‘ഹോംവർക്ക്’ കഴിച്ച് പരീക്ഷാ സമ്മർദം കുറയ്ക്കാം; ചൈനയിൽ വൈറലായി വിദ്യാർഥികളുടെ പുതിയ ഭക്ഷണ ട്രെൻഡ് | Eating Homework Trend China

ബീജിങ്: പരീക്ഷാ സമ്മർദം കുറയ്ക്കാൻ ‘ഹോംവർക്ക്’ കഴിക്കുന്ന വിദ്യാർഥികളുടെ വിചിത്രമായ ട്രെൻഡാണ് ചൈനയിൽ സമൂഹമാധ്യമങ്ങളിൽ ശ്രദ്ധ നേടുന്നത്. എന്നാൽ ഇവിടെ കഴിക്കുന്നത് യഥാർഥ ഹോംവർക്കല്ല, സ്കൂൾ പുസ്തകങ്ങളുടെയും വർക്ക്‌ബുക്കുകളുടെയും രൂപത്തിൽ തയ്യാറാക്കിയ ഭക്ഷ്യയോഗ്യമായ അരിക്കടലാസാണ് (Eating Homework Trend China). പ്രൈമറി, സെക്കൻഡറി സ്കൂൾ വിദ്യാർഥികൾക്കിടയിലാണ് ഈ പുതിയ സ്നാക്കിന് പ്രചാരം ലഭിച്ചിരിക്കുന്നത്. ചെറിയ പാഠപുസ്തകങ്ങളുടെയും നോട്ടുബുക്കുകളുടെയും മാതൃകയിൽ പാക്ക് ചെയ്തിരിക്കുന്ന ഇവയിൽ അരിക്കടലാസിൽ പുസ്തകങ്ങൾ, നിഘണ്ടുക്കൾ, സമ്മാന സർട്ടിഫിക്കറ്റുകൾ തുടങ്ങിയവയുടെ ചിത്രങ്ങൾ അച്ചടിച്ചിരിക്കും. ചില ഉൽപ്പന്നങ്ങളിൽ സ്കോളർഷിപ്പ് കാർഡിനെ പ്രതിനിധീകരിക്കുന്ന ബാങ്ക് കാർഡിന്റെ ചിത്രവും കാണാം.

ചൈനീസ് ഇ-കൊമേഴ്സ് പ്ലാറ്റ്‌ഫോമുകളിൽ ഇത്തരം ‘എഡിബിൾ ഹോംവർക്ക്’ വളരെ കുറഞ്ഞ വിലയ്ക്കാണ് വിൽക്കുന്നത്. ‘സ്ട്രെസ് റെഡ്യൂസർ’ പോലുള്ള വാചകങ്ങളോടെയാണ് ചില ഉൽപ്പന്നങ്ങൾ വിപണനം ചെയ്യുന്നത്. പഠനത്തിൽ മികവ് വർധിപ്പിക്കാനും ഇവ സഹായിക്കുമെന്ന തരത്തിലുള്ള അവകാശവാദങ്ങളും ചില വിൽപ്പനക്കാർ മുന്നോട്ടുവയ്ക്കുന്നുണ്ട്. സമൂഹമാധ്യമങ്ങളിലെ വീഡിയോകൾ കണ്ടാണ് പല കുട്ടികളും ഇത്തരം സ്നാക്കുകൾ ആവശ്യപ്പെടുന്നതെന്ന് മാതാപിതാക്കളുടെ പ്രതികരണങ്ങളിൽ പറയുന്നു. ഹോംവർക്കിന്റെ രൂപത്തിലുള്ള ഭക്ഷണം കഴിക്കുന്നത് പഠനഭാരത്തിൽ നിന്ന് ചെറിയൊരു ആശ്വാസം നൽകുന്നുവെന്ന് ചില കുട്ടികളും അഭിപ്രായപ്പെട്ടിട്ടുണ്ട്. ചൈനീസ് വിദ്യാഭ്യാസ മേഖലയിലെ കടുത്ത അക്കാദമിക് സമ്മർദമാണ് ഈ ട്രെൻഡിന് പിന്നിലെ പ്രധാന പശ്ചാത്തലമെന്നും വിലയിരുത്തപ്പെടുന്നു.

