രാജ്യത്തെ വാഹന വായ്പകളിൽ വൻ വർധന; കാർ വായ്പാ തുക 49 ശതമാനം ഉയർന്ന് 8.2 ലക്ഷം രൂപയായി | TransUnion CIBIL Shifting Gears 2026

കൊച്ചി: രാജ്യത്തെ വാഹന വായ്പാ വിപണി പുതിയ വളർച്ചാ ഘട്ടത്തിലേക്ക് കടക്കുന്നതായി ട്രാൻസ്‌യൂണിയൻ സിബിലിന്റെ ഷിഫ്റ്റിംഗ് ഗിയേഴ്‌സ് 2026 – ക്രെഡിറ്റ് ഡ്രൈവ്സ് ടുഡേസ് മൊബിലിറ്റി റിപ്പോർട്ട് (TransUnion CIBIL Shifting Gears 2026). 2019-ലെ ആദ്യ പകുതിയുമായി താരതമ്യം ചെയ്യുമ്പോൾ 2026-ലെ ആദ്യ പകുതിയിൽ പാസഞ്ചർ വാഹനങ്ങളുടെ ശരാശരി വായ്പാ തുക 49 ശതമാനം വർധിച്ച് 8.2 ലക്ഷം രൂപയിലെത്തി. വായ്പ തിരിച്ചടയ്ക്കുന്നതിനുള്ള ശരാശരി കാലാവധി അഞ്ച് മാസം വർധിച്ച് 62 മാസമായതായും റിപ്പോർട്ട് വ്യക്തമാക്കുന്നു.

ഉയർന്ന മൂല്യമുള്ള കാർ വായ്പകൾ എടുക്കുന്നവരിൽ 51 ശതമാനം പേരും അർധനഗര, ഗ്രാമീണ മേഖലകളിൽ നിന്നുള്ളവരാണ്. വാഹന ധനകാര്യ രംഗത്ത് ബാങ്കിതര ധനകാര്യ സ്ഥാപനങ്ങളായ എൻബിഎഫ്‌സികൾക്കും വലിയ പങ്കുണ്ട്. ഇരുചക്ര വാഹന വായ്പകളിൽ 73 ശതമാനവും പാസഞ്ചർ വാഹന വായ്പകളിൽ 37 ശതമാനവും എൻബിഎഫ്‌സികളാണ് നൽകുന്നത്. പാസഞ്ചർ വാഹന വായ്പകളിൽ സ്വകാര്യ ബാങ്കുകളുടെ വിഹിതം 26 ശതമാനമാണ്. 2026 ജൂൺ വരെയുള്ള കണക്കനുസരിച്ച് രാജ്യത്തെ ഇരുചക്ര വാഹന വായ്പകളുടെ കുടിശ്ശിക 1.76 ലക്ഷം കോടി രൂപയിലെത്തി.

ഇരുചക്ര വാഹന വായ്പക്കാരുടെ എണ്ണം ഇരട്ടിയോളം വർധിച്ചു
ഇരുചക്ര വാഹന വായ്പകൾ രാജ്യത്ത് കൂടുതൽ സാധാരണമായ വായ്പാ മാർഗമായി മാറിയിട്ടുണ്ട്. 2026-ന്റെ ആദ്യ പകുതിയിൽ ഇത്തരം വായ്പകൾ എടുത്തവരിൽ 64 ശതമാനം പേരും അർധനഗര, ഗ്രാമീണ മേഖലകളിൽ നിന്നുള്ളവരാണ്. വായ്പയെടുത്തവരിൽ 43 ശതമാനം പേർക്ക് 30 വയസോ അതിൽ താഴെയോ പ്രായമാണുള്ളത്.

