അമേരിക്കൻ സുപ്രീം കോടതിയിൽ നിന്ന് ഏറ്റ തിരിച്ചടിയെ മറികടക്കാൻ ആഗോള തലത്തിൽ പുതിയ ഇറക്കുമതി തീരുവ പ്രഖ്യാപിച്ച് പ്രസിഡന്റ് ഡോണൾഡ് ട്രംപ്. കോടതി വിധിക്ക് പിന്നാലെ ഇന്ത്യയുൾപ്പെടെയുള്ള രാജ്യങ്ങളിൽ നിന്നുള്ള ഇറക്കുമതിക്ക് 10 ശതമാനം ഏകീകൃത താരിഫ് നിരക്കാണ് ട്രംപ് നിശ്ചയിച്ചിരിക്കുന്നത്. നേരത്തെ ഇന്ത്യയുമായുള്ള താൽക്കാലിക കരാർ പ്രകാരം ഇത് 18 ശതമാനമായിരുന്നു. പുതിയ ഉത്തരവ് ഉടനടി പ്രാബല്യത്തിൽ വരുമെന്ന് ട്രംപ് സോഷ്യൽ മീഡിയയിലൂടെ വ്യക്തമാക്കി.
നേരത്തെ 1977-ലെ നിയമം ഉപയോഗിച്ചാണ് ട്രംപ് തീരുവ ചുമത്തിയിരുന്നത്. എന്നാൽ സമാധാനകാലത്ത് ഈ നിയമം വഴി നികുതി ഈടാക്കാൻ പ്രസിഡന്റിന് അധികാരമില്ലെന്ന് സുപ്രീം കോടതി വിധിച്ചു. ഇതിനെ മറികടക്കാൻ 1974-ലെ വ്യാപാര നിയമത്തിലെ സെക്ഷൻ 122 ആണ് ട്രംപ് ഇപ്പോൾ പ്രയോഗിച്ചിരിക്കുന്നത്. അമേരിക്കയുടെ പേയ്മെന്റ് ബാലൻസ് കമ്മി (കയറ്റുമതിയേക്കാൾ കൂടുതൽ ഇറക്കുമതി നടക്കുന്നത്) പരിഹരിക്കാൻ 150 ദിവസത്തേക്ക് 15 ശതമാനം വരെ താരിഫ് ചുമത്താൻ ഈ നിയമം പ്രസിഡന്റിന് അധികാരം നൽകുന്നുണ്ട്. ഫെബ്രുവരി 24 മുതൽ ഈ പുതിയ തീരുവ പ്രാബല്യത്തിൽ വരും.
ഇന്ത്യയിൽ നിന്ന് റഷ്യൻ എണ്ണ വാങ്ങുന്നതിനെച്ചൊല്ലി നേരത്തെ ചുമത്തിയിരുന്ന 25 ശതമാനം ശിക്ഷാ തീരുവ നീക്കം ചെയ്ത് ഇന്ത്യയുമായി ഒരു ഇടക്കാല വ്യാപാര കരാറിൽ ട്രംപ് ഭരണകൂടം എത്തിയിരുന്നു. ഇതനുസരിച്ച് നിശ്ചയിച്ചിരുന്ന 18 ശതമാനം നിരക്ക്, പുതിയ ആഗോള താരിഫ് വന്നതോടെ 10 ശതമാനമായി കുറയും. ഇന്ത്യയുമായുള്ള ബന്ധം അതിശയകരമാണെന്നും ഈ മാറ്റങ്ങൾ കരാറിനെ ബാധിക്കില്ലെന്നും വൈറ്റ് ഹൗസിൽ ട്രംപ് പ്രതികരിച്ചു. എങ്കിലും, ഫാർമ സെക്ടർ പോലുള്ള പ്രത്യേക മേഖലകൾക്കും മെക്സിക്കോ, കാനഡ എന്നീ രാജ്യങ്ങൾക്കും പുതിയ ഉത്തരവിൽ ഇളവുകൾ നൽകിയിട്ടുണ്ട്.
Also Read: അമേരിക്കയിൽ താരിഫ് യുദ്ധം; സുപ്രീംകോടതി വിധിക്ക് പിന്നാലെ കടുത്ത നടപടിയുമായി ട്രംപ്
സുപ്രീം കോടതിയിലെ ആറ് ജഡ്ജിമാർ ട്രംപിന്റെ പഴയ താരിഫ് നയത്തിനെതിരെ രംഗത്തെത്തിയതാണ് പുതിയ പ്രതിസന്ധികൾക്ക് കാരണമായത്. കോടതി വിധിയെ ‘രാജ്യത്തിന് ദോഷകരമായത്’ എന്ന് വിശേഷിപ്പിച്ച ട്രംപ്, വിദേശ താൽപ്പര്യങ്ങൾ കോടതിയെ സ്വാധീനിച്ചുവെന്നും ആരോപിച്ചു. ഐഇഇപിഎ നിയമത്തിൽ താരിഫുകളെക്കുറിച്ച് പരാമർശമില്ലെന്ന ചീഫ് ജസ്റ്റിസ് ജോൺ റോബർട്ട്സിന്റെ നിരീക്ഷണം ട്രംപ് ഭരണകൂടത്തിന് വലിയ തിരിച്ചടിയായിരുന്നു. എങ്കിലും സ്റ്റീൽ, അലുമിനിയം തുടങ്ങിയ മേഖലകളിൽ നിലവിലുള്ള തീരുവകളെ ഈ വിധി ബാധിക്കില്ല.
കോടതി വിധിക്ക് പിന്നാലെ അമേരിക്കൻ വിപണിയിൽ ഓഹരി വിലകൾ നേരിയ തോതിൽ ഉയർന്നു. കമ്പനികൾക്ക് ഈ തീരുമാനം ആശ്വാസകരമാണെന്ന് നാഷണൽ റീട്ടെയിൽ ഫെഡറേഷൻ അറിയിച്ചു. എന്നാൽ, നിയമവിരുദ്ധമായി ഇതിനകം ഈടാക്കിയ 175 ബില്യൺ ഡോളർ വരെയുള്ള നികുതി തുക കമ്പനികൾക്ക് തിരികെ നൽകേണ്ടി വരുമെന്നാണ് സാമ്പത്തിക വിദഗ്ധരുടെ കണക്കുകൂട്ടൽ. ഈ തുക പലിശ സഹിതം തിരികെ നൽകണമെന്ന് കാലിഫോർണിയ ഗവർണർ ഗാവിൻ ന്യൂസം ആവശ്യപ്പെട്ടപ്പോൾ, ഇത് വലിയൊരു നിയമക്കുരുക്കാകുമെന്ന് ട്രംപ് മുന്നറിയിപ്പ് നൽകി.
The post സുപ്രീം കോടതിയെ വെട്ടിച്ച് ട്രംപ്! താരിഫ് 18%ൽ നിന്ന് 10%ലേക്ക്; ഇന്ത്യയ്ക്ക് ആശ്വാസവും ആശങ്കയും appeared first on Express Kerala.