അതേസമയം, ഭക്ഷ്യസുരക്ഷയെക്കുറിച്ച് ആശങ്കകളും ഉയർന്നിട്ടുണ്ട്. ഈ ഉൽപ്പന്നങ്ങളിൽ പാഠപുസ്തകങ്ങളുടെ ചിത്രങ്ങൾ അച്ചടിക്കാൻ ഉപയോഗിക്കുന്ന ഫുഡ് കളറിങ് ദേശീയ ഭക്ഷ്യസുരക്ഷാ മാനദണ്ഡങ്ങൾ പാലിക്കുന്നുണ്ടോ എന്നതാണ് പ്രധാന ചോദ്യം. സ്റ്റാർച്ച് അധിഷ്ഠിത ഉൽപ്പന്നങ്ങളിൽ ചില ഭക്ഷ്യനിറങ്ങൾ ഉപയോഗിക്കുന്നതുമായി ബന്ധപ്പെട്ട നിയന്ത്രണങ്ങളും ചൈനയിൽ നിലവിലുണ്ട്. അരിക്കടലാസും ഭക്ഷ്യഗുണനിലവാരമുള്ള നിറങ്ങളും സുരക്ഷിതമാണെന്ന് ഫുജിയാൻ മെഡിക്കൽ യൂണിവേഴ്സിറ്റിയുമായി ബന്ധപ്പെട്ട ഡോക്ടർ ഹി സിജുൻ ചൂണ്ടിക്കാട്ടിയതായി റിപ്പോർട്ടുണ്ട്. എന്നാൽ വ്യാവസായിക ആവശ്യത്തിനുള്ള നിറങ്ങൾ ഉപയോഗിച്ചാൽ കുട്ടികളുടെ കരൾ, വൃക്ക എന്നിവയെ ബാധിക്കാനുള്ള സാധ്യതയുണ്ടെന്നും അദ്ദേഹം മുന്നറിയിപ്പ് നൽകി. വിലകുറഞ്ഞ സ്നാക്കുകളുടെ ഉപയോഗം പരിമിതപ്പെടുത്തണമെന്നും അദ്ദേഹം മാതാപിതാക്കളോട് നിർദേശിച്ചു.

സ്കൂൾ തുറക്കുന്ന സീസണിൽ ചില പ്രദേശങ്ങളിൽ മാർക്കറ്റ് റെഗുലേറ്ററി അധികൃതർ പരിശോധനകളും ആരംഭിച്ചിട്ടുണ്ട്. സ്കൂളുകൾക്ക് സമീപമുള്ള കൺവീനിയൻസ് സ്റ്റോറുകൾ, സ്നാക്ക് കടകൾ, സ്റ്റേഷനറി കടകൾ എന്നിവിടങ്ങളിൽ പരിശോധന നടത്തി ഇത്തരം ഉൽപ്പന്നങ്ങൾ വിൽക്കുന്നതിനെതിരെ വ്യാപാരികൾക്ക് നിർദേശം നൽകിയതായാണ് റിപ്പോർട്ട്. വിദ്യാർഥികളുടെ പഠനസമ്മർദത്തെ രസകരമായി കൈകാര്യം ചെയ്യുന്ന ട്രെൻഡായി ശ്രദ്ധ നേടിയെങ്കിലും ഭക്ഷ്യസുരക്ഷ സംബന്ധിച്ച ചോദ്യങ്ങൾ ഇതോടെ കൂടുതൽ ശക്തമായിരിക്കുകയാണ്.

Summary: Chinese students are going viral for eating edible rice-paper snacks designed to look like school homework and textbooks as a playful way to cope with academic stress. The trend has also raised food-safety concerns over the colouring used on the snacks.