷ്ടമുണ്ടായത്. ഹിമാലയൻ അതിർത്തി മേഖലയിൽനിന്ന് തെക്കോട്ട് ഒഴുകുന്ന ഭോട്ടെകോശി നദിയിൽ ജലനിരപ്പ് അപകടകരമായി ഉയർന്നു.

പ്രളയത്തിൽ വീടുകൾ, വാഹനങ്ങൾ, റോഡുകൾ, പാലങ്ങൾ ഉൾപ്പെടെയുള്ള അടിസ്ഥാന സൗകര്യങ്ങൾ വ്യാപകമായി തകർന്നു. ചില ജലവൈദ്യുത പദ്ധതികൾക്കും കേടുപാടുകൾ സംഭവിച്ചിട്ടുണ്ട്.

ചിത്വാൻ ജില്ലയിലാണ് ഏറ്റവും കൂടുതൽ മരണങ്ങൾ റിപ്പോർട്ട് ചെയ്തിരിക്കുന്നത്. ഇവിടെ 321 പേർ മരിച്ചതായാണ് കണക്ക്. നവാൽപരസി കിഴക്കിൽ 216 പേരും നവാൽപരസി പടിഞ്ഞാറിൽ 170 പേരും നുവാക്കോട്ടിൽ 95 പേരും ഗൂർഖയിൽ 65 പേരും ദുരന്തത്തിൽ മരിച്ചതായി റിപ്പോർട്ടുണ്ട്.

ദുരന്തത്തിന്റെ ആഘാതം അതിർത്തിക്കപ്പുറത്തേക്കും വ്യാപിച്ചിട്ടുണ്ട്. ചൈനയിൽ 16 മരണങ്ങൾ റിപ്പോർട്ട് ചെയ്തതായും ടിബറ്റ് മേഖലയിൽ ഏകദേശം 550 പേരെ കാണാതായതായും ചൈനീസ് മാധ്യമങ്ങൾ റിപ്പോർട്ട് ചെയ്തു.

Story Summary: The death toll from the devastating flash floods near the Nepal–China border has reportedly risen to 1,003, while around 4,000 people remain unaccounted for. Rescue operations are continuing, and authorities are also trying to establish contact with six people of Kerala origin who remain unreachable.