ഇറാനെതിരായ സൈനിക നീക്കങ്ങൾക്കായി അമേരിക്ക ഇന്ത്യൻ തുറമുഖങ്ങൾ ഉപയോഗിക്കുന്നുണ്ടെന്ന പ്രചാരണം കേന്ദ്ര വിദേശകാര്യ മന്ത്രാലയം കർശനമായി നിഷേധിച്ചു. ഇത്തരം വാർത്തകൾ തികച്ചും അടിസ്ഥാനരഹിതവും കെട്ടിച്ചമച്ചതുമാണെന്ന് മന്ത്രാലയം എക്സിലൂടെ വ്യക്തമാക്കി. തെറ്റായ അവകാശവാദങ്ങളിൽ പൊതുജനങ്ങൾ വഞ്ചിതരാകരുതെന്നും ഔദ്യോഗികമായ അറിയിപ്പുകളെ മാത്രം വിശ്വസിക്കണമെന്നും വിദേശകാര്യ മന്ത്രാലയം മുന്നറിയിപ്പ് നൽകി.
അമേരിക്ക ആസ്ഥാനമായുള്ള ‘വൺ അമേരിക്ക ന്യൂസ് നെറ്റ്വർക്കിന്’ നൽകിയ അഭിമുഖത്തിൽ മുൻ അമേരിക്കൻ ആർമി കേണൽ ഡഗ്ലസ് മക്ഗ്രെഗർ നടത്തിയ പ്രസ്താവനയാണ് വിവാദങ്ങൾക്ക് ആധാരം. ഇറാനെ ആക്രമിക്കാൻ അമേരിക്കൻ സൈന്യം ഇന്ത്യൻ നാവിക താവളങ്ങളെയും തുറമുഖങ്ങളെയും ആശ്രയിക്കുന്നുണ്ടെന്നും എന്നാൽ അവിടെ തുടരുന്നത് ഉചിതമല്ലെന്നുമാണ് അദ്ദേഹം അവകാശപ്പെട്ടത്. ഇന്ത്യയുമായി ബന്ധപ്പെടുത്തി മക്ഗ്രെഗർ നടത്തിയ ഈ പരാമർശങ്ങൾ അന്താരാഷ്ട്ര തലത്തിൽ ചർച്ചയായതോടെയാണ് ഇന്ത്യ ഉടൻ തന്നെ വിശദീകരണവുമായി രംഗത്തെത്തിയത്.
Also Read: ഇറാനിലും ലെബനനിലും ഇസ്രയേൽ വ്യോമാക്രമണം ശക്തം; ടെഹ്റാനിൽ അർധരാത്രി സ്ഫോടനം
അതേസമയം, ഇന്ത്യൻ മഹാസമുദ്രത്തിൽ വെച്ച് അമേരിക്കൻ അന്തർവാഹിനിയിൽ നിന്നുള്ള ടോർപ്പിഡോ ആക്രമണത്തിൽ ഇറാനിയൻ യുദ്ധക്കപ്പൽ തകർന്നതായും റിപ്പോർട്ടുകളുണ്ട്. ചൊവ്വാഴ്ച നടന്ന ഈ സംഭവത്തിൽ ഏകദേശം 87 ഇറാൻകാർ കൊല്ലപ്പെട്ടതായാണ് പ്രാഥമിക വിവരങ്ങൾ. മേഖലയിൽ ചരക്ക് നീക്കവും പ്രതിസന്ധിയിലായിരിക്കുന്ന സാഹചര്യത്തിൽ, ഇന്ത്യയുടെ നിഷ്പക്ഷ നിലപാടിനെ ബാധിക്കുന്ന ഇത്തരം വ്യാജ പ്രചാരണങ്ങളെ ഗൗരവത്തോടെയാണ് സർക്കാർ കാണുന്നത്.
The post ഇറാനെ ആക്രമിക്കാൻ അമേരിക്ക ഇന്ത്യൻ തുറമുഖങ്ങൾ ഉപയോഗിച്ചെന്ന വാർത്ത തള്ളി കേന്ദ്രസർക്കാർ appeared first on Express Kerala.
