ഒമാൻ തീരത്ത് ഇന്ത്യൻ ചരക്കുകപ്പലിന് നേരെ ആക്രമണം; ഗുജറാത്ത് സ്വദേശി ഉൾപ്പെടെ 14 നാവികർ കപ്പലിലുണ്ടായിരുന്നു | Indian cargo ship attacked near Oman

ഒമാൻ തീരത്ത് ഇന്ത്യൻ പതാകയേന്തിയ ചരക്കുകപ്പലിന് നേരെയുണ്ടായ ആക്രമണത്തിൽ ഒരു ഇന്ത്യൻ നാവികൻ മരിച്ചു. തിങ്കളാഴ്ച ആക്രമിക്കപ്പെട്ട ‘എംഎസ്‌വി അൽ ജുസൂഫി’ എന്ന കപ്പലിൽ 14 ഇന്ത്യൻ നാവികരാണ് ഉണ്ടായിരുന്നത്. തിരിച്ചറിയാത്ത ആകാശവസ്തു കപ്പലിൽ പതിക്കുകയായിരുന്നുവെന്ന് കേന്ദ്ര തുറമുഖ-കപ്പൽ ഗതാഗത മന്ത്രി സർബാനന്ദ സോനോവാൾ അറിയിച്ചു. (Indian cargo ship attacked near Oman)

ഗുജറാത്ത് സ്വദേശിയായ ഗന്ധർ നഹീം അസീസ് ആണ് മരിച്ചത്. പരിക്കേറ്റ ഇദ്ദേഹം പിന്നീട് മരണത്തിന് കീഴടങ്ങുകയായിരുന്നു. കപ്പലിലുണ്ടായിരുന്ന മറ്റ് 13 പേരും സുരക്ഷിതമായി ഒഴിഞ്ഞുമാറി. ഇവരെ ഒമാൻ തീരസംരക്ഷണ സേന രക്ഷപ്പെടുത്തിയതായി മന്ത്രി എക്‌സിൽ പങ്കുവച്ച കുറിപ്പിൽ വ്യക്തമാക്കി. ഒമാനിലെ ഇന്ത്യൻ എംബസി പ്രാദേശിക അധികൃതരുമായി ബന്ധപ്പെട്ട് രക്ഷപ്പെട്ട നാവികർക്ക് ആവശ്യമായ സഹായങ്ങൾ ഉറപ്പാക്കിവരികയാണ്. ഇവരെയും മരിച്ച നാവികന്റെ ഭൗതികശരീരവും എത്രയും വേഗം ഇന്ത്യയിലെത്തിക്കാനുള്ള നടപടികൾ മന്ത്രാലയം സ്വീകരിക്കുന്നുണ്ടെന്നും സോനോവാൾ അറിയിച്ചു.

അമേരിക്കയും ഇറാനും തമ്മിലുള്ള സംഘർഷത്തിനിടെ ഇന്ത്യൻ കപ്പലുകൾക്കുനേരെ ആക്രമണമുണ്ടാകുന്നത് അപൂർവമാണെങ്കിലും, സമാനമായ സംഭവങ്ങൾ നേരത്തെയും റിപ്പോർട്ട് ചെയ്തിട്ടുണ്ട്. മേയിൽ ഒമാൻ സമുദ്രപരിധിയിൽ ഇന്ത്യൻ ഉടമസ്ഥതയിലുള്ള ഒരു കപ്പൽ അജ്ഞാത ആക്രമണത്തിൽ മുങ്ങിയിരുന്നു. സംഭവത്തെ ഇന്ത്യയുടെ വിദേശകാര്യ മന്ത്രാലയം അംഗീകരിക്കാനാകാത്ത നടപടിയെന്ന് വിശേഷിപ്പിച്ചിരുന്നു. ഫെബ്രുവരി 28ന് അമേരിക്ക, ഇസ്രയേൽ, ഇറാൻ സംഘർഷം ആരംഭിച്ചതിനുശേഷം കപ്പലുകൾക്കും ടാങ്കറുകൾക്കും നേരെയുണ്ടായ ആക്രമണങ്ങളിൽ 22 ഇന്ത്യൻ പൗരന്മാർ കൊല്ലപ്പെട്ടതായി വിദേശകാര്യ മന്ത്രാലയ വക്താവ് രൺധീർ ജയ്‌സ്വാൾ കഴിഞ്ഞ മാസം വ്യക്തമാക്കിയിരുന്നു. ഇതിൽ 14 പേർ നാവികരാണെന്നും അദ്ദേഹം പറഞ്ഞു. നാവികരുടെ സുരക്ഷ ഉറപ്പാക്കാൻ കൂട്ടായ നടപടികൾ വേണമെന്ന് ഇന്ത്യ ആവശ്യപ്പെട്ടിട്ടുണ്ട്.

Summary: An Indian seafarer from Gujarat was killed after an unidentified aerial object struck the Indian-flagged cargo vessel MSV Al Jusufi off Oman’s coast. The other 13 Indian crew members were rescued by the Omani Coast Guard. India is coordinating their assistance and repatriation.