ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു ജീവിച്ചിരിപ്പുണ്ടെങ്കിൽ ഞങ്ങൾ അദ്ദേഹത്തെ പിന്തുടരുകയും കൊല്ലുകയും ചെയ്യും”— ഇത് വെറുമൊരു പ്രസ്താവനയല്ല, മറിച്ച് ശത്രുവിന്റെ സിരാകേന്ദ്രങ്ങളെ ലക്ഷ്യം വെച്ചുള്ള ഇറാൻ റെവല്യൂഷണറി ഗാർഡ്സിന്റെ ഏറ്റവും ഭീകരമായ ഒരു മരണവാറണ്ടാണ്. ഒരൊറ്റ വാക്കിൽ ലോകത്തെ വിറപ്പിച്ച ഈ മുന്നറിയിപ്പ് പശ്ചിമേഷ്യയെ ഒരു വൻയുദ്ധത്തിന്റെ വക്കിലെത്തിച്ച് കഴിഞ്ഞു. നയതന്ത്ര ചർച്ചകൾക്കും വിട്ടുവീഴ്ചകൾക്കും ഇനി സ്ഥാനമില്ലെന്ന് പ്രഖ്യാപിക്കുന്ന ഈ വാക്കുകൾ ഇസ്രയേലിന്റെ നെഞ്ചിടിപ്പ് കൂട്ടുകയാണ്. ശത്രുവിന്റെ തലവനെ നേരിട്ട് ലക്ഷ്യം വെച്ചുകൊണ്ട് ഇത്ര പരസ്യമായി ഒരു മുന്നറിയിപ്പ് പുറപ്പെടുവിക്കുന്നത് ഇറാന്റെ സൈനിക വീര്യത്തിന്റെയും പകയുടെയും ആഴമാണ് വ്യക്തമാക്കുന്നത്. നെതന്യാഹുവിനെ ഏത് കോണിൽ ഒളിച്ചിരുന്നാലും പിടികൂടുമെന്ന ഈ ഉറച്ച നിലപാട് ഒരു വലിയ യുദ്ധത്തിന്റെ തുടക്കമാകുമോ എന്നാണ് ലോകം ഇപ്പോൾ ആശങ്കയോടെ നോക്കിനിൽക്കുന്നത്.
ഫെബ്രുവരി 28 മുതൽ ആരംഭിച്ച ഈ സംഘർഷത്തിൽ കൊല്ലപ്പെട്ട കുട്ടികളെയും സാധാരണ ജനങളുടെ ആശങ്കകളെയും ബുദ്ധിമുട്ടുകളെയും സംബന്ധിച്ച സംഭവങ്ങൾ ചൂണ്ടിക്കാട്ടിയാണ് ഐആർജിസി നെതന്യാഹുവിനെതിരെ കടുത്ത ഭാഷയിൽ പ്രതികരിച്ചത്. ആക്രമണങ്ങൾക്ക് ഉത്തരവാദികളായവർക്ക് ശിക്ഷ ലഭിക്കുന്നതുവരെ പ്രതികാരം തുടരുമെന്ന നിലപാടും അവർ വ്യക്തമാക്കിയിട്ടുണ്ട്. ഇസ്രയേലും ഇറാനും തമ്മിലുള്ള സംഘർഷം കഴിഞ്ഞ കുറേ വർഷങ്ങളായി മധ്യപൂർവ്വേഷ്യയിലെ ഏറ്റവും അപകടകരമായ രാഷ്ട്രീയ സംഘർഷങ്ങളിൽ ഒന്നായി മാറിയിരിക്കുകയാണ്. പരസ്പരം സൈനിക നീക്കങ്ങളും രഹസ്യാക്രമണങ്ങളും ആരോപണങ്ങളും നിറഞ്ഞ ഈ ഏറ്റുമുട്ടൽ ഇപ്പോൾ തുറന്ന സൈനിക നടപടികളിലേക്ക് മാറുന്നുവെന്ന സൂചനകളാണ് പുതിയ സംഭവവികാസങ്ങൾ നൽകുന്നത്. ഐആർജിസിയുടെ ഔദ്യോഗിക വെബ്സൈറ്റായ “സെപാ ന്യൂസ്” വഴി പുറത്തിറക്കിയ പ്രസ്താവനയിൽ ഇസ്രയേലിന്റെ നടപടികളെ ശക്തമായി വിമർശിക്കുകയും, അവയ്ക്ക് ശക്തമായ മറുപടി ഉണ്ടാകുമെന്ന് വ്യക്തമാക്കുകയും ചെയ്തു.
