ഡൽഹി ബ്രക്സ് ഉച്ചകോടിയുടെ അനുബന്ധമായി ഇറാന്റെ വിദേശകാര്യ മന്ത്രി അബ്ബാസ് അരാഗ്ചിയുമായും പ്രസിഡന്റ് മസൂദ് പെസെഷ്കിയാനുമായും കാശ്മീരിലെ പ്രമുഖ മത-രാഷ്ട്രീയ നേതാക്കളുടെ നിർണ്ണായക കൂടിക്കാഴ്ച: അമേരിക്കയും ഇറാനും തമ്മിലുള്ള യുദ്ധവും ആക്രമണങ്ങളും ഉടനടി അവസാനിപ്പിക്കണമെന്ന് ഹുറിയത്ത് നേതാവ് മിർവായിസ് ഉമർ ഫറൂഖ്
Current: മലയാളം
ശ്രീനഗര്‍: ഡല്‍ഹിയില്‍ നടക്കുന്ന ബ്രക്സ് ഉച്ചകോടിയുടെ അനുബന്ധമായി ഇറാന്റെ വിദേശകാര്യ മന്ത്രി അബ്ബാസ് അരാഗ്ചിയുമായും പ്രസിഡന്റ് ഡോ. മസൂദ് പെസെഷ്കിയാനുമായും കാശ്മീരിലെ മത-രാഷ്ട്രീയ നേതാക്കള്‍ കൂടിക്കാഴ്ച നടത്തി.
ഹുറിയത്ത് കോണ്‍ഫറന്‍സ് അധ്യക്ഷനും മുഖ്യ പുരോഹിതനുമായ മിര്‍വായിസ് ഉമര്‍ ഫറൂഖ്, മുന്‍ മന്ത്രിയും ഷിയാ നേതാവുമായ ഇമ്രാന്‍ അന്‍സാരി, അഗ സയ്യിദ് ഹസന്‍ അല്‍ മോസവി, പിഡിപി നിയമസഭാംഗം അഗ സയ്യിദ് മുന്‍തസിര്‍ എന്നിവരടങ്ങുന്ന സംഘമാണ് ഡല്‍ഹിയില്‍ വെച്ച് ഇറാനിയന്‍ പ്രതിനിധികളെ കണ്ടത്.
യുഎസുമായുള്ള യുദ്ധത്തിനിടയില്‍ ഇറാന്റെ ജനങ്ങളോടുള്ള ഐക്യദാര്‍ഢ്യം പ്രകടിപ്പിച്ച നേതാക്കള്‍, സൈനിക ആക്രമണങ്ങളും യുദ്ധങ്ങളും ഉടനടി അവസാനിപ്പിക്കണമെന്ന് ആവശ്യപ്പെട്ടു.
ഏതൊരു ഗുരുതരമായ തര്‍ക്കങ്ങള്‍ക്കും പരിഹാരം കാണാന്‍ യുദ്ധമല്ല, മറിച്ച് ചര്‍ച്ചകളും നയതന്ത്ര ബന്ധങ്ങളുമാണ് വേണ്ടതെന്ന് മിര്‍വായിസ് വ്യക്തമാക്കി.
കാശ്മീരും ഇറാനും തമ്മിലുള്ള നൂറ്റാണ്ടുകള്‍ പഴക്കമുള്ള സാംസ്‌കാരിക-ചരിത്രപരമായ ബന്ധത്തിന്റെ സ്മരണയ്ക്കായി ശ്രീനഗറിലെ ചരിത്രപ്രസിദ്ധമായ ജാമാ മസ്ജിദിന്റെ ഈട്ടിത്തടിയില്‍ തീര്‍ത്ത ചെറിയ രൂപവും അദ്ദേഹം ഇറാനിയന്‍ നേതൃത്വത്തിന് സമ്മാനമായി നല്‍കി.
