യുവതിയിൽ നിന്ന് പണം തട്ടിയെടുത്തെന്ന പരാതി; തൃശൂർ സ്വദേശിയായ മിമിക്രി കലാകാരൻ അറസ്റ്റിൽ | Thrissur mimicry artist arrested
തിരുവനന്തപുരം: സമൂഹമാധ്യമത്തിലൂടെ പരിചയപ്പെട്ട യുവതിയിൽ നിന്ന് പണം തട്ടിയെടുത്തെന്നും സ്വകാര്യ ചിത്രങ്ങൾ ദുരുപയോഗം ചെയ്യുമെന്ന് ഭീഷണിപ്പെടുത്തിയെന്നുമുള്ള പരാതിയിൽ മിമിക്രി കലാകാരൻ അറസ്റ്റിൽ (Thrissur mimicry artist arrested). തൃശൂർ അരനാട്ടുകര ഒളരിക്കര സ്വദേശി വി.ബി. സതീഷ് (47) എന്ന സതീഷ് ഒളരിയെയാണ് വിഴിഞ്ഞം പൊലീസ് പിടികൂടിയത്.
വിഴിഞ്ഞം കോട്ടപ്പുറം സ്വദേശിനിയുടെ പരാതിയിലാണ് നടപടി. കഴിഞ്ഞ ഡിസംബർ മുതൽ ഫെബ്രുവരി വരെ പലതവണയായി യുവതിയിൽ നിന്ന് യു.പി.ഐ. വഴി 1.25 ലക്ഷം രൂപ കൈപ്പറ്റിയെന്നാണ് പരാതി. 20,300 രൂപ വിലവരുന്ന ഇലക്ട്രോണിക്സ് സാധനങ്ങളും വിമാന ടിക്കറ്റ് എടുത്തുനൽകിയ ഇനത്തിൽ 20,400 രൂപയും തട്ടിയെടുത്തതായി പൊലീസ് പറഞ്ഞു.
മോർഫ് ചെയ്ത ചിത്രങ്ങൾ പ്രചരിപ്പിക്കുമെന്ന് ഭീഷണി
പണം തിരികെ ചോദിച്ചപ്പോൾ മോർഫ് ചെയ്ത ചിത്രങ്ങൾ യുവതിയുടെ ബന്ധുക്കൾക്കും ജോലി ചെയ്യുന്ന സ്ഥാപനത്തിലും അയച്ചുനൽകുമെന്ന് ഭീഷണിപ്പെടുത്തിയെന്നാണ് പരാതിയിൽ പറയുന്നത്. സ്വകാര്യതയെ ബാധിക്കുന്ന രീതിയിൽ ചിത്രങ്ങൾ ദുരുപയോഗം ചെയ്യുമെന്ന് ഭീഷണിപ്പെടുത്തിയതിനെ തുടർന്നാണ് യുവതി പൊലീസിനെ സമീപിച്ചത്.
പ്രതിയുടെ സഹോദരിയും കേസിൽ രണ്ടാം പ്രതിയാണെന്ന് പൊലീസ് അറിയിച്ചു. ശബ്ദസന്ദേശത്തിലൂടെ ഇവരും യുവതിയെ ഭീഷണിപ്പെടുത്തിയെന്നാണ് ആരോപണം. ഇരുവർക്കുമെതിരെ കേസെടുത്തിട്ടുണ്ട്.
പ്രതിയെ കോടതിയിൽ ഹാജരാക്കി റിമാൻഡ് ചെയ്തു. കേസിൽ തുടർനടപടികൾ പുരോഗമിക്കുകയാണ്.
Story Summary:
A 47-year-old mimicry artist from Thrissur was arrested by Vizhinjam police following a complaint that he had taken money from a woman he met through social media and threatened to misuse morphed images. The complainant alleged that she transferred ₹1.25 lakh through UPI and paid additional amounts for electronics and an air ticket. The accused’s sister has also been named as a second accused over alleged threats through voice messages. The arrested man was remanded in judicial custody.