ഇതിനിടെ ഇറാൻ പുതിയ സൈനിക നീക്കവുമായി രംഗത്തെത്തുകയും ചെയ്തു. “ഓപ്പറേഷൻ ട്രൂ പ്രോമിസ് 4” എന്ന പേരിൽ ഒരു വലിയ ആക്രമണ പരമ്പര ആരംഭിച്ചതായി ഐആർജിസി പ്രഖ്യാപിച്ചു. സയണിസ്റ്റ് ഭരണകൂടത്തിന്റെ പ്രാദേശിക കമാൻഡ്, നിയന്ത്രണ കേന്ദ്രങ്ങളെയും ആഭ്യന്തര സുരക്ഷാ സംവിധാനങ്ങളെയും ലക്ഷ്യമിട്ടാണ് ഈ ആക്രമണത്തിന്റെ 53-ാമത് ഘട്ടം ആരംഭിച്ചതെന്ന് ഇറാൻ പറയുന്നു. മധ്യപൂർവ്വേഷ്യയിൽ നിലവിൽ നിലനിൽക്കുന്ന സംഘർഷാവസ്ഥയിൽ ഇത് ഒരു വലിയ തന്ത്രപരമായ നീക്കമായാണ് വിലയിരുത്തപ്പെടുന്നത്.
ഈ സൈനിക നീക്കത്തിന് പിന്നിൽ ഒരു പ്രത്യേക പശ്ചാത്തലമുണ്ടെന്നാണ് ഇറാന്റെ അവകാശവാദം. മാർച്ച് 4-ന് ശ്രീലങ്കൻ തീരത്തിന് സമീപം നടന്ന ഒരു ആക്രമണത്തിൽ ഇറാനിയൻ നാവികസേനയുടെ ദേന ഡിസ്ട്രോയർ നശിക്കുകയും അതിൽ ഉണ്ടായിരുന്ന നിരവധി സൈനികർ കൊല്ലപ്പെടുകയും ചെയ്തതായി ഇറാൻ ആരോപിക്കുന്നു. ആ സംഭവത്തിൽ ജീവൻ നഷ്ടമായ 84 സൈനികരുടെ സ്മരണയ്ക്കായാണ് പുതിയ സൈനിക പ്രവർത്തനങ്ങൾ ആരംഭിച്ചതെന്ന് ഐആർജിസി വ്യക്തമാക്കി.
മാർച്ച് 15 ന് നടന്ന ഈ ആക്രമണത്തിൽ നിരവധി അത്യാധുനിക ആയുധ സംവിധാനങ്ങൾ ഉപയോഗിച്ചതായി ഇറാൻ അവകാശപ്പെടുന്നു. ഹൈപ്പർസോണിക് വിഭാഗത്തിൽപ്പെടുന്ന ഫത്താ, ഖാദർ എന്നീ മിസൈലുകൾ ഉൾപ്പെടെ 10 ശക്തമായ മിസൈലുകൾ ഉപയോഗിച്ചുള്ള സംയുക്ത ആക്രമണമാണ് നടന്നതെന്ന് റിപ്പോർട്ടുകളുണ്ട്. ഇതോടൊപ്പം വിനാശകരമായ ഡ്രോണുകളുടെ വലിയ സംഘവും ഉപയോഗിച്ചതായി ഇറാനിയൻ വൃത്തങ്ങൾ പറയുന്നു. അമേരിക്കൻ സേന നിലയുറപ്പിച്ചിരിക്കുന്ന യുഎഇയിലെ അൽ-ദഫ്ര വ്യോമതാവളത്തെയും മറ്റ് സൈനിക കേന്ദ്രങ്ങളെയും ലക്ഷ്യമിട്ടാണ് ഈ ഡ്രോൺ ആക്രമണങ്ങൾ നടന്നതെന്നാണ് ഐആർജിസിയുടെ വാദം.
