പരീക്ഷയെഴുതാൻ അനുമതി തേടി കാലടി സർവകലാശാലാ വിദ്യാർഥികൾ സുപ്രീംകോടതിയിലേക്ക് | Kalady University

തിരുവനന്തപുരം: പരീക്ഷയെഴുതാൻ അനുമതി തേടി കാലടി ശ്രീശങ്കരാചാര്യ സംസ്കൃത സർവകലാശാലയിലെ സസ്പെൻഷനിലായ വിദ്യാർഥികൾ സുപ്രീംകോടതിയെ സമീപിക്കുന്നു (Kalady University). ഹൈക്കോടതി ഡിവിഷൻ ബെഞ്ചിൽനിന്ന് തിരിച്ചടിയുണ്ടായതിനു പിന്നാലെ നാളെ സുപ്രീംകോടതിയിൽ ഹർജി നൽകാനാണ് വിദ്യാർഥികളുടെ നീക്കം.

വിദ്യാർഥികളെ പരീക്ഷയെഴുതാൻ അനുവദിക്കണമെന്ന സിംഗിൾ ബെഞ്ചിന്റെ ഉത്തരവ് ചട്ടവിരുദ്ധമാണെന്നാണ് ഹൈക്കോടതി ഡിവിഷൻ ബെഞ്ചിന്റെ നിരീക്ഷണം. മതിയായ ഹാജരില്ലാത്തത് പരീക്ഷയെഴുതുന്നതിന് തടസമാണെന്നും ജസ്റ്റിസുമാരായ അനിൽ കെ. നരേന്ദ്രൻ, എസ്. മുരളീകൃഷ്ണ എന്നിവർ ഉൾപ്പെട്ട ബെഞ്ച് ചൂണ്ടിക്കാട്ടി.

സിംഗിൾ ബെഞ്ച് ഉത്തരവ് റദ്ദാക്കി

വിദ്യാർഥികൾക്ക് പരീക്ഷയെഴുതാൻ അനുമതി നൽകിയ സിംഗിൾ ബെഞ്ച് ഉത്തരവിനെതിരെ വൈസ് ചാൻസലർ സിസ തോമസും സർവകലാശാലയും സമർപ്പിച്ച ഹർജിയിലാണ് ഡിവിഷൻ ബെഞ്ചിന്റെ ഉത്തരവ്. മതിയായ ഹാജരുണ്ടോയെന്ന് പരിശോധിക്കാതെയാണ് സിംഗിൾ ബെഞ്ച് പരീക്ഷയെഴുതാൻ അനുമതി നൽകിയതെന്ന് ഹർജിയിൽ ചൂണ്ടിക്കാട്ടിയിരുന്നു.

ആവശ്യമായ ഹാജർ വിദ്യാർഥികൾക്കില്ലെന്നും സൂപ്പർ ഫൈനോടെ പരീക്ഷയ്ക്ക് രജിസ്റ്റർ ചെയ്യാനുള്ള സമയപരിധിയും കഴിഞ്ഞെന്നുമാണ് വൈസ് ചാൻസലറുടെ വാദം. നാളെ മുതലാണ് പരീക്ഷ ആരംഭിക്കുന്നത്. ഡിവിഷൻ ബെഞ്ച് അനുമതി നിഷേധിച്ചതോടെ സസ്പെൻഷനിലായ വിദ്യാർഥികൾക്ക് പരീക്ഷയെഴുതാൻ കഴിയാത്ത സാഹചര്യമാണുള്ളത്.

16 വിദ്യാർഥികൾക്ക് സസ്പെൻഷൻ

ഓഗസ്റ്റ് 13ന് സർവകലാശാല സിൻഡിക്കറ്റ് യോഗത്തിനിടെ നടന്ന പ്രതിഷേധങ്ങളെ തുടർന്നാണ് 16 വിദ്യാർഥികളെ സസ്പെൻഡ് ചെയ്തത്. രണ്ട് മാസം പിന്നിട്ടിട്ടും സസ്പെൻഷൻ പിൻവലിച്ചിരുന്നില്ല.

സസ്പെൻഷനിലായ 16 പേരിൽ 10 വിദ്യാർഥികൾക്കാണ് പരീക്ഷയെഴുതാനുള്ളത്. അതേസമയം, മാപ്പപേക്ഷ നൽകിയാൽ 12 വിദ്യാർഥികളുടെ സസ്പെൻഷൻ പിൻവലിക്കാമെന്നായിരുന്നു കഴിഞ്ഞ ദിവസം ചേർന്ന സിൻഡിക്കറ്റ് യോഗത്തിലെ തീരുമാനം.

ഹൈക്കോടതി ഉത്തരവിനു പിന്നാലെ വിദ്യാർഥികൾ സുപ്രീംകോടതിയെ സമീപിക്കാനൊരുങ്ങുന്നതോടെ പരീക്ഷയെഴുതാനുള്ള അനുമതിക്കായുള്ള നിയമപോരാട്ടം പുതിയ ഘട്ടത്തിലേക്ക് കടക്കുകയാണ്.

Story Summary:
Students suspended from Sree Sankaracharya University of Sanskrit, Kalady, are planning to approach the Supreme Court seeking permission to write their examinations after the Kerala High Court Division Bench rejected the relief granted by a single judge. The dispute concerns attendance requirements and the validity of the earlier order. Sixteen students were suspended following protests during a Syndicate meeting on August 13; ten of them are due to take the examinations.