ഇമ്രാൻ ഖാനെ ഇന്ത്യ വിടാൻ നിർദേശം; ആദ്യ പ്രതികരണവുമായി പങ്കാളി ലേഖ വാഷിങ്ടൺ | Imran Khan OCI card controversy

മുംബൈ: സിജെപി പ്രതിഷേധത്തിൽ പങ്കെടുത്തതിനെത്തുടർന്ന് നടൻ ഇമ്രാൻ ഖാനോട് ഇന്ത്യ വിടാൻ നിർദേശിച്ചതിന് പിന്നാലെ ആദ്യ പ്രതികരണവുമായി പങ്കാളി ലേഖ വാഷിങ്ടൺ. ഇമ്രാനൊപ്പം പൊലീസ് വാഹനത്തിൽ കഴിയുമ്പോൾ പകർത്തിയ ചിത്രം പങ്കുവെച്ച ലേഖ, ഹൃദയചിഹ്നങ്ങൾക്കൊപ്പം ‘ജസ്റ്റ്’ എന്ന അടിക്കുറിപ്പാണ് നൽകിയത്. ഒക്ടോബർ 28നകം ഇന്ത്യ വിടണമെന്നാണ് ഇമ്രാന് വിദേശകാര്യ രജിസ്ട്രേഷൻ ഓഫീസ് നൽകിയ നിർദേശം. ( Imran Khan OCI card controversy)

അമേരിക്കൻ പൗരനും ഓവർസീസ് സിറ്റിസൺ ഓഫ് ഇന്ത്യ കാർഡ് ഉടമയുമായ ഇമ്രാൻ ഖാൻ, മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഒക്ടോബർ 10ന് മുംബൈയിൽ നടന്ന കോക്ക്രോച്ച് ജനതാ പാർട്ടിയുടെ പ്രതിഷേധത്തിൽ പങ്കെടുത്തിരുന്നു. ലേഖ വാഷിങ്ടണും ബന്ധുവായ സെയ്ൻ മേരി ഖാനും അദ്ദേഹത്തോടൊപ്പമുണ്ടായിരുന്നു. പ്രതിഷേധവുമായി ബന്ധപ്പെട്ട് മൂവരെയും പൊലീസ് കസ്റ്റഡിയിലെടുത്തെങ്കിലും ശനിയാഴ്ച രാത്രി വിട്ടയച്ചു. സംഭവദിവസം നടന്ന കാര്യങ്ങൾ വിശദീകരിച്ച് ലേഖ സമൂഹമാധ്യമങ്ങളിൽ കുറിപ്പും പങ്കുവെച്ചിരുന്നു. തടവിലാക്കിയ സുഹൃത്തുക്കളെക്കുറിച്ച് അന്വേഷിക്കാനാണ് താനും ഇമ്രാനും സെയ്ൻ മേരി ഖാനും ഉൾപ്പെടെയുള്ളവർ ഓഗസ്റ്റ് ക്രാന്തി മൈതാനത്തേക്ക് പോയതെന്ന് ലേഖ പറഞ്ഞു. അവിടെ പ്രതിഷേധസംഗമം ഉണ്ടായിരുന്നില്ലെന്നും പൊലീസ് ബാരിക്കേഡുകൾ സ്ഥാപിച്ചിരുന്നുവെന്നും മാധ്യമപ്രവർത്തകർ ഇമ്രാനെ വളഞ്ഞതോടെ സാഹചര്യം ആശയക്കുഴപ്പത്തിലായെന്നും അവർ ആരോപിച്ചു.

തങ്ങൾ ഒരു സംഘടനയുടെയും ഭാഗമല്ലെന്നും പ്രത്യേക ആവശ്യങ്ങളൊന്നും ഉന്നയിക്കുന്നില്ലെന്നും ഇമ്രാൻ മാധ്യമങ്ങളോട് പറഞ്ഞതായി ലേഖ കുറിച്ചു. ഇതിനിടെ യൂണിഫോം ധരിച്ചവർ തന്നെയും സെയ്‌നെയും പിടിച്ചുവലിച്ചതായും പരിക്കേറ്റതായും എല്ലാവരെയും പൊലീസ് വാഹനത്തിൽ കയറ്റി മണിക്കൂറുകളോളം ചുറ്റിച്ചെന്നും അവർ ആരോപിച്ചു. അതേസമയം, തനിക്ക് നേരിട്ട അനുഭവത്തിൽ മുംബൈ പൊലീസിന്റെ സമീപനം സന്തുലിതമായിരുന്നുവെന്നും ലേഖ കൂട്ടിച്ചേർത്തു. കൂടുതൽ പ്രയാസങ്ങൾ നേരിടുന്നവരുമായുള്ള താരതമ്യത്തിൽ തങ്ങൾ പ്രത്യേക പരിഗണന ലഭിക്കുന്ന വിഭാഗത്തിലാണെന്നും അവർ അഭിപ്രായപ്പെട്ടു.

Summary: Lekha Washington shared her first reaction after actor Imran Khan was directed to leave India by October 28 following his participation in a CJP protest in Mumbai. She also described the events surrounding their detention, while Imran plans to challenge the order in the Bombay High Court.