ഓണത്തിന് ശേഷവും എസി വിപണിയിൽ റെക്കോർഡ് വിൽപ്പന. സെപ്റ്റംബർ മാസത്തിലും സംസ്ഥാനത്ത് കടുത്ത ചൂട് അനുഭവപ്പെടുന്നതാണ് എ.സി വിപണിയെ സജീവമായി നിർത്തുന്നത്. മുൻ വർഷങ്ങളെ അപേക്ഷിച്ച് എസി വിൽപ്പനയിൽ ഈ വർഷം റെക്കോർഡ് വർധനവാണ് രേഖപ്പെടുത്തിയതെന്ന് വ്യാപാരികൾ. വൈദ്യുതി ഉപയോഗം കുറയ്ക്കുന്ന 3-സ്റ്റാർ, 5-സ്റ്റാർ ഇൻവെർട്ടർ എസികൾക്കാണ് ഉപഭോക്താക്കൾക്കിടയിൽ ഏറ്റവും കൂടുതൽ ആവശ്യക്കാരുള്ളത്
Current: മലയാളം
കോട്ടയം: ഓണക്കാലത്ത് ഉയർന്ന എയർ കണ്ടീഷണർ (എസി) വിൽപ്പന, ഉത്സവ സീസൺ കഴിഞ്ഞിട്ടും കുറവില്ലാതെ തുടരുന്നു.
സെപ്റ്റംബർ മാസത്തിലും സംസ്ഥാനത്ത് കടുത്ത ചൂടും ഉയർന്ന ഈർപ്പവും അനുഭവപ്പെടുന്നതാണ് എസി വിപണിയെ സജീവമായി നിർത്തുന്നത്.
മുൻ വർഷങ്ങളെ അപേക്ഷിച്ച് എസി വിൽപ്പനയിൽ ഈ വർഷം റെക്കോർഡ് വർധനവാണ് രേഖപ്പെടുത്തിയതെന്ന് വ്യാപാരികൾ വ്യക്തമാക്കുന്നു.
കടുത്ത ചൂട് കാരണം ഫെബ്രുവരി മുതൽ ഏപ്രിൽ മാസം വരെ മികച്ച കച്ചവടം നടന്നിരുന്നു. കാലവർഷം എത്തിയതോടെ വില്പന കുറയും എന്നാണ് കരുതിയിരുന്നത് എങ്കിലും മഴ കുറഞ്ഞത് വിൽപ്പന വർധിക്കാൻ കാരണമായി എന്നും വ്യാപാരികൾ പറയുന്നു.
കഴിഞ്ഞ വർഷത്തെ ഓണം-മഴക്കാല സീസണുകളെ അപേക്ഷിച്ച് 30% മുതൽ 40% വരെ വിൽപ്പന വർധനവാണ് ഇത്തവണ വ്യാപാര സ്ഥാപനങ്ങളിൽ ഉണ്ടായിരിക്കുന്നത്.
വൈദ്യുതി ഉപയോഗം കുറയ്ക്കുന്ന 3-സ്റ്റാർ, 5-സ്റ്റാർ ഇൻവെർട്ടർ എസികൾക്കാണ് ഉപഭോക്താക്കൾക്കിടയിൽ ഏറ്റവും കൂടുതൽ ആവശ്യക്കാരുള്ളത്.
ഓണത്തോടനുബന്ധിച്ച് നൽകിയ സീറോ-ഡൗൺപേയ്‌മെൻ്റ്, കുറഞ്ഞ പലിശ നിരക്കിലുള്ള ഇ.എം.ഐ സ്കീമുകൾ ഇപ്പോഴും തുടരുന്നത് സാധാരണക്കാരായ ഉപഭോക്താക്കളെ എസി വാങ്ങാൻ പ്രേരിപ്പിക്കുന്നുണ്ട്. വരും ആഴ്ചകളിലും ഈ ഡിമാൻഡ് തുടരുമെന്നാണ് വ്യാപാരികളുടെ പ്രതീക്ഷ.
അതേസമയം, വിൽപ്പന ഉയർന്നതോടെ പുതിയ എസികളുടെ ഇൻസ്റ്റാളേഷനും സർവീസിംഗിനുമായി ടെക്നീഷ്യൻമാരെ കിട്ടാത്ത അവസ്ഥയുമുണ്ട്.
