യുക്രൈൻ സൈന്യത്തിന്റെ ഡ്രോൺ ദൗത്യങ്ങൾ തടസ്സപ്പെട്ടു; സ്റ്റാർലിങ്ക് സേവനങ്ങൾക്ക് നിയന്ത്രണം ഏർപ്പെടുത്തി സ്പേസ് എക്സ് | Ukraine Starlink Service Restrictions

യുക്രൈനിൽ ചില സ്റ്റാർലിങ്ക് സേവനങ്ങൾക്ക് നിയന്ത്രണം ഏർപ്പെടുത്തിയതിനെ തുടർന്ന് സൈനിക ഡ്രോൺ ദൗത്യങ്ങൾ തടസ്സപ്പെട്ടതായി യുക്രൈൻ അധികൃതർ. ഇലോൺ മസ്കിന്റെ ഉടമസ്ഥതയിലുള്ള സ്പേസ് എക്സിന്റെ ഉപഗ്രഹ ഇന്റർനെറ്റ് സേവനമായ സ്റ്റാർലിങ്ക്, യുക്രൈൻ സൈന്യത്തിന്റെ ദീർഘദൂര ഡ്രോൺ ആക്രമണങ്ങളിലും യുദ്ധഭൂമിയിലെ ആശയവിനിമയത്തിലും നിർണായക പങ്കുവഹിക്കുന്നതാണ്. ഒക്ടോബർ 14നാണ് നിയന്ത്രണങ്ങൾ സൈനിക പ്രവർത്തനങ്ങളെ ബാധിച്ചതായി അധികൃതർ വെളിപ്പെടുത്തിയത്. (Ukraine Starlink Service Restrictions)

മണിക്കൂറിൽ 160 കിലോമീറ്ററിലധികം വേഗത്തിൽ സഞ്ചരിക്കുന്ന ഡ്രോണുകളിൽ സൈനിക ആവശ്യങ്ങൾക്കായുള്ള സ്റ്റാർലിങ്ക് സേവനം പ്രവർത്തിക്കുന്നത് സ്പേസ് എക്സ് തടഞ്ഞതായാണ് യുക്രൈൻ പ്രസിഡന്റ് വൊളോഡിമിർ സെലൻസ്കിയുടെ ഉപദേഷ്ടാവ് സെർഹി ബെസ്ക്രെസ്റ്റ്നോവ് അറിയിച്ചത്. നിയന്ത്രണത്തെക്കുറിച്ച് പ്രതിരോധ സേനയ്ക്ക് മുൻകൂട്ടി മുന്നറിയിപ്പ് ലഭിച്ചിരുന്നില്ലെന്നും ഇതുമൂലം നിരവധി ദൗത്യങ്ങൾ തടസ്സപ്പെട്ടെന്നും അദ്ദേഹം ടെലിഗ്രാമിൽ കുറിച്ചു. തെക്കുകിഴക്കൻ മേഖലയിലുള്ള യുക്രൈന്റെ ഏഴാം റാപിഡ് റിയാക്ഷൻ കോർപസും ചില ദൗത്യങ്ങൾ റദ്ദാക്കേണ്ടിവന്നതായി സ്ഥിരീകരിച്ചു. മണിക്കൂറിൽ 110–120 കിലോമീറ്റർ വേഗത്തിൽ പറക്കുമ്പോൾ പോലും ഡ്രോണുകളുടെ സ്റ്റാർലിങ്ക് കണക്ഷൻ 10 മുതൽ 20 സെക്കൻഡ് വരെ നഷ്ടപ്പെട്ടതായി സൈനിക വിഭാഗം റോയിട്ടേഴ്സിനോട് പറഞ്ഞു. ഡ്രോണുകൾ സഞ്ചാരം തുടർന്നെങ്കിലും നിയന്ത്രണം കൂടുതൽ പ്രയാസകരമായെന്നും പ്രതിരോധ മന്ത്രാലയവുമായി ബന്ധപ്പെട്ട ഒരു വൃത്തം വ്യക്തമാക്കി.

നിയന്ത്രണങ്ങൾ ഏർപ്പെടുത്തിയതിന്റെ കാരണം സ്പേസ് എക്സ് വ്യക്തമാക്കിയിട്ടില്ല.
വാർത്തയോട് പ്രതികരിക്കാൻ കമ്പനി ഉടൻ തയ്യാറായതുമില്ല. അതേസമയം, റഷ്യൻ എണ്ണ ശുദ്ധീകരണശാലകൾക്ക് നേരെയുള്ള ആക്രമണങ്ങൾ അവസാനിപ്പിക്കാൻ വാഷിങ്ടൺ കീവിന് മേൽ സമ്മർദം ചെലുത്തുന്ന സാഹചര്യത്തിലാണ് നടപടി ഉണ്ടായതെന്ന് റോയിട്ടേഴ്സ് റിപ്പോർട്ട് ചെയ്തു. എന്നാൽ നിയന്ത്രണവും അമേരിക്കയുടെ സമ്മർദവും തമ്മിൽ ബന്ധമുണ്ടെന്ന് സ്ഥിരീകരിച്ചിട്ടില്ല.

2022ൽ റഷ്യയുടെ അധിനിവേശം ആരംഭിച്ച ആദ്യഘട്ടം മുതൽ യുക്രൈൻ സൈന്യത്തിന്റെ ആശയവിനിമയ സംവിധാനങ്ങളിൽ സ്റ്റാർലിങ്ക് നിർണായകമാണ്. ഇലക്ട്രോണിക് സിഗ്നൽ തടസ്സപ്പെടുത്താനുള്ള ശ്രമങ്ങളെ അതിജീവിക്കാനുള്ള ശേഷി ദീർഘദൂര ആക്രമണ ഡ്രോണുകൾക്കും മുൻനിര സൈനികർക്ക് സാധനങ്ങൾ എത്തിക്കുന്ന ഡ്രോണുകൾക്കും ഈ സംവിധാനത്തെ പ്രയോജനകരമാക്കി. പുതിയ നിയന്ത്രണങ്ങൾ സൈനിക നീക്കങ്ങളെയും വിതരണ സംവിധാനങ്ങളെയും കൂടുതൽ സങ്കീർണമാക്കുമെന്നാണ് യുക്രൈൻ അധികൃതരുടെ വിലയിരുത്തൽ.

Summary: Ukraine says SpaceX has restricted some Starlink services, disrupting military drone missions and forcing units to cancel operations. Ukrainian officials reported connection drops at drone speeds as low as 110–120 km/h, while the reason for the restrictions remains unclear.