ഐപിഎല്ലിൽ കൊൽക്കത്ത നൈറ്റ് റൈഡേഴ്സിനെ അവരുടെ സ്വന്തം തട്ടകമായ ഈഡൻ ഗാർഡൻസിൽ വെച്ച് സൺറൈസേഴ്സ് ഹൈദരാബാദ് തകർത്തു. 65 റൺസിനാണ് ഹൈദരാബാദ് കൊൽക്കത്തയെ പരാജയപ്പെടുത്തിയത്. ഈ സീസണിലെ ഹൈദരാബാദിന്റെ ആദ്യ വിജയമാണിത്. ആദ്യം ബാറ്റ് ചെയ്ത ഹൈദരാബാദ് നിശ്ചിത 20 ഓവറിൽ 8 വിക്കറ്റ് നഷ്ടത്തിൽ 226 റൺസെന്ന കൂറ്റൻ സ്കോർ പടുത്തുയർത്തി. മറുപടി ബാറ്റിംഗിനിറങ്ങിയ കൊൽക്കത്തയ്ക്ക് 16 ഓവറിൽ 161 റൺസിന് എല്ലാവരെയും നഷ്ടമായി.
ഹൈദരാബാദ് ഉയർത്തിയ 227 റൺസ് വിജയലക്ഷ്യത്തിലേക്ക് ബാറ്റുവീശിയ കൊൽക്കത്തയ്ക്ക് വേണ്ടി ഓപ്പണർ ഫിൻ അലൻ വെടിക്കെട്ട് തുടക്കമാണ് നൽകിയത്. നേരിട്ട ഏഴ് പന്തിൽ നിന്ന് 28 റൺസ് അടിച്ച അലൻ പുറത്തായതോടെ കൊൽക്കത്തയുടെ തകർച്ചയും തുടങ്ങി. അംഗ്രിഷ് രഘുവംശി (29 പന്തിൽ 52), റിങ്കു സിംഗ് (25 പന്തിൽ 35) എന്നിവർ പൊരുതിയെങ്കിലും ടീമിനെ വിജയത്തിലെത്തിക്കാൻ അത് മതിയാകുമായിരുന്നില്ല. അജിങ്ക്യാ രഹാനെ, കാമറൂൺ ഗ്രീൻ തുടങ്ങിയ പ്രമുഖ താരങ്ങൾ നിരാശപ്പെടുത്തിയതും ടീമിന് തിരിച്ചടിയായി. ഹൈദരാബാദിന് വേണ്ടി ജയ്ദേവ് ഉനദ്ഘട്ട് മൂന്ന് വിക്കറ്റും നിതീഷ് കുമാർ റെഡ്ഡി, ഇഷാൻ മലിംഗ എന്നിവർ രണ്ട് വിക്കറ്റ് വീതവും വീഴ്ത്തി.
Also Read:പന്തിന് തിരിച്ചുവരാൻ 48 പന്തിൽ സെഞ്ച്വറി അടിക്കണം; ഉപദേശവുമായി മൈക്കൽ വോൺ
നേരത്തെ ടോസ് നഷ്ടപ്പെട്ട് ബാറ്റിംഗിനിറങ്ങിയ ഹൈദരാബാദിന് വേണ്ടി ഹെൻറിച്ച് ക്ലാസൻ (52), അഭിഷേക് ശർമ (48), ട്രാവിസ് ഹെഡ് (46) എന്നിവർ മികച്ച പ്രകടനം പുറത്തെടുത്തു. കൊൽക്കത്ത ബൗളിംഗ് നിരയിൽ ബ്ലെസിംഗ് മുസറബാനി നാല് വിക്കറ്റുകൾ വീഴ്ത്തി മികച്ച പോരാട്ടം കാഴ്ചവെച്ചെങ്കിലും ഹൈദരാബാദിന്റെ കൂറ്റൻ സ്കോർ തടയാനായില്ല. വൈഭവ് അറോറ രണ്ട് വിക്കറ്റുകൾ സ്വന്തമാക്കി. കൊൽക്കത്തയെ സംബന്ധിച്ചിടത്തോളം ലീഗിലെ തുടർച്ചയായ രണ്ടാം തോൽവിയാണിത്.
The post ഈഡൻ ഗാർഡൻസിൽ ഹൈദരാബാദിന് തകർപ്പൻ ജയം; കൊൽക്കത്ത നൈറ്റ് റൈഡേഴ്സിന് തുടർച്ചയായ രണ്ടാം തോൽവി appeared first on Express Kerala.
