ഷെഹ്സാദ് ഭട്ടി നെറ്റ്‌വർക്കിനെ ഭീകരസംഘടനയായി പ്രഖ്യാപിച്ച് കേന്ദ്രം: നടപടി UAPA പ്രകാരം | Shahzad Bhatti Network

ന്യൂഡൽഹി: പാകിസ്ഥാൻ ആസ്ഥാനമായി പ്രവർത്തിക്കുന്ന പ്രമുഖ ഭീകര-ഗുണ്ടാ ശൃംഖലയായ ‘ഷെഹ്സാദ് ഭട്ടി നെറ്റ്‌വർക്കിനെ’ ഭീകരസംഘടനയായി പ്രഖ്യാപിച്ച് കേന്ദ്ര ആഭ്യന്തര മന്ത്രാലയം ഉത്തരവിറക്കി. നിയമവിരുദ്ധ പ്രവർത്തനങ്ങൾ തടയൽ നിയമം (UAPA) പ്രാബല്യത്തിലാക്കിയാണ് ഗസറ്റ് വിജ്ഞാപനം പുറപ്പെടുവിച്ചത്.(Shahzad Bhatti Network A Terrorist Organisation declared by MHA Under UAPA)

പാകിസ്ഥാൻ ചാരസംഘടനയായ ഐഎസ്ഐയുടെ പിന്തുണയോടെ പ്രവർത്തിക്കുന്ന ഗുണ്ടാത്തലവൻ ഷെഹ്സാദ് ഭട്ടിയാണ് ഈ ശൃംഖല നയിക്കുന്നത്. വിദേശ രാജ്യങ്ങളിൽ ഒളിവിൽ കഴിഞ്ഞ് ഇയാൾ പ്രവർത്തനം ഏകോപിപ്പിക്കുന്നുവെന്നാണ് രഹസ്യാന്വേഷണ ഏജൻസികളുടെ കണ്ടെത്തൽ. ഇന്ത്യയിലെ യുവാക്കളെയും പ്രാദേശിക ക്രിമിനലുകളെയും വശീകരിച്ച് അതിർത്തി കടന്നുള്ള ആയുധങ്ങൾ, സ്ഫോടകവസ്തുക്കൾ, മയക്കുമരുന്ന് എന്നിവ കടത്തുന്നതിനാണ് ഈ ശൃംഖല പ്രധാനമായും പ്രവർത്തിച്ചിരുന്നത്.

വർഗീയ സൗഹാർദ്ദം തകർക്കാനും രാജ്യത്തിന്റെ ജനാധിപത്യ വ്യവസ്ഥയ്ക്ക് ഭീഷണിയാകാനും ലക്ഷ്യമിട്ട് നിർമ്മിച്ച ഡിജിറ്റൽ സന്ദേശങ്ങളും ഇവർ പ്രചരിപ്പിച്ചിരുന്നതായി ആഭ്യന്തര മന്ത്രാലയം വ്യക്തമാക്കി. രാജ്യത്തെ സംസ്ഥാനങ്ങളിലായി വ്യാപിച്ചുകിടന്ന ഈ ശൃംഖലയുടെ 200-ലേറെ ഭീകരബന്ധമുള്ള പ്രതികളെ സുരക്ഷാ ഏജൻസികൾ അടുത്തിടെ അറസ്റ്റ് ചെയ്തിരുന്നു. സംഘത്തിനെതിരെ യുഎപിഎ, ആംസ് ആക്ട്, ഐടി ആക്ട് എന്നിവയുൾപ്പെടെ നിരവധിയായ വകുപ്പുകൾ ചുമത്തി വിവിധ സംസ്ഥാനങ്ങളിൽ കേസുകൾ നിലവിലുണ്ട്.

Story Summary

The Ministry of Home Affairs declared the Pakistan-backed Shahzad Bhatti Network a terrorist organization under the UAPA. The ISI-funded network was involved in cross-border smuggling of arms and narcotics, radicalizing local youth, and carrying out anti-national activities across India.