30-കാരിക്ക് 75-കാരൻ വരൻ; ഉത്തർപ്രദേശിലെ പ്രണയം സോഷ്യൽ മീഡിയയിൽ വൈറൽ, വിവാഹം നവരാത്രിക്ക് ശേഷം
Current: മലയാളം
ഔറയ്യ: പ്രണയത്തിന് പ്രായം ഒരു തടസ്സമാണോ? ഉത്തർപ്രദേശിൽനിന്നുള്ള ഒരു പ്രണയവാർത്തയാണ് ഇപ്പോൾ സമൂഹമാധ്യമങ്ങളിൽ ചർച്ചയാകുന്നത്.
30-കാരിയായ റാണി രാജ്പുട്ടും 75-കാരനായ റാംസുഗറും തമ്മിലുള്ള വിവാഹനിശ്ചയമാണ് വൈറലായിരിക്കുന്നത്.
45 വയസ്സിന്റെ പ്രായവ്യത്യാസം മറികടന്ന് ഇരുവരും വിവാഹിതരാകാൻ തീരുമാനിച്ചതോടെ അനുകൂലിച്ചും പരിഹസിച്ചും നിരവധി പ്രതികരണങ്ങളാണ് സമൂഹമാധ്യമങ്ങളിൽ ഉയരുന്നത്.
ഉത്തർപ്രദേശിലെ ഔറയ്യ ജില്ലയിലെ ഒരു ഗ്രാമത്തിലാണ് സംഭവം. ഏകദേശം ഒരു വർഷം മുമ്പാണ് റാണിയും റാംസുഗറും പരിചയപ്പെടുന്നത്.
ഇൻസ്റ്റഗ്രാമിൽ റീലുകൾ ചെയ്യുന്ന റാണി, റാംസുഗറിന്റെ മകളെ കാണാനായി അദ്ദേഹത്തിന്റെ വീട്ടിൽ പതിവായി എത്താറുണ്ടായിരുന്നു.
ഈ സന്ദർശനങ്ങളിലൂടെയാണ് ഇരുവരും തമ്മിൽ അടുപ്പത്തിലായതും സൗഹൃദം പ്രണയത്തിലേക്ക് വഴിമാറിയതുമെന്നാണ് പുറത്തുവരുന്ന വിവരങ്ങൾ.
ഇതിനകം ഇരുവരുടെയും മോതിരമാറ്റം കഴിഞ്ഞു. നവരാത്രിക്ക് ശേഷമാണ് വിവാഹം നിശ്ചയിച്ചിരിക്കുന്നത്. വിവാഹനിശ്ചയത്തിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ യാണ് സംഭവം ശ്രദ്ധ നേടിയത്.
ദമ്പതികൾക്ക് ആശംസകളുമായി നിരവധി പേർ രംഗത്തെത്തിയപ്പോൾ പ്രായവ്യത്യാസത്തെ പരിഹസിച്ചും ചിലർ കമന്റുകളിട്ടു.
‘പ്രണയം കണ്ണില്ലാത്തതാണെന്ന് നേരിട്ട് കണ്ടു’ എന്ന തരത്തിലുള്ള പ്രതികരണങ്ങളും ഉയർന്നു. യുവാക്കളുടെ വിവാഹസാധ്യതകളെക്കുറിച്ച് തമാശരൂപേണ ആശങ്ക പങ്കുവെച്ചവരുമുണ്ട്.
അതേസമയം, ഇത്രയും വലിയ പ്രായവ്യത്യാസത്തിന് പിന്നിൽ സാമ്പത്തിക താൽപര്യങ്ങളുണ്ടോ എന്ന സംശയവും ചിലർ പ്രകടിപ്പിച്ചു. എന്നാൽ അത്തരം ആരോപണങ്ങൾക്ക് സ്ഥിരീകരണമില്ല.
പ്രായം, രൂപം, സാമൂഹിക ചട്ടക്കൂടുകൾ എന്നിവയെ മറികടന്ന് പ്രണയം സാധ്യമാണെന്ന വാദവും ഈ സംഭവം വീണ്ടും ചർച്ചയാക്കുന്നു.
ജീവിതത്തിന്റെ ഏത് ഘട്ടത്തിലും പരസ്പരമുള്ള കരുതലും മനസ്സിലാക്കലും കൂട്ടായ്മയും ആഗ്രഹിക്കുന്നവർ ഉണ്ടാകാം.
യുവപ്രായത്തിലെ പ്രണയത്തിൽനിന്ന് വ്യത്യസ്തമായി, ജീവിതത്തിന്റെ പിന്നീടുള്ള ഘട്ടങ്ങളിലെ ബന്ധങ്ങളിൽ പരസ്പര പിന്തുണയ്ക്കും ഏകാന്തതയിൽനിന്നുള്ള മോചനത്തിനും വലിയ പ്രാധാന്യമുണ്ടാകാം.
എന്നാൽ ഈ ബന്ധത്തിന്റെ യഥാർഥ സ്വഭാവം എന്താണെന്നതിനെക്കുറിച്ച് ഇരുവരുടെയും വ്യക്തിപരമായ നിലപാടുകളാണ് നിർണായകം.
എന്തായാലും, 45 വയസ്സിന്റെ പ്രായവ്യത്യാസമുള്ള ഈ വിവാഹവാർത്ത ഇപ്പോൾ സമൂഹമാധ്യമങ്ങളിൽ വലിയ ചർച്ചയ്ക്ക് വഴിയൊരുക്കി യിരിക്കുകയാണ്.
നവരാത്രിക്ക് ശേഷമുള്ള വിവാഹത്തിനായി കാത്തിരിക്കുകയാണ് ഇരുവരുടെയും കഥ പിന്തുടരുന്നവർ.
