കുവൈത്തിൽ ഗതാഗത നിയമലംഘനങ്ങൾ തടയുന്നതിന്റെ ഭാഗമായി ട്രാഫിക് ഡിപ്പാർട്ട്മെന്റ് പരിശോധനകൾ ശക്തമാക്കി. ഒറ്റ ദിവസം കൊണ്ട് മൂവായിരത്തിലധികം നിയമലംഘനങ്ങളാണ് രാജ്യത്തുടനീളം റിപ്പോർട്ട് ചെയ്തത്. നിയമങ്ങൾ ലംഘിക്കുന്ന പ്രവാസികൾക്ക് നാടുകടത്തൽ ഉൾപ്പെടെയുള്ള കടുത്ത നടപടികൾ നേരിടേണ്ടി വരുമെന്ന് ഗതാഗത വകുപ്പ് കർശന മുന്നറിയിപ്പ് നൽകി. റോഡുകളിൽ അച്ചടക്കം ഉറപ്പാക്കാനും അപകടങ്ങൾ കുറയ്ക്കാനുമാണ് ഈ നീക്കം.
വാഹനമോടിക്കുമ്പോൾ മൊബൈൽ ഫോൺ ഉപയോഗിക്കുക, സീറ്റ് ബെൽറ്റ് ധരിക്കാതിരിക്കുക, അമിതമായ ശബ്ദമുണ്ടാക്കുക, ഗ്ലാസുകളിൽ കറുത്ത ഫിലിം ഒട്ടിക്കുക തുടങ്ങിയ കുറ്റങ്ങൾക്കാണ് പ്രധാനമായും നടപടിയെടുത്തത്. അഹമ്മദി, ഫർവാനിയ, ക്യാപിറ്റൽ ഗവർണറേറ്റുകളിലാണ് ഏറ്റവും കൂടുതൽ ലംഘനങ്ങൾ കണ്ടെത്തിയത്. അൻപതോളം വാഹനങ്ങളും നിരവധി മോട്ടോർ സൈക്കിളുകളും പൊലീസ് പിടിച്ചെടുത്തു. കൂടാതെ, ലൈസൻസില്ലാതെ വാഹനമോടിച്ച ആറ് പേരെ തടങ്കലിലാക്കുകയും നിയമം ലംഘിച്ച രണ്ട് കുട്ടികളെ ജുവനൈൽ സെന്ററിലേക്ക് മാറ്റുകയും ചെയ്തു.
Also Read: യുണിയൻ കോപ്പും ലിവ് ബാങ്കും കൈകോർക്കുന്നു; പുതിയ കോ-ബ്രാൻഡഡ് ക്രെഡിറ്റ് കാർഡുകൾ പുറത്തിറക്കി
ആശുപത്രികൾക്ക് മുന്നിലെ പാർക്കിംഗ് നിയമങ്ങൾ ലംഘിച്ച 322 പേർക്കും പിഴ ചുമത്തിയിട്ടുണ്ട്. ഇത്തരം നിയമവിരുദ്ധ പാർക്കിംഗ് ആംബുലൻസുകൾക്കും മറ്റ് എമർജൻസി വാഹനങ്ങൾക്കും തടസ്സം സൃഷ്ടിക്കുന്നതിനാലാണ് നടപടി കർശനമാക്കിയത്. അപകടകരമായ രീതിയിലുള്ള ഓവർടേക്കിംഗും ഗതാഗത തടസ്സവും ഒഴിവാക്കണമെന്ന് അധികൃതർ ആവശ്യപ്പെട്ടു. വരും ദിവസങ്ങളിലും പരിശോധന തുടരാനാണ് ട്രാഫിക് വിഭാഗത്തിന്റെ തീരുമാനം.
The post കുവൈത്തിൽ ഗതാഗത പരിശോധന കർശനമാക്കി; നിയമലംഘകർക്ക് നാടുകടത്തൽ ഉൾപ്പെടെ കടുത്ത ശിക്ഷാ മുന്നറിയിപ്പ് appeared first on Express Kerala.