തിരുവനന്തപുരത്ത് വിനോദ സഞ്ചാരികൾ സഞ്ചരിച്ച കാർ സ്‌കൂട്ടറിൽ ഇടിച്ച് അപകടം. സ്‌കൂട്ടർ യാത്രക്കാരൻ മരിച്ചു

തിരുവനന്തപുരം: തിരുവനന്തപുരം വിതുരയിൽ വിനോദ സഞ്ചാരികൾ സഞ്ചരിച്ച കാർ സ്‌കൂട്ടറിൽ ഇടിച്ച് സ്‌കൂട്ടർ യാത്രക്കാരൻ മരിച്ചു. പാലോട് കരിമൻകോട് സ്വദേശി ഷൈജു (40) ആണ് മരിച്ചത്. 

ഒപ്പം സഞ്ചരിച്ച മകൻ വസുദേവ് (12), മകൾ വാസുകി (6) എന്നിവരെ സ്വകാര്യ ആശുപത്രിയിൽ പ്രവേശിപ്പിച്ചു. സ്‌കൂട്ടർ യാത്രക്കാർ വിതുരയിലേക്ക് വരുകയായിരുന്നു. കാർ യാത്രക്കാർ പൊൻമുടി വിനോദ സഞ്ചാരത്തിന് ശേഷം നെടുമങ്ങാട് ഭാഗത്തേക്ക് പോകുകയായിരുന്നു. 

കാർ തെറ്റായ ദിശയിൽ ഓടിച്ച് കയറ്റിയതാണ് അപകടത്തിന് കാരണം. നെടുമങ്ങാട് സ്വദേശികളായ മൂന്ന് പേരാണ് കാറിൽ സഞ്ചരിച്ചത്. മൂന്ന് പേരെയും വിതുര പൊലീസ് കസ്റ്റഡിയിലെടുത്തു. ചെന്നിത്തലയുടെ പേഴ്സണൽ സ്റ്റാഫ് അംഗം ഹബീബ് ഖാൻ്റെ ഡ്രൈവർ ആണ് മരിച്ച ഷൈജു.