“ഒരു വർഷത്തേക്ക് സ്വർണ്ണം വാങ്ങരുതെന്ന എന്റെ അഭ്യർത്ഥന ജനങ്ങൾ ഏറ്റെടുത്തതാണ് വില കുറയാൻ കാരണം”: പ്രധാനമന്ത്രി നരേന്ദ്ര മോദി | PM Modi Gold Price Speech Lucknow

ലഖ്നൗ: അത്യാവശ്യമില്ലെങ്കിൽ ഒരു വർഷത്തേക്ക് സ്വർണ്ണം വാങ്ങരുതെന്ന തന്റെ അഭ്യർത്ഥന രാജ്യത്തെ ജനങ്ങൾ ഏറ്റെടുത്തതാണ് സ്വർണ്ണവില കുറയാൻ കാരണമായതെന്ന് പ്രധാനമന്ത്രി നരേന്ദ്ര മോദി (PM Modi Gold Price Speech Lucknow). ശനിയാഴ്ച ഉത്തർപ്രദേശിലെ ലഖ്നൗവിൽ നടന്ന അഞ്ചാമത് ദേശീയ നൈപുണ്യ ബിരുദദാന ചടങ്ങിൽ (കൗശൽ ദീക്ഷാന്ത് സമാരോഹ്) സംസാരിക്കുകയായിരുന്നു അദ്ദേഹം.
ആറ് മാസം മുൻപ് മെയ് 10-ന് ഹൈദരാബാദിൽ നടന്ന പൊതുസമ്മേളനത്തിലാണ് ഒരു വർഷത്തേക്ക് സ്വർണ്ണം വാങ്ങുന്നത് ഒഴിവാക്കണമെന്ന് പ്രധാനമന്ത്രി ജനങ്ങളോട് അഭ്യർത്ഥിച്ചത്. തന്റെ വാക്കുകേട്ട് സ്വർണ്ണം വാങ്ങാതിരുന്നവർക്ക് ഇന്ന് പണം ലാഭിക്കാൻ കഴിഞ്ഞതായും “മോദിജി, അങ്ങ് പറഞ്ഞു, ഞങ്ങൾ കേട്ടു, ഞങ്ങളുടെ പണം ലാഭമായി” എന്ന് ജനങ്ങൾ തന്നോട് പറയുന്നുണ്ടെന്നും അദ്ദേഹം കൂട്ടിച്ചേർത്തു.
1960-കളിൽ മുൻ പ്രധാനമന്ത്രി ലാൽ ബഹദൂർ ശാസ്ത്രി ഒരു നേരത്തെ ഭക്ഷണം ഉപേക്ഷിക്കാൻ ആഹ്വാനം ചെയ്തപ്പോൾ രാജ്യം അത് അനുസരിച്ചതുപോലെയുള്ള അതേ സ്വഭാവഗുണം ഇന്നും ഇന്ത്യക്കാർക്കുണ്ടെന്ന് മോദി പ്രശംസിച്ചു. പശ്ചിമേഷ്യൻ സംഘർഷത്തെ തുടർന്ന് ക്രൂഡ് ഓയിൽ വില ഉയർന്നതും വിദേശനാണ്യ കരുതൽ ശേഖരത്തിൽ സമ്മർദ്ദമുണ്ടായതുമാണ് സ്വർണ്ണ ഇറക്കുമതി കുറയ്ക്കാൻ ആഹ്വാനം ചെയ്യാൻ കാരണമായത്. ഇതിന് പിന്നാലെ കേന്ദ്ര സർക്കാർ സ്വർണ്ണത്തിന്റെയും വെള്ളിയുടെയും ഇറക്കുമതി തീരുവ 6 ശതമാനത്തിൽ നിന്ന് 15 ശതമാനമായി ഉയർത്തുകയും ചെയ്തിരുന്നു.
കണക്കുകൾ പ്രകാരം ആഭ്യന്തര വിപണിയിൽ സ്വർണ്ണവിലയിൽ വലിയ ഇടിവാണ് രേഖപ്പെടുത്തിയിരിക്കുന്നത്. മെയ് 11-ന് 10 ഗ്രാമിന് ഏകദേശം 1.52 ലക്ഷം രൂപയായിരുന്ന എം.സി.എക്സ് (MCX) സ്വർണ്ണവില വെള്ളിയാഴ്ച 1.22 ലക്ഷം രൂപയായി കുറഞ്ഞു. അതായത് ഏകദേശം 20 ശതമാനത്തിന്റെ ഇടിവ്. മെയ് മാസത്തിൽ 10 ഗ്രാം സ്വർണ്ണം വാങ്ങാതെ മാറ്റിവെച്ച ഒരു കുടുംബത്തിന് ഇന്ന് ഏകദേശം 30,000 രൂപ ലാഭിക്കാൻ സാധിച്ചു. അന്താരാഷ്ട്ര വിപണിയിലും ഔൺസിന് 4,724 ഡോളറിൽ നിന്ന് 3,538 ഡോളറിലേക്ക് (ഏകദേശം 25% ഇടിവ്) സ്വർണ്ണവില താഴ്ന്നിട്ടുണ്ട്.
വാണിജ്യ മന്ത്രാലയത്തിന്റെ കണക്കുകൾ പ്രകാരം ഏപ്രിൽ മുതൽ ഒക്ടോബർ വരെയുള്ള കാലയളവിൽ ഇന്ത്യയുടെ സ്വർണ്ണ ഇറക്കുമതി 39.9 ശതമാനം കുറഞ്ഞ് 24.78 ബില്യൺ ഡോളറിലെത്തി. ഒക്ടോബറിൽ മാത്രം ഇറക്കുമതിയിൽ 62.6 ശതമാനത്തിന്റെ കുറവുണ്ടായി.
അതേസമയം, ആഗോള വിപണിയിലെ വിലയിടിവിന് പിന്നിൽ യു.എസ് പലിശനിരക്ക് വർധനവ്, ശക്തമായ ഡോളർ എന്നിവയാണെന്നാണ് ബുള്ളിയൻ വിദഗ്ധർ വിലയിരുത്തുന്നത്. ഇറക്കുമതി തീരുവ കൂട്ടിയതും രൂപയുടെ മൂല്യത്തകർച്ചയും കാരണം അന്താരാഷ്ട്ര വിപണിയെ അപേക്ഷിച്ച് ഇന്ത്യയിൽ വിലക്കുറവ് താരതമ്യേന കുറവാണെന്നും വിദഗ്ധർ ചൂണ്ടിക്കാട്ടുന്നു.




