ട്രംപ്–പുടിൻ–ഷി ഒരുമിച്ച് ഒരു വേദിയിൽ? നവംബറിൽ ലോകം ഉറ്റുനോക്കുന്ന കൂടിക്കാഴ്ചയ്ക്ക് റഷ്യയുടെ സൂചന..!

ലോകത്തിലെ മൂന്ന് വൻശക്തികളുടെ തലവന്മാർ ഒരുമിച്ചെത്തുമോ? അമേരിക്കൻ പ്രസിഡന്റ് ഡൊണാൾഡ് ട്രംപ്, റഷ്യൻ പ്രസിഡന്റ് വ്ളാദിമിർ പുടിൻ, ചൈനീസ് പ്രസിഡന്റ് ഷി ജിൻപിങ് എന്നിവർ നവംബറിൽ ചൈനയിൽ നടക്കുന്ന ഏഷ്യ–പസഫിക് സാമ്പത്തിക സഹകരണ ഉച്ചകോടിക്കിടെ കൂടിക്കാഴ്ച നടത്താനുള്ള സാധ്യതയുണ്ടെന്ന് സൂചന നൽകി റഷ്യ. അപൂർവമായ ത്രികക്ഷി കൂടിക്കാഴ്ചയുടെ സാധ്യത പുടിനും ഷിയും തമ്മിലുള്ള ചർച്ചയിൽ ഉയർന്നതായി ക്രെംലിൻ സഹായി യൂറി ഉഷാക്കോവ് പറഞ്ഞു. നവംബർ 18, 19 തീയതികളിലാണ് ഷെൻഷെനിൽ എ.പി.ഇ.സി. ഉച്ചകോടി നടക്കുന്നത്.

ട്രംപ് ഉച്ചകോടിയിൽ പങ്കെടുക്കുമെന്ന് ഷി ജിൻപിങ് അറിയിച്ചതായും, ക്ഷണിതാവായി പുടിനും പങ്കെടുക്കാൻ സാധ്യതയുണ്ടെന്നും ഉഷാക്കോവ് പറഞ്ഞു. കാര്യങ്ങൾ ആസൂത്രണം ചെയ്തതുപോലെ മുന്നോട്ടുപോയാൽ മൂന്ന് നേതാക്കളുടെയും കൂടിക്കാഴ്ച സംഘടിപ്പിക്കാനാകുമെന്നാണ് റഷ്യയുടെ നിലപാട്. അല്ലെങ്കിൽ മൂന്ന് നേതാക്കളും ഒരേ വേദിയിൽ എത്തുന്ന കൂടിക്കാഴ്ചയെങ്കിലും നടക്കുമെന്ന് ഉഷാക്കോവ് വ്യക്തമാക്കി. എന്നാൽ ട്രംപിന്റെ എ.പി.ഇ.സി. പങ്കാളിത്തം സംബന്ധിച്ച് വാഷിങ്ടൺ ഇതുവരെ ഔദ്യോഗിക സ്ഥിരീകരണം നൽകിയിട്ടില്ല.

ALSO READ;മനുഷ്യൻ ആവണമെങ്കിൽ മനുഷ്യത്വം വേണം..! അമേരിക്കയുടെ മിസൈലാക്രമണം; കുഞ്ഞുൾപ്പെടെ നാലുപേർ കൊല്ലപ്പെട്ടു

യുക്രൈൻ യുദ്ധവും ചർച്ചകളുടെ ഭാഗമാകുമോ?

റഷ്യ, ചൈന, അമേരിക്ക. എന്നിവയുൾപ്പെടെ 21 സമ്പദ്‌വ്യവസ്ഥകളാണ് എ.പി.ഇ.സി.യിൽ അംഗങ്ങൾ. യുക്രൈൻ യുദ്ധത്തിലും ആഗോള സുരക്ഷാ വിഷയങ്ങളിലും മോസ്കോ, ബെയ്ജിങ്, വാഷിങ്ടൺ എന്നിവരുടെ നിലപാടുകൾ ലോകം ഉറ്റുനോക്കുന്ന സാഹചര്യത്തിലാണ് ഈ കൂടിക്കാഴ്ചയുടെ സാധ്യത ഉയരുന്നത്. യുക്രൈൻ സംഘർഷവുമായി ബന്ധപ്പെട്ട മാനുഷിക വിഷയങ്ങൾ ചർച്ച ചെയ്യുന്നതിനായി സെപ്റ്റംബർ അവസാനം ബൊളോണ്യ ആർച്ച്‌ബിഷപ്പും കർദിനാളുമായ മറ്റേയോ മരിയ സുപ്പിയുമായി കൂടിക്കാഴ്ച നടത്തുമെന്നും ഉഷാക്കോവ് അറിയിച്ചു.

യുക്രൈൻ സംഘർഷവുമായി ബന്ധപ്പെട്ട മാനുഷിക വിഷയങ്ങളാണ് പ്രധാന ചർച്ചയെങ്കിലും രാഷ്ട്രീയ വശങ്ങളും ചർച്ചയിൽ വരുമെന്ന് ഉഷാക്കോവ് പറഞ്ഞു. പുടിൻ–ഷി കൂടിക്കാഴ്ചയിൽ ഉയർന്ന ഈ പുതിയ സാധ്യത യാഥാർഥ്യമാകുമോ എന്നതാണ് ഇനി ശ്രദ്ധേയം. മൂന്ന് രാജ്യങ്ങളുടെയും നേതാക്കൾ ഒരേ വേദിയിൽ എത്തിയാൽ, യുക്രൈൻ യുദ്ധം മുതൽ ആഗോള സുരക്ഷ വരെ നിരവധി വിഷയങ്ങളിൽ അതിന് വലിയ പ്രാധാന്യമുണ്ടാകുമെന്നാണ് വിലയിരുത്തൽ.

The post ട്രംപ്–പുടിൻ–ഷി ഒരുമിച്ച് ഒരു വേദിയിൽ? നവംബറിൽ ലോകം ഉറ്റുനോക്കുന്ന കൂടിക്കാഴ്ചയ്ക്ക് റഷ്യയുടെ സൂചന..! appeared first on Express Kerala.