2025-ലെ കണക്കുകൾ പുറത്തുവരുമ്പോൾ ഇന്ത്യൻ ഇലക്ട്രിക് വാഹന വിപണിയിൽ പുതിയൊരു ചരിത്രം കുറിച്ചിരിക്കുകയാണ് എംജി വിൻഡ്സർ ഇവി. ടാറ്റയുടെ കുത്തകയായിരുന്ന ഇവി വിപണിയിൽ 42,356 യൂണിറ്റുകളുടെ വമ്പൻ വിൽപ്പനയുമായാണ് എംജി വിൻഡ്സർ ഒന്നാം സ്ഥാനം പിടിച്ചെടുത്തത്. പ്രതിമാസം ശരാശരി 3,529 യൂണിറ്റുകൾ വിറ്റഴിച്ച ഈ മോഡൽ, ഇലക്ട്രിക് കാർ പ്രേമികളുടെ ഇടയിൽ വൻ തരംഗമായി മാറി. പട്ടികയിൽ രണ്ടാമതുള്ള ടാറ്റ നെക്സോൺ ഇവി 24,612 യൂണിറ്റുകളുടെ വിൽപ്പനയാണ് നടത്തിയത്. മഹീന്ദ്രയുടെ പുതിയ മോഡലായ XEV 9e ആകട്ടെ 22,266 യൂണിറ്റുകളുമായി മൂന്നാം സ്ഥാനത്ത് എത്തിയതും വിപണിയിലെ വലിയ മാറ്റമായി കണക്കാക്കപ്പെടുന്നു.
ടാറ്റയുടെ പഞ്ച് ഇവി (16,763), ടിയാഗോ ഇവി (16,247) എന്നിവയും ആദ്യ അഞ്ച് സ്ഥാനങ്ങളിൽ ഇടംപിടിച്ചു. മഹീന്ദ്രയുടെ പുതിയ അവതാരമായ BE 6 (12,119), എംജിയുടെ തന്നെ കുഞ്ഞൻ കാറായ കോമറ്റ് (10,442) എന്നിവയും മികച്ച പ്രകടനം കാഴ്ചവെച്ചു. ടാറ്റയുടെ ഹാരിയർ ഇവി, ഹ്യുണ്ടായി ക്രെറ്റ ഇലക്ട്രിക്, ടാറ്റ കർവ് ഇവി തുടങ്ങിയ പുത്തൻ മോഡലുകളും 2025-ൽ ഇവി വിപണിയുടെ ആവേശം കൂട്ടി. ലക്ഷ്വറി വിഭാഗത്തിൽ ബിഎംഡബ്ല്യു iX1 മികച്ച മുന്നേറ്റം നടത്തിയപ്പോൾ ബി.വൈ.ഡി (BYD), കിയ, സിട്രോൺ തുടങ്ങിയ ബ്രാൻഡുകളും തങ്ങളുടെ സാന്നിധ്യം അറിയിച്ചു.
Also Read: ഫീച്ചറുകളുടെ പൂരം, പക്ഷേ കൈയ്യിൽ കിട്ടാൻ ക്ഷമ വേണം; അപ്പാച്ചെ ആർടിഎക്സ് വാങ്ങുന്നവർ അറിയാൻ
വിൽപ്പനയിൽ വിൻഡ്സർ ഇവി മുന്നിലെത്താൻ പ്രധാന കാരണം അതിന്റെ ഫീച്ചറുകളിലെ പുതുമയാണ്. അടുത്തിടെ പുറത്തിറങ്ങിയ വിൻഡ്സർ ഇവി പ്രോ വേരിയന്റ് 52.9kWh ബാറ്ററിയുമായി 449 കിലോമീറ്റർ റേഞ്ചാണ് വാഗ്ദാനം ചെയ്യുന്നത്. വാഹനത്തിൽ നിന്ന് മറ്റ് ഇലക്ട്രിക് ഉപകരണങ്ങൾ ചാർജ് ചെയ്യാവുന്ന V2L, V2V സാങ്കേതിക വിദ്യകളും ലെവൽ 2 ADAS സുരക്ഷാ സംവിധാനങ്ങളും ഇതിനെ കൂടുതൽ ആകർഷകമാക്കി. ആധുനികമായ എംപിവി-ഹാച്ച്ബാക്ക് ഡിസൈനും വിശാലമായ ഇന്റീരിയറും മികച്ച ചാർജിംഗ് വേഗതയും വിൻഡ്സറിനെ ഇന്ത്യൻ ഉപഭോക്താക്കളുടെ പ്രിയപ്പെട്ട വൈദ്യുത വാഹനമാക്കി മാറ്റി.
The post 449 കി.മീ റേഞ്ചും നൂതന ഫീച്ചറുകളും; വിൻഡ്സർ ഇവി ഇന്ത്യക്കാരുടെ പ്രിയപ്പെട്ട കാറായതെങ്ങനെ? appeared first on Express Kerala.