യുഎഇയിൽ പെരുന്നാൾ ഇളവുകൾ! അബുദാബിയിലും ഷാർജയിലും സൗജന്യ പാർക്കിംഗും ടോൾ ഇളവുകളും പ്രഖ്യാപിച്ചു

ഈദുൽ ഫിത്ർ പ്രമാണിച്ച് അബുദാബിയിലും ഷാർജയിലും പൊതു പാർക്കിംഗ് സൗജന്യമായിരിക്കുമെന്ന് അധികൃതർ അറിയിച്ചു. അബുദാബിയിൽ ഈ മാസം 19 മുതൽ 22 വരെ തുടർച്ചയായ നാല് ദിവസമാണ് പാർക്കിംഗ് ഫീസും ‘ദർബ്’ ടോൾ നിരക്കും ഈടാക്കാത്തത്. 23 മുതൽ പഴയപടി നിരക്കുകൾ പ്രാബല്യത്തിൽ വരും. ഷാർജയിൽ പെരുന്നാളിന്റെ ആദ്യ മൂന്ന് ദിവസങ്ങളിലാണ് സൗജന്യ പാർക്കിംഗ് അനുവദിച്ചിരിക്കുന്നത്. എന്നാൽ ഷാർജയിൽ നീല ബോർഡ് സ്ഥാപിച്ച പ്രത്യേക പാർക്കിംഗ് സോണുകളിൽ ഈ ഇളവ് ബാധകമായിരിക്കില്ലെന്നും മുനിസിപ്പാലിറ്റി വ്യക്തമാക്കി.

അവധി ദിവസങ്ങളിൽ അബുദാബിയിലെയും അൽ ഐനിലെയും ഡ്രൈവിംഗ് ആന്റ് വെഹിക്കിൾ ലൈസൻസിംഗ് സെന്ററുകൾ ഉൾപ്പെടെയുള്ള സർക്കാർ സ്ഥാപനങ്ങൾ പ്രവർത്തിക്കില്ല. വ്യാഴാഴ്ച മുതൽ ഞായറാഴ്ച വരെയാണ് ഈ കേന്ദ്രങ്ങൾക്ക് അവധി നൽകിയിരിക്കുന്നത്. തിങ്കളാഴ്ച മുതൽ പ്രവൃത്തി സമയം സാധാരണ നിലയിലാകും. നേരിട്ടുള്ള സേവനങ്ങൾ ലഭ്യമാകില്ലെങ്കിലും ദർബ് ആപ്പ്, താം പ്ലാറ്റ്‌ഫോം എന്നിവ വഴി ഡിജിറ്റൽ സേവനങ്ങൾ 24 മണിക്കൂറും യാത്രക്കാർക്ക് ഉപയോഗപ്പെടുത്താവുന്നതാണ്.

Also Read: മാസപ്പിറവി ദൃശ്യമായില്ല; സൗദിയും യുഎഇയും ഉൾപ്പെടെയുള്ള ഗൾഫ് രാജ്യങ്ങളിൽ വെള്ളിയാഴ്ച ചെറിയ പെരുന്നാൾ

മാസപ്പിറവി നിരീക്ഷിക്കുന്നതിനായുള്ള സമിതി ഇന്ന് യോഗം ചേരുന്നതോടെ പെരുന്നാൾ എന്നാണെന്ന കാര്യത്തിൽ ഔദ്യോഗിക സ്ഥിരീകരണമുണ്ടാകും. മാസപ്പിറവി ദൃശ്യമായാൽ വ്യാഴാഴ്ചയും ഇല്ലെങ്കിൽ വെള്ളിയാഴ്ചയുമായിരിക്കും യുഎഇയിൽ പെരുന്നാൾ ആഘോഷം. പൊതു-സ്വകാര്യ മേഖലകളിലെ ജീവനക്കാർക്ക് ദീർഘമായ അവധി ലഭിക്കുന്നതിനാൽ ഈ ഗതാഗത ഇളവുകൾ യാത്രക്കാർക്ക് വലിയ ഉപകാരപ്രദമാകും.

The post യുഎഇയിൽ പെരുന്നാൾ ഇളവുകൾ! അബുദാബിയിലും ഷാർജയിലും സൗജന്യ പാർക്കിംഗും ടോൾ ഇളവുകളും പ്രഖ്യാപിച്ചു appeared first on Express Kerala.