രഹസ്യങ്ങൾ ഒളിപ്പിച്ച് ആ സിലിണ്ടർ രൂപം; നാസയുടെ ക്യൂരിയോസിറ്റിക്ക് മുന്നിൽ പുതിയ വെല്ലുവിളി

ചൊവ്വയുടെ ചുവന്ന മണ്ണിൽ പതിറ്റാണ്ടുകളായി തുടരുന്ന ജീവന്റെ തിരച്ചിലിനിടയിൽ ശാസ്ത്രലോകത്തെ മുൾമുനയിൽ നിർത്തി പുതിയൊരു കണ്ടെത്തൽ. ഗെയിൽ ക്രേറ്റർ മേഖലയിൽ പാറക്കൂട്ടങ്ങൾക്കിടയിൽ കണ്ടെത്തിയ തിളങ്ങുന്ന സിലിണ്ടർ രൂപത്തിലുള്ള വസ്തുവാണ് ഇപ്പോൾ വലിയ തർക്കങ്ങൾക്ക് വഴിതുറന്നിരിക്കുന്നത്. 2022-ൽ നാസയുടെ ക്യൂരിയോസിറ്റി റോവർ പകർത്തിയ ചിത്രങ്ങളിൽ പതിഞ്ഞ ഈ വിചിത്ര രൂപം, പ്രകൃതിദത്തമായ ഒന്നല്ലെന്നും അന്യഗ്രഹ സാങ്കേതികവിദ്യയുടെ അവശിഷ്ടമാകാൻ സാധ്യതയുണ്ടെന്നും വാദിച്ചുകൊണ്ട് പ്രമുഖ അസ്‌ട്രോഫിസിസ്റ്റ് പ്രൊഫസർ ഏവി ലോബ് രംഗത്തെത്തിയതോടെയാണ് സംഭവം വാർത്താപ്രാധാന്യം നേടിയത്.

ഏകദേശം 20 സെന്റിമീറ്റർ നീളമുള്ള, ലോഹത്തിന്റേതെന്ന് തോന്നിപ്പിക്കുന്ന വിധത്തിൽ തിളക്കമുള്ള ഈ വസ്തുവിന് കൃത്യമായ സിലിണ്ടർ ആകൃതിയാണുള്ളത്. ചൊവ്വയിലെ പരുക്കൻ ഭൂപ്രകൃതിയിൽ ഒട്ടും ചേരാത്ത വിധം മിനുസമാർന്ന ഈ രൂപത്തെ ‘പാർട്ടി ഹാറ്റ്’ എന്നാണ് പലരും വിശേഷിപ്പിക്കുന്നത്. അമച്വർ ഗവേഷകനായ റാമി ബാർ ഇലാൻ നാസയുടെ ആർക്കൈവുകളിൽ നിന്ന് കണ്ടെത്തിയ ഈ ചിത്രം പ്രൊഫസർ ഏവി ലോബിന്റെ ശ്രദ്ധയിൽപ്പെട്ടതോടെ, അദ്ദേഹം നാസയ്ക്ക് മേൽ കടുത്ത സമ്മർദ്ദം ചെലുത്തുകയാണ്. നിലവിൽ ഈ വസ്തുവിൽ നിന്ന് എട്ട് കിലോമീറ്റർ അകലെയുള്ള ക്യൂരിയോസിറ്റി റോവർ, തന്റെ ഇപ്പോഴത്തെ ദൗത്യങ്ങൾ നിർത്തിവെച്ച് ഈ നിഗൂഢ വസ്തുവിനെക്കുറിച്ച് പഠിക്കാൻ തിരികെ പോകണമെന്നാണ് അദ്ദേഹത്തിന്റെ ആവശ്യം.

Also Read: കുളിക്കുമ്പോൾ പൊക്കിൾ കഴുകാറുണ്ടോ? രഹസ്യ ശത്രു അവിടെ ഒളിഞ്ഞിരുപ്പുണ്ട്; അവഗണിച്ചാൽ പണി കിട്ടും!

നികുതിദായകരുടെ പണം ഉപയോഗിച്ച് പ്രവർത്തിക്കുന്ന നാസ, ചൊവ്വയിലെ സാധാരണ പഠനങ്ങളേക്കാൾ ഇത്തരം നിഗൂഢതകൾ അനാവരണം ചെയ്യാനാണ് മുൻഗണന നൽകേണ്ടതെന്ന് ലോബ് തന്റെ ബ്ലോഗിലൂടെ വ്യക്തമാക്കി. എന്നാൽ, ശാസ്ത്രലോകത്തെ ഭൂരിഭാഗവും ഇതിന് ലളിതമായ ചില വിശദീകരണങ്ങളാണ് നൽകുന്നത്. 2012-ൽ റോവർ ചൊവ്വയിലിറങ്ങിയപ്പോൾ ഉപയോഗിച്ച സ്കൈ ക്രെയിൻ, ഹീറ്റ് ഷീൽഡ് അല്ലെങ്കിൽ പാരഷൂട്ട് എന്നിവയുടെ ഏതെങ്കിലും ഭാഗമാകാം ഇതെന്നാണ് പ്രാഥമിക നിഗമനം. കൂടാതെ, കഴിഞ്ഞ 12 വർഷമായി ചൊവ്വയിലൂടെ സഞ്ചരിക്കുന്ന റോവറിന്റെ തന്നെ ഏതെങ്കിലും യന്ത്രഭാഗങ്ങൾ അടർന്നു വീണതാകാനുള്ള സാധ്യതയും തള്ളിക്കളയാനാവില്ല.

അതേസമയം, റോവറിനെ എട്ട് കിലോമീറ്റർ പിന്നിലേക്ക് കൊണ്ടുപോകുന്നത് സാങ്കേതികമായി വലിയ വെല്ലുവിളിയാണെന്ന് നാസ വൃത്തങ്ങൾ സൂചിപ്പിക്കുന്നു. റോവറിന്റെ ഓരോ നീക്കവും വർഷങ്ങൾക്ക് മുൻപേ ആസൂത്രണം ചെയ്യുന്നതാണെന്നിരിക്കെ, ഒരു വിചിത്ര വസ്തുവിനെ കാണാൻ വേണ്ടി മാത്രം പാത മാറ്റുന്നത് പ്രായോഗികമല്ലെന്നാണ് നാസയുടെ നിലപാട്. എന്നാൽ, മനുഷ്യചരിത്രത്തെ തന്നെ മാറ്റിമറിക്കാൻ പോകുന്ന ഒരു കണ്ടെത്തലാണ് അവിടെ ഒളിഞ്ഞിരിക്കുന്നതെങ്കിലോ എന്ന ചോദ്യം ലോബ് ഉയർത്തുന്നു. ഈ സിലിണ്ടർ കേവലം ഒരു മനുഷ്യനിർമിത മാലിന്യമാണോ അതോ അന്യഗ്രഹ ജീവന്റെ തെളിവാണോ എന്നറിയാൻ നാസയുടെ ഔദ്യോഗിക പ്രതികരണത്തിനായി കാത്തിരിക്കുകയാണ് ലോകം.

NB: ഈ വാർത്തയിൽ ഉപയോഗിച്ചിരിക്കുന്ന ചിത്രം പ്രതീകാത്മകമാണ്. (Generated by AI)

The post രഹസ്യങ്ങൾ ഒളിപ്പിച്ച് ആ സിലിണ്ടർ രൂപം; നാസയുടെ ക്യൂരിയോസിറ്റിക്ക് മുന്നിൽ പുതിയ വെല്ലുവിളി appeared first on Express Kerala.