ഐപിഎൽ വാതുവയ്പ് വിവാദവുമായി ബന്ധപ്പെട്ട മാനനഷ്ടക്കേസിൽ ക്രിക്കറ്റ് താരം മഹേന്ദ്ര സിങ് ധോണിക്ക് മദ്രാസ് ഹൈക്കോടതിയുടെ നിർണ്ണായക നിർദ്ദേശം. കേസിലെ തെളിവുകളായ സിഡികളിലെ ഉള്ളടക്കം പകർത്തിയെഴുതി പരിഭാഷപ്പെടുത്തുന്നതിനായി 10 ലക്ഷം രൂപ കോടതിയുടെ റിലീഫ് ഫണ്ടിൽ കെട്ടിവയ്ക്കാനാണ് ജസ്റ്റിസ് ആർ.എൻ. മഞ്ജുള ഉത്തരവിട്ടത്. മുൻ ഐപിഎസ് ഉദ്യോഗസ്ഥൻ ജി. സമ്പത്ത് കുമാർ, ചില മാധ്യമ സ്ഥാപനങ്ങൾ എന്നിവർക്കെതിരെ 100 കോടി രൂപ നഷ്ടപരിഹാരം ആവശ്യപ്പെട്ട് ധോണി നൽകിയ കേസിലാണ് ഈ നടപടി.
പരാതിയോടൊപ്പം രേഖകൾ പരിഭാഷപ്പെടുത്തി നൽകേണ്ട ഉത്തരവാദിത്തം ഹർജിക്കാരനാണെങ്കിലും, ഈ കേസിന്റെ പ്രത്യേക സാഹചര്യം പരിഗണിച്ചാണ് കോടതി ഔദ്യോഗിക ദ്വിഭാഷിയെ ചുമതലപ്പെടുത്തിയത്. എന്നാൽ ഇതിന് വലിയ സമയവും അധ്വാനവും ആവശ്യമാണെന്നും കുറഞ്ഞത് മൂന്നോ നാലോ മാസമെങ്കിലും ഇതിനായി വേണ്ടിവരുമെന്നും കോടതി നിരീക്ഷിച്ചു. 12 വർഷത്തോളമായി നീളുന്ന ഈ കേസിൽ 2026 മാർച്ച് മൂന്നാം വാരത്തിനകം പരിഭാഷാ നടപടികൾ പൂർത്തിയാക്കാനാണ് കോടതിയുടെ നിർദ്ദേശം. ഇതിനായുള്ള ചെലവ് എന്ന നിലയിലാണ് 10 ലക്ഷം രൂപ മാർച്ച് 12-നകം ചീഫ് ജസ്റ്റിസ് റിലീഫ് ഫണ്ടിലേക്ക് അടയ്ക്കാൻ ധോണിയോട് ആവശ്യപ്പെട്ടിരിക്കുന്നത്.
സീ മീഡിയ കോർപറേഷൻ, മാധ്യമപ്രവർത്തകൻ സുധീർ ചൗധരി, ജി. സമ്പത്ത് കുമാർ തുടങ്ങിയവർക്കെതിരെയാണ് ധോണി മാനനഷ്ടക്കേസ് ഫയൽ ചെയ്തിരിക്കുന്നത്. മുൻപ് ഈ കേസുമായി ബന്ധപ്പെട്ട് സമ്പത്ത് കുമാറിനെ കോടതി ശിക്ഷിച്ചിരുന്നെങ്കിലും സുപ്രീംകോടതി അത് സ്റ്റേ ചെയ്തിരുന്നു. മാർച്ച് 12-ന് കേസ് വീണ്ടും പരിഗണിക്കുമ്പോൾ തുക കെട്ടിവച്ചതിന്റെ വിവരങ്ങൾ ധോണി കോടതിയെ അറിയിക്കേണ്ടി വരും.
The post 100 കോടിയുടെ മാനനഷ്ടക്കേസ്! 10 ലക്ഷം രൂപ കെട്ടിവയ്ക്കാൻ ധോണിയോട് മദ്രാസ് ഹൈക്കോടതി appeared first on Express Kerala.