എസ്‌ഐആർ വിവാദം: കോൺഗ്രസിനെ നേരിടാൻ രാജ്യവ്യാപക പ്രചാരണത്തിനൊരുങ്ങി ബിജെപി | BJP nationwide campaign on SIR

ന്യൂഡൽഹി: വോട്ടർപട്ടികയിലെ പ്രത്യേക തീവ്ര പരിഷ്‌കരണമായ എസ്‌ഐആറുമായി ബന്ധപ്പെട്ട് കോൺഗ്രസ് ഉന്നയിക്കുന്ന ആരോപണങ്ങളെ പ്രതിരോധിക്കാൻ രാജ്യവ്യാപക പ്രചാരണത്തിനൊരുങ്ങി ബിജെപി (BJP nationwide campaign on SIR). അടുത്തയാഴ്ച മുതൽ പ്രചാരണം ആരംഭിക്കാനാണ് പാർട്ടിയുടെ നീക്കമെന്ന് എഎൻഐ റിപ്പോർട്ട് ചെയ്തു. തിരഞ്ഞെടുപ്പ് കമ്മിഷന്റെ പ്രവർത്തനങ്ങളെക്കുറിച്ചും എസ്‌ഐആറിനെക്കുറിച്ചും പ്രതിപക്ഷം ഉന്നയിക്കുന്ന ആരോപണങ്ങൾക്ക് മറുപടി നൽകുകയാണ് ലക്ഷ്യം. ബിജെപി എംപിമാർ, എംഎൽഎമാർ, മുതിർന്ന നേതാക്കൾ എന്നിവർക്ക് അതത് മണ്ഡലങ്ങളിൽ പ്രചാരണത്തിന്റെ ചുമതല നൽകാനാണ് ആലോചന. എസ്‌ഐആറുമായി ബന്ധപ്പെട്ട ചോദ്യങ്ങൾക്കും പ്രതിപക്ഷത്തിന്റെ ആരോപണങ്ങൾക്കും മറുപടി നൽകുന്ന വിവരങ്ങൾ പൊതുജനങ്ങളിലെത്തിക്കുമെന്ന് പാർട്ടി വൃത്തങ്ങളെ ഉദ്ധരിച്ച് റിപ്പോർട്ട് പറയുന്നു.

ഇതിനായി 24 പേജുള്ള വിശദമായ രേഖ ബിജെപി തയ്യാറാക്കുന്നതായാണ് വിവരം. പ്രതിപക്ഷം ഉന്നയിക്കുന്ന ആരോപണങ്ങൾക്കുള്ള മറുപടികളും വിശദീകരണങ്ങളും ഉൾപ്പെടുന്ന രേഖ പ്രചാരണത്തിനിടെ പാർട്ടി നേതാക്കൾക്കും പ്രവർത്തകർക്കും സഹായകമാകുമെന്നാണ് വിലയിരുത്തൽ. സാമൂഹ്യമാധ്യമങ്ങൾ ഉൾപ്പെടെയുള്ള ആശയവിനിമയ സംവിധാനങ്ങൾ വഴിയും പ്രചാരണം വ്യാപിപ്പിക്കും. എസ്‌ഐആറിനെക്കുറിച്ചുള്ള നിലവിലെ വിമർശനങ്ങൾക്ക് മറുപടി നൽകുന്നതിനൊപ്പം, മുൻപ് അധികാരത്തിലിരുന്നപ്പോൾ കോൺഗ്രസ് തിരഞ്ഞെടുപ്പ് കമ്മിഷനെയും മറ്റ് സ്ഥാപനങ്ങളെയും ദുരുപയോഗം ചെയ്തുവെന്ന് ബിജെപി ആരോപിക്കുന്ന സംഭവങ്ങളും പ്രചാരണത്തിൽ ഉയർത്തിക്കാട്ടാനാണ് നീക്കം.

എസ്‌ഐആറും തിരഞ്ഞെടുപ്പ് കമ്മിഷന്റെ പ്രവർത്തനങ്ങളും സംബന്ധിച്ച് ബിജെപിയും കോൺഗ്രസും തമ്മിലുള്ള രാഷ്ട്രീയ തർക്കം തുടരുന്നതിനിടെയാണ് പുതിയ നീക്കം. പ്രചാരണത്തിലൂടെ തങ്ങളുടെ നിലപാട് നേരിട്ട് പൊതുജനങ്ങളിലെത്തിക്കാനാണ് ബിജെപി ലക്ഷ്യമിടുന്നത്.

Summary: The BJP is preparing to launch a nationwide campaign next week to counter Congress’s allegations concerning the Special Intensive Revision of electoral rolls and the Election Commission. The party is reportedly preparing a 24-page dossier and plans to involve MPs, MLAs and senior leaders in public outreach and social media campaigns.