ലൈംഗികാതിക്രമ കേസ്; തെഹൽക്ക മുൻ എഡിറ്റർ തരുൺ തേജ്പാൽ ഗോവ കോടതിയിൽ കീഴടങ്ങി | Tarun Tejpal surrender

മാപ്പുസ: 2013ലെ ലൈംഗികാതിക്രമ കേസിൽ തെഹൽക്ക മുൻ എഡിറ്റർ ഇൻ ചീഫ് തരുൺ തേജ്പാൽ വടക്കൻ ഗോവ സെഷൻസ് കോടതിയിൽ കീഴടങ്ങി. ബോംബെ ഹൈക്കോടതി വിധിച്ച 10 വർഷത്തെ കഠിനതടവ് അനുഭവിക്കുന്നതിനായി തേജ്പാലിനെ കൊൾവാലെ സെൻട്രൽ ജയിലിലേക്ക് മാറ്റി. (Tarun Tejpal surrender)

2013ൽ ഗോവയിലെ ഒരു ഹോട്ടൽ ലിഫ്റ്റിൽവച്ച് തേജ്പാൽ ലൈംഗികാതിക്രമം നടത്തിയെന്നാരോപിച്ച് ജൂനിയർ സഹപ്രവർത്തക നൽകിയ പരാതിയിലാണ് കേസ്. വിചാരണക്കോടതി തേജ്പാലിനെ കുറ്റവിമുക്തനാക്കിയിരുന്നു. എന്നാൽ ഈ ഉത്തരവ് ബോംബെ ഹൈക്കോടതി ഓഗസ്റ്റിൽ റദ്ദാക്കുകയും തേജ്പാലിനെ കുറ്റക്കാരനായി കണ്ടെത്തി 10 വർഷത്തെ തടവിന് ശിക്ഷിക്കുകയും ചെയ്തു. കേസിൽ കീഴടങ്ങുന്നതിൽ നിന്ന് ഇളവ് നൽകണമെന്ന തേജ്പാലിന്റെ ആവശ്യം സുപ്രീം കോടതി നേരത്തെ തള്ളിയിരുന്നു. തിങ്കളാഴ്ച പൊതു അവധിയായതിനാൽ കീഴടങ്ങൽ നീട്ടിവയ്ക്കണമെന്ന് ആവശ്യപ്പെട്ട് വടക്കൻ ഗോവ സെഷൻസ് കോടതിയിൽ നൽകിയ ഹർജിയും തള്ളിയതോടെയാണ് അദ്ദേഹം കോടതിയിൽ ഹാജരായത്.

ഇന്ത്യൻ ശിക്ഷാ നിയമത്തിലെ (IPC) 376(2), 354, 354A, 354B, 342 എന്നീ വകുപ്പുകൾ പ്രകാരമാണ് ശിക്ഷ വിധിച്ചിരിക്കുന്നത്. ശിക്ഷകൾ ഒരുമിച്ച് അനുഭവിച്ചാൽ മതിയെന്നതിനാൽ ആകെ 10 വർഷമാണ് തടവ് അനുഭവിക്കേണ്ടത്. അതേസമയം, കേസിൽ സുപ്രീം കോടതിയെ സമീപിച്ചിട്ടുണ്ടെന്നും നീതി ലഭിക്കുമെന്ന ഉറപ്പുണ്ടെന്നും തരുൺ തേജ്പാൽ പ്രതികരിച്ചു. കീഴടങ്ങിയതിന് പിന്നാലെയാണ് അദ്ദേഹത്തെ സെൻട്രൽ ജയിലിലേക്ക് മാറ്റിയത്.

Summary: Former Tehelka editor-in-chief Tarun Tejpal surrendered before the North Goa Sessions Court in connection with the 2013 sexual assault case. He was taken to Colvale Central Jail to serve the 10-year rigorous imprisonment sentence imposed by the Bombay High Court after overturning his trial court acquittal. Tejpal said he has approached the Supreme Court and remains confident of getting justice.