കനത്ത മഴയിൽ വിറങ്ങലിച്ച് പടിഞ്ഞാറൻ സിക്കിം. വൻ പാറക്കല്ലുകളുമായി റിമ്പി ഗ്രാമത്തിലേക്ക് മലയിടിഞ്ഞു. നിരവധി വീടുകൾ തകർന്നു. ഖേചുപെരി പാത പൂർണ്ണമായി തകർന്ന് ഗതാഗതം സ്തംഭിച്ചു. ഡാർജിലിങ്ങിലും വിള്ളലുകൾ. രക്ഷാപ്രവർത്തനം ദുഷ്‌കരം. ജനങ്ങൾക്ക് അതീവ ജാഗ്രതാ നിർദ്ദേശം
Current: മലയാളം
ഗ്യാംഗ്‌ടോക്ക്: തോരാതെ പെയ്യുന്ന കനത്ത മഴയിൽ പടിഞ്ഞാറൻ സിക്കിമിൽ വൻ മലയിടിച്ചിൽ. റിമ്പി ഗ്രാമത്തിൽ വൻ പാറക്കല്ലുകളും മണ്ണും അവശിഷ്ടങ്ങളും ഒലിച്ചിറങ്ങി വീടുകൾക്ക് കനത്ത നാശനഷ്ടം സംഭവിച്ചു. പ്രദേശം ഇതോടെ ഭീതിയുടെ മുൾമുനയിലാണ്.
യുക്സോം-താഷിഡിംഗ് മണ്ഡലത്തിൽ റിമ്പിയെയും വിനോദസഞ്ചാര കേന്ദ്രമായ ഖേചുപെരിയെയും ബന്ധിപ്പിക്കുന്ന പ്രധാന റോഡിലേക്ക് മലയിടിഞ്ഞു വീണതോടെ പാത പൂർണ്ണമായും തകർന്നു.
മേഖലയിൽ വാഹന ഗതാഗതം പൂർണ്ണമായി നിലച്ചിരിക്കുകയാണ്. പ്രദേശം അതീവ ദുർബലമായി തുടരുന്നതും മലനിരകളിലെ വിള്ളലുകളും നാട്ടുകാരിൽ കടുത്ത ആശങ്ക സൃഷ്ടിക്കുന്നു.
സിക്കിമിന് പുറമെ സമീപപ്രദേശമായ ഡാർജിലിംഗ് മലനിരകളിലും പലയിടങ്ങളിലായി വ്യാപകമായ മണ്ണിടിച്ചിൽ റിപ്പോർട്ട് ചെയ്തിട്ടുണ്ട്. മേഖലയിൽ പേമാരി ഇപ്പോഴും തുടരുകയാണ്.
ഇനിയും മണ്ണിടിച്ചിലിനും മലവെള്ളപ്പാച്ചിലിനും സാധ്യതയുള്ളതിനാൽ നദീതീരങ്ങളിലും മലയോരങ്ങളിലുമുള്ള താമസക്കാർക്ക് ഭരണകൂടം ജാഗ്രതാ നിർദ്ദേശം നൽകി.
പ്രതികൂല കാലാവസ്ഥയും അസ്ഥിരമായ ഭൂപ്രകൃതിയും തകർന്നടിഞ്ഞ റോഡുകളും കാരണം ദുരന്തമേഖലയിലേക്കുള്ള രക്ഷാപ്രവർത്തനങ്ങൾ കനത്ത വെല്ലുവിളി നേരിടുകയാണ്.
