തിരുവനന്തപുരം: മാവുകൾ പൂവിട്ട ഘട്ടത്തിൽ അന്തരീക്ഷത്തിൽ ഈർപ്പം കുറഞ്ഞത് ഇത്തവണ കർഷകർക്ക് തുണയായി. സാധാരണയായി ഈ സമയത്ത് പെയ്യാറുള്ള അസമയത്തെ മഴയും കാറ്റും മാമ്പൂ കൊഴിയുന്നതിനും ഫംഗസ് ബാധയ്ക്കും കാരണമാകാറുണ്ട്. എന്നാൽ ഇത്തവണ മഴ 30% മുതൽ 45% വരെ കുറഞ്ഞതോടെ മാമ്പൂക്കൾ സുരക്ഷിതമായി കായ്കളായി മാറി. കഴിഞ്ഞ വർഷങ്ങളിൽ 40% വരെ മാമ്പൂക്കൾ മഴമൂലം നഷ്ടപ്പെട്ടിരുന്ന സ്ഥാനത്താണിത്. കൃത്യമായ താപനില ലഭിച്ചതിനാൽ ഫംഗസ് ബാധയില്ലാതെ മാമ്പൂക്കൾ കായ്കളായി മാറി.
ഇത്തവണത്തെ അനുകൂല കാലാവസ്ഥ ഉൽപാദനത്തിൽ വൻ കുതിച്ചുചാട്ടമുണ്ടാക്കുമെന്നാണ് കണക്കാക്കുന്നത്. 2024-ൽ 3.2 ലക്ഷം ടണ്ണായിരുന്ന ഉൽപാദനം ഇത്തവണ 5.5 ലക്ഷം മുതൽ 6.2 ലക്ഷം ടൺ വരെയായി ഉയരുമെന്നാണ് പ്രതീക്ഷ. കേരളത്തിന്റെ മാമ്പഴക്കലവറയായ പാലക്കാട് മുതലമടയിൽ സീസൺ നേരത്തെ തന്നെ ആരംഭിച്ചു കഴിഞ്ഞു. മലപ്പുറം, കണ്ണൂർ ജില്ലകളിലും നാട്ടുമാവുകൾ മുതൽ സങ്കരയിനങ്ങൾ വരെ സമൃദ്ധമായി പൂത്തിട്ടുണ്ട്.
Also Read: നെയ്യ് പൂപ്പൽ പിടിക്കാതെ മാസങ്ങളോളം സൂക്ഷിക്കാം! അറിഞ്ഞിരിക്കേണ്ട ചില പൊടിക്കൈകൾ
നീലം, ബംഗനപ്പള്ളി, സിന്ദൂരം എന്നീ ഇനങ്ങളാണ് ഇത്തവണ വിപണി കീഴടക്കുക. പാലക്കാട് മുതലമടയിൽ വിളവെടുപ്പ് സജീവമായതോടെ വിപണിയിൽ മാമ്പഴം എത്തിത്തുടങ്ങി. നിലവിൽ തിരുവനന്തപുരം ചാല മാർക്കറ്റിൽ ഇനം അനുസരിച്ച് 80 രൂപ മുതൽ 180 രൂപ വരെയാണ് പച്ചമാങ്ങയുടെ വില. വരും ദിവസങ്ങളിൽ കൂടുതൽ മാങ്ങകൾ എത്തുന്നതോടെ വിലയിൽ മാറ്റമുണ്ടാകുമെന്നാണ് വ്യാപാരികൾ കരുതുന്നത്.
NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)
The post മാമ്പഴക്കാലം ഇത്തവണ അതിമധുരം; ഉൽപാദനത്തിൽ വൻ വർധന appeared first on Express Kerala.