രാം ചരണിന്റെ മാസ് അവതാരം; ആവേശം ജനിപ്പിച്ച് ‘പെദ്ധി’യുടെ പുത്തൻ ഗ്ലിമ്പ്‌സ് വീഡിയോ പുറത്ത്

തെലുങ്ക് സൂപ്പർതാരം രാം ചരണിനെ നായകനാക്കി ബുചി ബാബു സന സംവിധാനം ചെയ്യുന്ന പാൻ ഇന്ത്യൻ ചിത്രം ‘പെദ്ധി’യുടെ പുത്തൻ ഗ്ലിമ്പ്‌സ് വീഡിയോ പുറത്തിറങ്ങി. രാം ചരണിന്റെ ജന്മദിനത്തോടനുബന്ധിച്ചാണ് ‘പെദ്ധി പെഹൽവാൻ’ എന്ന പേരിൽ താരത്തിന്റെ മാസ് പ്രകടനം ഉൾക്കൊള്ളുന്ന വീഡിയോ അണിയറപ്രവർത്തകർ പുറത്തുവിട്ടത്. ഗുസ്തിയുടെ പശ്ചാത്തലത്തിൽ ഒരുങ്ങുന്ന ചിത്രത്തിനായി രാം ചരൺ നടത്തിയ വമ്പൻ ശാരീരിക മാറ്റങ്ങളാണ് വീഡിയോയിലെ പ്രധാന ആകർഷണം. കയ്യിൽ ഗദയുമേന്തി എതിരാളികളെ നിലംപരിശാക്കുന്ന രാം ചരണിന്റെ ആക്ഷൻ രംഗങ്ങളും “ജയിക്കാൻ വേണ്ടി മാത്രമാണ് താൻ കളിക്കുന്നത്” എന്ന പവർഫുൾ ഡയലോഗും ആരാധകർക്കിടയിൽ തരംഗമായിക്കഴിഞ്ഞു.

ദേശീയ അവാർഡ് ജേതാവ് ബുചി ബാബു സന ഒരുക്കുന്ന ഈ ബിഗ് ബഡ്ജറ്റ് ചിത്രം വൃദ്ധി സിനിമാസിന്റെ ബാനറിൽ വെങ്കട സതീഷ് കിലാരു ആണ് നിർമ്മിക്കുന്നത്. ബോളിവുഡ് താരം ജാൻവി കപൂർ നായികയാകുന്ന ചിത്രത്തിൽ കന്നഡ സൂപ്പർതാരം ശിവരാജ് കുമാർ ഒരു നിർണ്ണായക വേഷത്തിൽ എത്തുന്നു എന്ന പ്രത്യേകതയുമുണ്ട്. ഇതാദ്യമായാണ് രാം ചരണും ശിവരാജ് കുമാറും ഒരു സിനിമയ്ക്കായി ഒന്നിക്കുന്നത്. ഇവരെക്കൂടാതെ ദിവ്യേന്ദു ശർമ്മ, ജഗപതി ബാബു, ബോമൻ ഇറാനി തുടങ്ങിയ വമ്പൻ താരനിരയും ചിത്രത്തിന്റെ ഭാഗമാണ്. മൈത്രി മൂവി മേക്കർസും സുകുമാർ റൈറ്റിങ്‌സും ചേർന്നാണ് ചിത്രം അവതരിപ്പിക്കുന്നത്.

Also Read: സേതുരാമയ്യർ വീണ്ടും വരുന്നു; സിബിഐ ആറാം ഭാഗം ഉടനെന്ന് കെ. മധു

സംഗീത മാന്ത്രികൻ എ.ആർ. റഹ്മാൻ ഈണം നൽകിയ ചിത്രത്തിലെ ഗാനങ്ങൾ ഇതിനോടകം തന്നെ ആഗോളതലത്തിൽ സൂപ്പർ ഹിറ്റുകളായി മാറിയിട്ടുണ്ട്. ‘ചികിരി ചികിരി’, ‘റായ് റായ് രാ രാ’ എന്നീ ഗാനങ്ങൾക്ക് ലഭിച്ച അസാധാരണമായ പ്രേക്ഷക പ്രതികരണം സിനിമയുടെ ഹൈപ്പിന് ആക്കം കൂട്ടി. 2026 ഏപ്രിൽ 30-ന് ചിത്രം ലോകമെമ്പാടുമുള്ള തീയേറ്ററുകളിൽ പ്രദർശനത്തിന് എത്തും. നേരത്തെ പുറത്തിറങ്ങിയ ഫസ്റ്റ് ലുക്കും ടൈറ്റിൽ ഗ്ലിമ്പ്‌സും നൽകിയ ആവേശം പുതിയ വീഡിയോയിലൂടെ ഇരട്ടിയായിരിക്കുകയാണ്.

The post രാം ചരണിന്റെ മാസ് അവതാരം; ആവേശം ജനിപ്പിച്ച് ‘പെദ്ധി’യുടെ പുത്തൻ ഗ്ലിമ്പ്‌സ് വീഡിയോ പുറത്ത് appeared first on Express Kerala.