ആദ്യ ഭാര്യയുമായുള്ള അടുപ്പവും സാമ്പത്തിക സഹായവും ചോദ്യംചെയ്തു. ഉത്തർപ്രദേശിൽ ഭർത്താവിനെ ഉറക്കത്തിൽ കുത്തിക്കൊന്ന് പെട്ടിയിലാക്കി കനാലിൽ തള്ളി യുവതി. കാമുകനും സഹായിയും പ്രായപൂർത്തിയാകാത്ത മകനും ചേർന്ന് തെളിവ് നശിപ്പിച്ചു. രക്തക്കറ മറയ്ക്കാൻ തറ സിമന്റ് പൂശി. പ്രതികൾ പിടിയിൽ

ലഖ്‌നൗ: മുൻ ഭാര്യയുമായി വീണ്ടും അടുത്തതിലും അവർക്ക് സാമ്പത്തിക സഹായം നൽകിയതിലുമുള്ള അടങ്ങാത്ത പകയെത്തുടർന്ന് ഭർത്താവിനെ കാമുകന്റെയും സഹായിയുടെയും സ്വന്തം മകന്റെയും ഒത്താശയോടെ യുവതി അതിക്രൂരമായി കുത്തിക്കൊന്നു. 

ഉത്തർപ്രദേശിലെ മോഹൻലാൽഗഞ്ചിലാണ് നാടിനെ നടുക്കിയ കൊലപാതകം അരങ്ങേറിയത്. ഭർത്താവായ രാംകിഷോർ വാൽമീകിയുടെ മൃതദേഹം സെപ്റ്റംബർ 17-ന് ഭാവഖേഡ കനാലിന് സമീപത്തുനിന്നും വലിയൊരു ഇരുമ്പ് പെട്ടിയിൽ ഉപേക്ഷിച്ച നിലയിലാണ് പോലീസ് കണ്ടെടുത്തത്. 

സംഭവവുമായി ബന്ധപ്പെട്ട് ഭാര്യ സുഫിയ ബാനു, ഇവരുടെ കാമുകനായ മുണ്ണ എന്ന മുച്ഛദ് (52), സഹായി ഇഖ്ബാൽ, സുഫിയയുടെ 16 വയസ്സുകാരനായ മകൻ എന്നിവരെ പോലീസ് പിടികൂടി.

നാലു വർഷത്തെ പ്രണയത്തിനൊടുവിൽ രണ്ടു വർഷം മുൻപാണ് സുഫിയ ബാനുവും രാംകിഷോറും വിവാഹിതരായത്. എന്നാൽ വിവാഹശേഷവും സുഫിയക്ക് മുണ്ണയുമായി അവിഹിത ബന്ധമുണ്ടെന്ന് രാംകിഷോർ തിരിച്ചറിഞ്ഞതോടെ ഇരുവരും തമ്മിൽ നിരന്തരം കലഹങ്ങൾ പതിവായി. 

ഇതിൽ പ്രകോപിതനായ രാംകിഷോർ തന്റെ ആദ്യ ഭാര്യയായ കവിതാ ദേവിയെ വീണ്ടും പോയി കാണാനും അവർക്ക് സാമ്പത്തിക സഹായങ്ങൾ നൽകാനും തുടങ്ങി. ഇതിൽ കടുത്ത അമർഷം പൂണ്ട സുഫിയ ഭർത്താവിനെ വകവരുത്താൻ കാമുകനൊപ്പം ചേർന്ന് ആസൂത്രണം നടത്തുകയായിരുന്നു. 

സെപ്റ്റംബർ 14-ന് അർദ്ധരാത്രി രാംകിഷോർ ഗാഢനിദ്രയിലായ സമയം സുഫിയ മുൻവാതിൽ തുറന്നുകൊടുക്കുകയും കാമുകനും സഹായിയും ചേർന്ന് ഇയാളെ ഉറക്കത്തിൽ വെട്ടിപ്പരിക്കേൽപ്പിച്ച് കുത്തിക്കൊലപ്പെടുത്തുകയുമായിരുന്നു.

കൃത്യം നടത്തിയ ശേഷം കൊലപാതക വിവരങ്ങൾ പുറത്തറിയാതിരിക്കാൻ തറയിൽ പടർന്ന രക്തക്കറ സിമന്റും കോൺക്രീറ്റും ഉപയോഗിച്ച് പ്രതികൾ തേച്ചുപിടിപ്പിച്ചു. 

തുടർന്ന് ആയുധം ഒളിപ്പിച്ച ശേഷം സുഫിയയുടെ 16 വയസ്സുകാരനായ മകന്റെ സഹായത്തോടെ മൃതദേഹം കട്ടിലിനടിയിലെ പെട്ടിയിൽ ഒളിപ്പിക്കുകയും, പിറ്റേന്ന് രാത്രി ഇ-റിക്ഷയിൽ കയറ്റി കൊണ്ടുപോയി കനാലിൽ തള്ളുകയുമായിരുന്നു.

 രാംകിഷോറിനെ കാണാനില്ലെന്ന് കാട്ടി ആദ്യഭാര്യ കവിതാ ദേവി നൽകിയ പരാതിയിലാണ് പോലീസ് അന്വേഷണം തുടങ്ങിയത്. പ്രദേശത്തെ സി.സി.ടി.വി ദൃശ്യങ്ങളും ഇ-റിക്ഷയുടെ സഞ്ചാരപഥവും കേന്ദ്രീകരിച്ച് നടത്തിയ ശാസ്ത്രീയ അന്വേഷണത്തിലാണ് കൊലപാതകത്തിന്റെ ചുരുളഴിയുന്നതും മുഴുവൻ പ്രതികളും വലയിലാകുന്നതും.