ഇസ്രയേലിന്റെ പ്രാദേശിക കമാൻഡ് ആൻഡ് കൺട്രോൾ സെന്ററുകളും ആഭ്യന്തര സുരക്ഷാ നിയന്ത്രണ സംവിധാനങ്ങളും ഈ ആക്രമണത്തിന്റെ പ്രധാന ലക്ഷ്യങ്ങളിലൊന്നായിരുന്നുവെന്നും ഇറാൻ വ്യക്തമാക്കി. സൈനിക പ്രവർത്തനങ്ങൾ ഏകോപിപ്പിക്കുന്ന ഈ കേന്ദ്രങ്ങളെ ലക്ഷ്യമിടുന്നതിലൂടെ ശത്രുവിന്റെ പ്രവർത്തന ശേഷിയെ ദുർബലപ്പെടുത്തുക എന്നതാണ് ഈ നീക്കത്തിന്റെ ലക്ഷ്യമെന്ന് ഇറാന്റെ നിലപാട് വ്യക്തമാക്കുന്നു.
ഐആർജിസി പ്രസ്താവനയിൽ മറ്റൊരു കടുത്ത മുന്നറിയിപ്പും ഉണ്ടായിരുന്നു. അമേരിക്കയുടെയും ഇസ്രായേലിന്റെയും സൈനിക കേന്ദ്രങ്ങൾക്കും താൽപ്പര്യങ്ങൾക്കും നേരെയുള്ള ആക്രമണങ്ങൾ തുടരുമെന്നും, ആക്രമണങ്ങൾക്ക് ഉത്തരവാദികളായവർ കീഴടങ്ങുകയോ ശിക്ഷ നേരിടുകയോ ചെയ്യുന്നത് വരെ ഈ നടപടികൾ അവസാനിക്കില്ലെന്നും അവർ വ്യക്തമാക്കി. ഈ നിലപാട് മധ്യപൂർവ്വേഷ്യയിലെ സംഘർഷം കൂടുതൽ വ്യാപിക്കാനുള്ള സാധ്യതകളെക്കുറിച്ച് അന്താരാഷ്ട്ര തലത്തിൽ ആശങ്ക ഉയർത്തുകയാണ്.
ഈ സംഘർഷത്തിന്റെ തുടക്കം ഫെബ്രുവരി 28-ന് നടന്ന ഒരു വലിയ സൈനിക സംഭവത്തിലേക്കാണ് ഇറാൻ ചൂണ്ടിക്കാണിക്കുന്നത്. ആ ദിവസം നടന്ന ആക്രമണത്തിൽ ഇറാന്റെ പരമോന്നത നേതാവായിരുന്ന അലി ഖമേനി ഉൾപ്പെടെ നിരവധി മുതിർന്ന സൈനിക കമാൻഡർമാരും സാധാരണ പൗരന്മാരും കൊല്ലപ്പെട്ടതായി ഇറാനിയൻ റിപ്പോർട്ടുകൾ പറയുന്നു. അതിനുശേഷമാണ് അമേരിക്കയും ഇസ്രയേലും ചേർന്ന് ഇറാനെതിരെ വ്യാപകമായ സൈനിക നീക്കങ്ങൾ ആരംഭിച്ചതെന്നാണ് ഇറാന്റെ ആരോപണം.
