‘പ്ലൂട്ടോ’ സെക്കൻഡ് ലുക്ക് പോസ്റ്റർ പുറത്ത്

നീരജ് മാധവിനെ നായകനാക്കി ആദിത്യൻ ചന്ദ്രശേഖർ സംവിധാനം ചെയ്യുന്ന ‘പ്ലൂട്ടോ’ എന്ന ചിത്രത്തിന്റെ കൗതുകമുണർത്തുന്ന രണ്ടാമത്തെ പോസ്റ്റർ പുറത്തിറങ്ങി. വിക്രമാദിത്യനും വേതാളവും എന്ന ഐതിഹ്യത്തെ ഓർമ്മിപ്പിക്കുന്ന വിധത്തിൽ ഒരാൾ മറ്റൊരാളുടെ പുറത്തിരിക്കുന്ന പോസ്റ്റർ ഇതിനോടകം സോഷ്യൽ മീഡിയയിൽ തരംഗമായിക്കഴിഞ്ഞു. ഏപ്രിൽ 12-ന് സിംഗപ്പൂരിൽ വെച്ച് ചിത്രത്തിന്റെ ടീസർ റിലീസ് ചെയ്യാനിരിക്കെയാണ് അണിയറപ്രവർത്തകർ ഈ പുതിയ പോസ്റ്റർ പങ്കുവെച്ചിരിക്കുന്നത്.

മലയാള സിനിമയിൽ അധികം പരീക്ഷിക്കപ്പെടാത്ത ‘ഏലിയൻ കോമഡി’ എന്ന വിഭാഗത്തിലാണ് ഈ ചിത്രം ഒരുങ്ങുന്നത്. മനുഷ്യലോകത്തേക്ക് അബദ്ധത്തിൽ എത്തുന്ന ഒരു ഏലിയനും അതിനെത്തുടർന്നുണ്ടാകുന്ന രസകരമായ സംഭവങ്ങളുമാണ് ചിത്രത്തിന്റെ ഇതിവൃത്തമെന്നാണ് സൂചന. ചിത്രത്തിലെ പ്രധാന ആകർഷണമായ ഏലിയൻ കഥാപാത്രമായി എത്തുന്നത് അൽത്താഫ് സലീമാണ്. ‘എങ്കിലും ചന്ദ്രികേ’ എന്ന ചിത്രത്തിന് ശേഷം ആദിത്യൻ ചന്ദ്രശേഖർ സംവിധാനം ചെയ്യുന്ന രണ്ടാമത്തെ ചിത്രമാണിത്.

Also Read: ‘സിനിമയാണെങ്കിലും അല്ലെങ്കിലും അപ്പ ഈസ് മൈ ഹീറോ’; ‘പ്രതിച്ഛായ’ കണ്ട് ചാണ്ടി ഉമ്മൻ

ഓർക്കിഡ് ഫിലിംസ് ഇന്റർനാഷണലിന്റെ ബാനറിൽ രെജു കുമാർ, രശ്മി രെജു എന്നിവർ ചേർന്ന് നിർമ്മിക്കുന്ന ചിത്രത്തിൽ അജു വർഗ്ഗീസ്, അർഷ ബൈജു തുടങ്ങിയ വൻ താരനിര അണിനിരക്കുന്നുണ്ട്. ഒരു കംപ്ലീറ്റ് ഫൺ എന്റർടെയ്‌നർ ആയിരിക്കും പ്ലൂട്ടോ എന്ന് ഉറപ്പുനൽകുന്നതാണ് ഇതുവരെ പുറത്തുവന്ന പോസ്റ്ററുകൾ. മലയാളത്തിലെ ആദ്യകാല ഏലിയൻ ചിത്രങ്ങളിൽ ഒന്നായതിനാൽ സിനിമാപ്രേമികൾ വലിയ പ്രതീക്ഷയോടെയാണ് ഈ ചിത്രത്തിനായി കാത്തിരിക്കുന്നത്.

The post ‘പ്ലൂട്ടോ’ സെക്കൻഡ് ലുക്ക് പോസ്റ്റർ പുറത്ത് appeared first on Express Kerala.