ആഭ്യന്തര വകുപ്പ് മന്ത്രി രമേശ് ചെന്നിത്തലയുമായി കൂടിക്കാഴ്ച നടത്തി എഡിജിപി പി വിജയന്‍. പൊലീസ് നടപടികളില്‍ സര്‍ക്കാരിന് വിമര്‍ശനമില്ലെന്നും രമേശ് ചെന്നിത്തല
Current: മലയാളം
തിരുവനന്തപുരം: ആഭ്യന്തര വകുപ്പ് മന്ത്രി രമേശ് ചെന്നിത്തലയുമായി കൂടിക്കാഴ്ച നടത്തി എഡിജിപി പി വിജയന്‍. മെസിയെ കേരളത്തില്‍ എത്തിക്കാമെന്ന പേരില്‍ നടത്തിയ തട്ടിപ്പുമായി ബന്ധപ്പെട്ട് നടത്തിയ അന്വേഷണത്തിന്റെ വിവരങ്ങള്‍ എഡിജിപി മന്ത്രിയെ ധരിപ്പിച്ചു. പൊലീസ് നടപടികളില്‍ സര്‍ക്കാരിന് വിമര്‍ശനമില്ലെന്നും രമേശ് ചെന്നിത്തല അറിയിച്ചു.
തട്ടിപ്പിനെക്കുറിച്ച് അന്വേഷിക്കുന്ന പ്രത്യേക അന്വേഷണ സംഘത്തെ നയിക്കുന്നത് എഡിജിപി പി വിജയനാണ്. അന്വേഷണം നടത്താന്‍ എസ്‌ഐടിക്ക് പൂര്‍ണ സ്വാതന്ത്ര്യമുണ്ടെന്ന് രമേശ് ചെന്നിത്തല കൂടിക്കാഴ്ചയില്‍ ഊന്നിപ്പറഞ്ഞു.
റിപ്പോര്‍ട്ടര്‍ ചാനല്‍ ഓഫിസില്‍ ഉള്‍പ്പെടെ നിയമപരമായ രേഖകളും വാറണ്ടുകളുമായാണ് പൊലീസ് എത്തിയത്. അന്വേഷണത്തില്‍ മന്ത്രി ഇടപെടില്ല. റെയ്ഡിന്റെ ഉള്‍പ്പെടെ വിശദാംശങ്ങള്‍ ആഭ്യന്തര വകുപ്പ് മന്ത്രിയോട് എഡിജിപി വ്യക്തമാക്കിയിട്ടുണ്ടെന്നാണ് വിവരം.
റിപ്പോര്‍ട്ടര്‍ ചാനലിലെ പരിശോധനയില്‍ ആവശ്യമായ തെളിവുകള്‍ ലഭിച്ചെന്ന് ആഭ്യന്തരമന്ത്രി ഇന്ന് മാധ്യമങ്ങളോട് വ്യക്തമാക്കിയിരുന്നു. റിപ്പോര്‍ട്ടര്‍ ടിവിയിലെ മാധ്യമപ്രവര്‍ത്തകര്‍ ഭയപ്പെടേണ്ടതില്ല.
ഇത് മാധ്യമസ്വാതന്ത്ര്യത്തിനെതിരായ ഒരു കേസ് അല്ല. തെളിവുകള്‍ ലഭിച്ചിട്ടില്ല എന്ന് ആരു പറഞ്ഞെന്നും മന്ത്രി രമേശ് ചെന്നിത്തല ചോദിച്ചു. വസ്തുതകള്‍ തെറ്റിദ്ധരിപ്പിക്കുകയാണ് ചെയ്യുന്നത്. സിപിഐഎം മാധ്യമ സ്വാതന്ത്ര്യത്തെ പറ്റി പഠിപ്പിക്കേണ്ടെന്നും മന്ത്രി രമേശ് ചെന്നിത്തല പറഞ്ഞിരുന്നു.