ഇറാനിലെ വിവിധ സൈനിക കേന്ദ്രങ്ങളും അടിസ്ഥാന സൗകര്യങ്ങളും ലക്ഷ്യമാക്കി നടന്ന വ്യോമാക്രമണങ്ങൾ വലിയ നാശനഷ്ടങ്ങൾ ഉണ്ടാക്കിയതായി ഇറാൻ പറയുന്നു. അതിനാൽ തന്നെ ഈ ആക്രമണങ്ങൾക്ക് മറുപടിയായി മിസൈലുകളും ഡ്രോണുകളും ഉൾപ്പെടുന്ന ശക്തമായ സൈനിക പ്രതികാരം ആരംഭിച്ചതായി ഇറാനിയൻ നേതൃത്വം വ്യക്തമാക്കുന്നു.
ഇപ്പോൾ മധ്യപൂർവ്വേഷ്യയിലെ സ്ഥിതി അതീവ സൂക്ഷ്മമായ ഘട്ടത്തിലേക്കാണ് നീങ്ങുന്നത്. ഇറാനും ഇസ്രയേലും തമ്മിലുള്ള നേരിട്ടുള്ള സൈനിക ഏറ്റുമുട്ടൽ കൂടുതൽ വ്യാപിക്കുകയാണെങ്കിൽ അതിന്റെ പ്രത്യാഘാതങ്ങൾ ആഗോള രാഷ്ട്രീയത്തെയും സമ്പദ്വ്യവസ്ഥയെയും ബാധിക്കുമെന്നാണ് വിദഗ്ധർ മുന്നറിയിപ്പ് നൽകുന്നു.
ഓപ്പറേഷൻ ട്രൂ പ്രോമിസ് 4” എന്ന ഈ ആക്രമണ പരമ്പരയിലൂടെ ബെഞ്ചമിൻ നെതന്യാഹുവിനും ഇസ്രയേലിനും കൃത്യമായ ഒരു താക്കീതാണ് ഇറാൻ നൽകുന്നത്. ഇറാൻ ഒരു കാര്യം പറഞ്ഞാൽ അത് നടപ്പിലാക്കിയിരിക്കും എന്നതിന്റെ തെളിവായി ഈ ഓപ്പറേഷൻ മാറിക്കഴിഞ്ഞു. മധ്യപൂർവ്വേഷ്യയിലെ ഭൗമരാഷ്ട്രീയ സമവാക്യങ്ങളെ തന്നെ കടപുഴക്കിയെറിയുന്ന ഈ നീക്കം നെതന്യാഹുവിന്റെ അധികാരക്കസേരയെപ്പോലും വിറപ്പിക്കുകയാണ്. ശത്രുവിനെ പിന്തുടർന്ന് വേട്ടയാടുമെന്ന് ഇറാൻ പ്രഖ്യാപിച്ചാൽ അതിൽ നിന്ന് പിന്നോട്ടില്ല എന്ന ബോധ്യം ഇപ്പോൾ ലോകത്തിനുണ്ട്. നെതന്യാഹുവിനും അദ്ദേഹത്തിന്റെ ഭരണകൂടത്തിനും ഇനി സ്വസ്ഥമായി ഉറങ്ങാൻ കഴിയില്ലെന്ന വലിയ സന്ദേശമാണ് ഈ പോരാട്ടത്തിലൂടെ ഇറാൻ നൽകുന്നത്. ലോകം മുഴുവൻ ഇപ്പോൾ ശ്വാസമടക്കി നോക്കിനിൽക്കുന്നത് ഇറാന്റെ അടുത്ത പ്രഹരം എവിടെയായിരിക്കും എന്നതിലേക്കാണ്. കാരണം, ഇറാൻ ഇത് പറഞ്ഞിട്ടുണ്ടെങ്കിൽ, അത് ചെയ്തിരിക്കും
The post ഒളിച്ചിരുന്നാലും പിടികൂടും! ഇസ്രയേൽ പ്രധാനമന്ത്രിക്ക് നേരെ ഇറാന്റെ പരസ്യ ഭീഷണി! പശ്ചിമേഷ്യയെ വിറപ്പിച്ച് ‘ഓപ്പറേഷൻ ട്രൂ പ്രോമിസ് 4’ appeared first on Express Kerala.
