വിദേശ രാജ്യങ്ങളുടെ മാതൃകയിൽ ഇന്ത്യയിലും സാമൂഹിക മാധ്യമ ഉപയോഗത്തിന് പ്രായപരിധി ഏർപ്പെടുത്താൻ കേന്ദ്ര സർക്കാർ നീക്കം തുടങ്ങി. കുട്ടികളെ ഓൺലൈൻ ദുരുപയോഗങ്ങളിൽ നിന്ന് സംരക്ഷിക്കുന്നതിന്റെ ഭാഗമായി പ്രമുഖ സോഷ്യൽ മീഡിയ കമ്പനികളുമായി ചർച്ചകൾ ആരംഭിച്ചതായി കേന്ദ്ര ഐടി മന്ത്രി അശ്വിനി വൈഷ്ണവ് വ്യക്തമാക്കി. ഡിജിറ്റൽ പേഴ്സണൽ ഡാറ്റാ പ്രൊട്ടക്ഷൻ നിയമപ്രകാരം 18 വയസ്സിൽ താഴെയുള്ളവരെ കുട്ടികളായിട്ടാണ് നിർവചിച്ചിരിക്കുന്നത്. ഇതിന്റെ അടിസ്ഥാനത്തിൽ കർശനമായ നിയന്ത്രണങ്ങൾ കൊണ്ടുവരാനാണ് സർക്കാർ ലക്ഷ്യമിടുന്നത്.
ഡീപ്ഫേക്ക് സാങ്കേതികവിദ്യ ഉയർത്തുന്ന വെല്ലുവിളികൾ തടയുന്നതിനും ഉള്ളടക്കങ്ങളിൽ പ്രായനിയന്ത്രണം ഏർപ്പെടുത്തുന്നതിനും സർക്കാർ മുൻഗണന നൽകുന്നുണ്ട്. 16 വയസ്സിൽ താഴെയുള്ള കുട്ടികൾക്ക് സോഷ്യൽ മീഡിയ വിലക്കുന്നതിനെക്കുറിച്ച് ആന്ധ്രപ്രദേശ്, ഗോവ തുടങ്ങിയ സംസ്ഥാനങ്ങൾ നിലവിൽ പഠനം നടത്തിവരികയാണ്. പാർലമെന്ററി സമിതിയുടെ നിർദേശങ്ങൾ കൂടി പരിഗണിച്ചുകൊണ്ട്, കുട്ടികളുടെയും സമൂഹത്തിന്റെയും സുരക്ഷ ഉറപ്പാക്കുന്ന രീതിയിലുള്ള പുതിയ ചട്ടക്കൂടുകൾ ഉടൻ നിലവിൽ വരുമെന്നാണ് സൂചന.
Also Read: നത്തിംഗ് ഫോൺ 4a ഉടൻ എത്തും; സ്നാപ്ഡ്രാഗൺ ചിപ്സെറ്റും പുത്തൻ നിറങ്ങളുമായി വിപ്ലവം!
നെറ്റ്ഫ്ലിക്സ്, യൂട്യൂബ്, മെറ്റാ, എക്സ് തുടങ്ങിയ ആഗോള ടെക് ഭീമന്മാർ ഇന്ത്യയിലെ നിയമങ്ങളും ഭരണഘടനാ തത്ത്വങ്ങളും സാംസ്കാരിക പശ്ചാത്തലവും മാനിച്ചു വേണം പ്രവർത്തിക്കാനെന്ന് മന്ത്രി ഓർമ്മിപ്പിച്ചു. ഇന്ത്യയിൽ പ്രവർത്തിക്കുമ്പോൾ ഇവിടുത്തെ സാമൂഹിക സാഹചര്യങ്ങൾ കൂടി പരിഗണിക്കണമെന്നും കമ്പനികളോട് നിർദ്ദേശിച്ചിട്ടുണ്ട്. ഡൽഹിയിൽ നടന്ന എ.ഐ ഉച്ചകോടിയോടനുബന്ധിച്ച് നടന്ന പത്രസമ്മേളനത്തിലാണ് മന്ത്രി ഇക്കാര്യങ്ങൾ വ്യക്തമാക്കിയത്.
The post ഇന്ത്യയിലും സോഷ്യൽ മീഡിയയിൽ പ്രായപരിധി വരുന്നു..? കമ്പനികളുമായി കേന്ദ്ര ചർച്ച തുടങ്ങി! appeared first on Express Kerala.