ആദ്യമായി വായ്പയെടുക്കുന്നവരെ അപേക്ഷിച്ച് രണ്ട് വർഷത്തിലധികം വായ്പാ ചരിത്രമുള്ളവരാണ് ഇപ്പോൾ ഇരുചക്ര വാഹന വായ്പകൾ കൂടുതലായി എടുക്കുന്നതെന്നും റിപ്പോർട്ട് ചൂണ്ടിക്കാട്ടുന്നു. സജീവമായ ഇരുചക്ര വാഹന വായ്പക്കാരുടെ എണ്ണം 2019-ലെ 1.7 കോടിയിൽ നിന്ന് 2026 ജൂണിൽ 3.3 കോടിയായി ഉയർന്നു.

എസ്‌യുവികൾക്കും ഉയർന്ന ഫീച്ചറുകളുള്ള കാറുകൾക്കും മുൻഗണന
എസ്‌യുവികളോടും കൂടുതൽ ഫീച്ചറുകളുള്ള വാഹനങ്ങളോടുമുള്ള ഉപഭോക്താക്കളുടെ താൽപ്പര്യമാണ് പാസഞ്ചർ വാഹന വിപണിയിൽ ഉയർന്ന വിലയുള്ള മോഡലുകളിലേക്കുള്ള മാറ്റത്തിന് പ്രധാന കാരണങ്ങളിലൊന്നെന്ന് റിപ്പോർട്ട് വ്യക്തമാക്കുന്നു. യുവതലമുറയിൽ കാർ സ്വന്തമാക്കുന്നവരുടെ എണ്ണം വർധിക്കുന്നതായും പഴയ വാഹനങ്ങൾക്ക് പകരം പുതിയതും ഉയർന്ന മൂല്യമുള്ളതുമായ കാറുകൾ വാങ്ങാൻ ഉപഭോക്താക്കൾ താൽപ്പര്യം പ്രകടിപ്പിക്കുന്നതായും റിപ്പോർട്ട് ചൂണ്ടിക്കാട്ടുന്നു.

യുവതലമുറയുടെ പഠനം, തൊഴിൽ, വരുമാനം എന്നിവയുമായി ഇരുചക്ര വാഹനങ്ങൾക്ക് അടുത്ത ബന്ധമുണ്ടെന്ന് ട്രാൻസ്‌യൂണിയൻ സിബിൽ മാനേജിങ് ഡയറക്ടറും സിഇഒയുമായ ഭവേഷ് ജെയിൻ പറഞ്ഞു. കാറുകൾ വാങ്ങുമ്പോൾ കൂടുതൽ ഫീച്ചറുകളുള്ള വലിയ വാഹനങ്ങൾ തിരഞ്ഞെടുക്കാനാണ് ഉപഭോക്താക്കൾക്ക് താൽപ്പര്യമെന്നും അദ്ദേഹം വ്യക്തമാക്കി.

ഉയർന്ന വായ്പാ തുകയും ദീർഘമായ തിരിച്ചടവ് കാലാവധിയും ഇത്തരം കാറുകൾ സ്വന്തമാക്കാൻ ഉപഭോക്താക്കളെ സഹായിക്കുന്നു. പുതിയ ഉപഭോക്താക്കൾ വാഹന വിപണിയിലേക്ക് കൂടുതലായി എത്തുന്നതോടെ ഔപചാരിക വായ്പാ സംവിധാനങ്ങളുടെ പങ്ക് കൂടുതൽ നിർണായകമാകുകയാണെന്നും ഭവേഷ് ജെയിൻ കൂട്ടിച്ചേർത്തു.

Story Summary : TransUnion CIBIL’s Shifting Gears 2026 – Credit Drives Today’s Mobility report highlights growth in India’s vehicle finance market. The average passenger vehicle loan amount rose 49% to ₹8.2 lakh between the first halves of 2019 and 2026, while the average repayment tenure increased to 62 months. The report also notes rising two-wheeler borrowing, a growing borrower base in semi-urban and rural areas, and increasing consumer interest in feature-rich, higher-value cars and SUVs.