യുഎഇയുടെ വിവിധ ഭാഗങ്ങളിൽ കാലാവസ്ഥാ വ്യതിയാനം തുടരുന്നു. അബുദാബി, ദുബായ് എന്നിവിടങ്ങളിൽ ഇന്ന് ഒറ്റപ്പെട്ട മഴ ലഭിച്ചതായി ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. ഈ ആഴ്ചയിലുടനീളം ആകാശം ഭാഗികമായോ പൂർണ്ണമായോ മേഘാവൃതമായിരിക്കാനാണ് സാധ്യത. ചിലയിടങ്ങളിൽ കാറ്റിന്റെ ഗതി മാറാനും ശക്തമായ കാറ്റിനും സാധ്യതയുള്ളതിനാൽ ജാഗ്രത പാലിക്കണമെന്ന് അധികൃതർ നിർദ്ദേശിച്ചു. കടൽ പ്രക്ഷുബ്ധമാകാൻ സാധ്യതയുള്ളതിനാൽ തീരദേശത്തുള്ളവർക്കും മത്സ്യത്തൊഴിലാളികൾക്കും മുന്നറിയിപ്പ് നൽകിയിട്ടുണ്ട്.
ന്യൂനമർദ്ദത്തെത്തുടർന്ന് ഒമാനിലും ഇന്ന് മുതൽ കാലാവസ്ഥ അസ്ഥിരമായിരിക്കുമെന്ന് സിവിൽ ഏവിയേഷൻ അതോറിറ്റി വ്യക്തമാക്കി. മുസന്ദം, അൽ ബുറൈമി, നോർത്ത് അൽ ബത്തിന തുടങ്ങിയ ഗവർണറേറ്റുകളിൽ നിലവിൽ മേഘാവൃതമായ അന്തരീക്ഷമാണ്. വരും ദിവസങ്ങളിൽ രാജ്യത്തിന്റെ മറ്റ് ഭാഗങ്ങളിലേക്കും മഴ വ്യാപിക്കുമെന്നാണ് പ്രവചനം. അസ്ഥിരമായ കാലാവസ്ഥ തുടരുന്ന സാഹചര്യത്തിൽ യാത്രാവേളകളിലും മറ്റും ആവശ്യമായ മുൻകരുതലുകൾ സ്വീകരിക്കണമെന്ന് ഒമാൻ കാലാവസ്ഥാ നിരീക്ഷണ കേന്ദ്രം അറിയിച്ചു.
The post യുഎഇയിലും ഒമാനിലും കാലാവസ്ഥാ മാറ്റം! ഈ ആഴ്ചയിലുടനീളം മഴയ്ക്കും കാറ്റിനും സാധ്യത appeared first on Express Kerala.
