നീലഗിരിയുടെ മനോഹാരിത നുകർന്നുള്ള ഊട്ടി ടോയ് ട്രെയിൻ യാത്രയ്ക്ക് ഇനി മുതൽ ചെലവേറും. ലോകമെമ്പാടുമുള്ള സഞ്ചാരികളെ ആകർഷിക്കുന്ന നീലഗിരി മൗണ്ടൻ റെയിൽവേയിലെ ടിക്കറ്റ് നിരക്കുകൾ റെയിൽവേ വർധിപ്പിച്ചു. സമുദ്രനിരപ്പിൽ നിന്ന് 2,240 മീറ്റർ ഉയരത്തിലുള്ള ‘മലകളുടെ റാണി’യായ ഊട്ടിയിലേക്ക് പ്രകൃതിഭംഗി ആസ്വദിച്ച് യാത്ര ചെയ്യാൻ ആഗ്രഹിക്കുന്നവർക്ക് ഈ നിരക്ക് വർധന തിരിച്ചടിയാകും.
നീലഗിരി മൗണ്ടൻ റെയിൽവേ നേരിടുന്ന സാമ്പത്തിക നഷ്ടം പരിഹരിക്കാനാണ് ഈ നടപടിയെന്നാണ് റെയിൽവേ അധികൃതർ വ്യക്തമാക്കുന്നത്. 1899-ൽ ആരംഭിച്ച ഈ ചരിത്രപ്രധാനമായ സർവീസ് 2005-ലാണ് യുനെസ്കോയുടെ ലോക പൈതൃക പട്ടികയിൽ ഇടംപിടിച്ചത്. 2020-ന് ശേഷം കഴിഞ്ഞ ആറ് വർഷമായി ടിക്കറ്റ് നിരക്കുകളിൽ മാറ്റം വരുത്തിയിരുന്നില്ല. എന്നാൽ ട്രെയിനുകളുടെ പ്രവർത്തന ചെലവ്, അറ്റകുറ്റപ്പണികൾ, ജീവനക്കാരുടെ ശമ്പളം എന്നിവയിലുണ്ടായ വലിയ വർധനവ് കണക്കിലെടുത്താണ് ഇപ്പോൾ നിരക്ക് പുതുക്കാൻ തീരുമാനിച്ചത്. മേട്ടുപ്പാളയം – കൂനൂർ റൂട്ടിലെ ചരക്ക് കൂലിയിൽ 204 ശതമാനം വരെ വർധനവ് വരുത്തിയിട്ടുണ്ട്.
Also Read:തത്കാൽ ടിക്കറ്റ് വേണോ? എങ്കിൽ ആദ്യം ആധാർ ലിങ്ക് ചെയ്യൂ; പരിഷ്കരിച്ച നിയമങ്ങൾ നിർബന്ധമാക്കി
പുതിയ നിരക്ക് പരിഷ്കാരം അനുസരിച്ച് ടിക്കറ്റുകളുടെ അടിസ്ഥാന വിലയിൽ അഞ്ച് ശതമാനത്തിന്റെ വർധനവാണ് രേഖപ്പെടുത്തിയിരിക്കുന്നത്. ഇതോടെ ഫസ്റ്റ് ക്ലാസ് സാധാരണ ടിക്കറ്റ് നിരക്ക് 520 രൂപയിൽ നിന്ന് 550 രൂപയായും, റിസർവ് ചെയ്ത ഫസ്റ്റ് ക്ലാസ് ടിക്കറ്റ് നിരക്ക് 600 രൂപയിൽ നിന്ന് 630 രൂപയായും ഉയർന്നു. എങ്കിലും നിരക്ക് വർധന നിലവിൽ വരുന്നതിന് മുൻപേ ടിക്കറ്റ് ബുക്ക് ചെയ്ത സഞ്ചാരികളിൽ നിന്ന് അധിക തുക ഈടാക്കില്ലെന്ന് റെയിൽവേ ഉറപ്പുനൽകിയിട്ടുണ്ട്.
The post ഊട്ടി യാത്ര പ്ലാൻ ചെയ്യുന്നുണ്ടോ? ടോയ് ട്രെയിൻ യാത്രയ്ക്ക് ഇനി ചെലവേറും! ടിക്കറ്റ് നിരക്കുകൾ വർധിപ്പിച്ചു appeared first on Express Kerala.