ഐക്യു ബ്രാൻഡിന്റെ ഏറ്റവും കരുത്തുറ്റ സ്മാർട്ട്ഫോണായ ഐക്യു 15 അൾട്ര ഫെബ്രുവരി 4-ന് ചൈനീസ് വിപണിയിൽ ലോഞ്ച് ചെയ്യും. അത്യാധുനിക സ്നാപ്ഡ്രാഗൺ 8 എലൈറ്റ് ജെൻ 5 ചിപ്സെറ്റിന്റെ കരുത്തുമായെത്തുന്ന ഈ ഫോൺ പ്രധാനമായും ഗെയിമിംഗ് പ്രേമികളെ ലക്ഷ്യമിട്ടുള്ളതാണ്. മെച്ചപ്പെട്ട ഗെയിമിംഗ് അനുഭവത്തിനായി രണ്ട് ഫിസിക്കൽ ബട്ടണുകളും, ദീർഘനേരം ഗെയിം കളിക്കുമ്പോൾ ഫോൺ ചൂടാകാതിരിക്കാൻ വലിയ ആക്റ്റീവ് കൂളിംഗ് ഫാൻ അടങ്ങിയ ‘ഐസ് ഡോം’ കൂളിംഗ് സിസ്റ്റവും ഇതിൽ ഉൾപ്പെടുത്തിയിട്ടുണ്ട്. 2077 ഫ്ലോയിംഗ് ഓറഞ്ച്, 2049 ഐസ് ബ്ലൂ എന്നീ ആകർഷകമായ നിറങ്ങളിൽ ലഭ്യമാകുന്ന ഈ ഫോണിന് ഫ്യൂച്ചറിസ്റ്റിക് ആയ ഒരു ‘ഹണികോംബ്’ ഡിസൈനാണ് നൽകിയിരിക്കുന്നത്.
സാങ്കേതിക മികവിൽ ഏറെ മുന്നിലുള്ള ഈ ഫോണിൽ 6.85 ഇഞ്ച് 2K സാംസങ് LTPO ഡിസ്പ്ലേയാണ് പ്രതീക്ഷിക്കുന്നത്. 24 ജിബി വരെ റാമും 1 ടിബി സ്റ്റോറേജും നൽകുന്നതിലൂടെ വേഗതയുടെ കാര്യത്തിൽ ഐക്യു 15 അൾട്ര വിട്ടുവീഴ്ചയില്ലാത്ത പ്രകടനമാകും കാഴ്ചവെക്കുക. 50 മെഗാപിക്സലിന്റെ മൂന്ന് ക്യാമറകൾ പിന്നിലും 32 മെഗാപിക്സൽ സെൽഫി ക്യാമറ മുന്നിലും ഉണ്ടാകുമെന്ന് ലീക്കുകൾ സൂചിപ്പിക്കുന്നു. കൂടാതെ, സ്മാർട്ട്ഫോൺ ചരിത്രത്തിലെ തന്നെ ഏറ്റവും വലിയ ബാറ്ററികളിലൊന്നായ 7400mAh ബാറ്ററി ആയിരിക്കും ഇതിന്റെ മറ്റൊരു പ്രത്യേകത. 100 വാട്സ് വയേഡ് ഫാസ്റ്റ് ചാർജിംഗിനൊപ്പം വയർലെസ് ചാർജിംഗ് സൗകര്യവും ഈ സ്മാർട്ട്ഫോണിൽ ലഭ്യമാകും.
Also Read: സൈബർ സുരക്ഷ ശക്തമാക്കാൻ വാട്ട്സ്ആപ്പ്; പുതിയ ‘ലോക്ക്ഡൗൺ’ സുരക്ഷാ ക്രമീകരണങ്ങൾ വരുന്നു
ആൻഡ്രോയ്ഡ് 16 അടിസ്ഥാനമാക്കിയുള്ള ഒറിജിൻ ഒഎസ് 6-ൽ പ്രവർത്തിക്കുന്ന ഈ ഫോണിൽ സുരക്ഷയ്ക്കായി അൾട്രാസോണിക് ഫിംഗർപ്രിന്റ് സ്കാനർ നൽകിയിട്ടുണ്ട്. ചൈനയിലെ ലോഞ്ചിന് ശേഷം വൈകാതെ തന്നെ ഇന്ത്യയുൾപ്പെടെയുള്ള ആഗോള വിപണികളിൽ ഈ ഫോൺ എത്തുമെന്നാണ് പ്രതീക്ഷിക്കുന്നത്. റെഡ് മാജിക് പോലുള്ള ഗെയിമിംഗ് ഫോണുകൾക്ക് കടുത്ത വെല്ലുവിളിയാകാൻ പോകുന്ന ഐക്യു 15 അൾട്രയുടെ കൃത്യമായ വില വിവരങ്ങൾ ഫെബ്രുവരി 4-ന് അറിയാൻ സാധിക്കും.
The post ഗെയിമിംഗ് ലോകത്തെ വിസ്മയിപ്പിക്കാൻ ഐക്യു 15 അൾട്ര; ഫെബ്രുവരി 4-ന് വിപണിയിലെത്തും appeared first on Express Kerala.
