ദേശീയപാത 66-ലെ തലപ്പാടി – ചെങ്കള ആറുവരിപ്പാതയുടെ ഉദ്ഘാടന ചടങ്ങിൽ നിന്ന് മുഖ്യമന്ത്രി പിണറായി വിജയനും സംസ്ഥാന സർക്കാരും വിട്ടുനിൽക്കുന്നു. പ്രധാനമന്ത്രി നരേന്ദ്രമോദി നിർവഹിക്കുന്ന ചടങ്ങിൽ സംസ്ഥാനത്തിന് അർഹമായ പരിഗണന ലഭിച്ചില്ലെന്നും പൊതുമരാമത്ത് വകുപ്പ് മന്ത്രി പി.എ. മുഹമ്മദ് റിയാസിനെ ക്ഷണിച്ചില്ലെന്നുമാണ് സർക്കാരിന്റെ ആക്ഷേപം. ഭൂമി ഏറ്റെടുക്കുന്നതിനായി 5,580 കോടി രൂപ സംസ്ഥാന സർക്കാർ നൽകിയിട്ടും, ശക്തമായ ഇടപെടലുകൾ നടത്തിയിട്ടും ഉദ്ഘാടന വേളയിൽ അവഗണന നേരിട്ട സാഹചര്യത്തിലാണ് പരിപാടി ബഹിഷ്കരിക്കാൻ തീരുമാനിച്ചത്. മുംബൈ – കന്യാകുമാരി ഇക്കോണോമിക് ഇടനാഴിയുടെ ഭാഗമായ ഈ സുപ്രധാന പദ്ധതിയുടെ ക്രെഡിറ്റ് കേന്ദ്രസർക്കാർ ഏകപക്ഷീയമായി ഏറ്റെടുക്കുന്നുവെന്നാണ് സംസ്ഥാനത്തിന്റെ നിലപാട്.
ഏകദേശം 2,650 കോടി രൂപ ചെലവിൽ നിർമ്മിച്ച 39 കിലോമീറ്റർ നീളമുള്ള ഈ പാത കണ്ണൂർ, കാസർകോട് ജില്ലകളെയും മംഗലാപുരത്തെയും തമ്മിൽ ബന്ധിപ്പിക്കുന്നതാണ്. 2021 നവംബറിൽ നിർമ്മാണം ആരംഭിച്ച് 2025 ഓഗസ്റ്റിൽ പൂർത്തിയാക്കിയ ഈ സ്ട്രെച്ച് സംസ്ഥാനത്ത് വികസനം പൂർത്തിയായ ആദ്യ റീച്ചാണ്. പദ്ധതിക്കായി വലിയ സാമ്പത്തിക വിഹിതം നൽകിയ കേരളത്തെ ചടങ്ങിൽ നിന്ന് മാറ്റിനിർത്തുന്നത് രാഷ്ട്രീയ പ്രേരിതമാണെന്ന് സർക്കാർ വൃത്തങ്ങൾ ആരോപിക്കുന്നു. വികസന നേട്ടങ്ങളെ ചൊല്ലിയുള്ള കേന്ദ്ര-സംസ്ഥാന പോര് ഇതോടെ പുതിയ തലത്തിലേക്ക് നീങ്ങിയിരിക്കുകയാണ്.
The post ദേശീയപാത ഉദ്ഘാടനം ബഹിഷ്കരിക്കാൻ സംസ്ഥാന സർക്കാർ; ചടങ്ങിൽ മുഖ്യമന്ത്രി പങ്കെടുക്കില്ല appeared first on Express Kerala.
