ബോളിവുഡിൽ തഴയപ്പെട്ടു; ഒടുവിൽ പാൻ-ഇന്ത്യൻ സ്റ്റാറായി വാമിക ഗബ്ബയുടെ അത്ഭുതപ്പെടുത്തുന്ന തിരിച്ചുവരവ്!

ബേസിൽ ജോസഫ് സംവിധാനം ചെയ്ത് ടൊവിനോ തോമസ് നായകനായ ‘ഗോദ’ എന്ന ചിത്രത്തിലൂടെയാണ് വാമിക മലയാളികളുടെ ശ്രദ്ധപിടിച്ചുപറ്റുന്നത്. ചിത്രത്തിൽ ഗുസ്തിക്കാരിയായ അഥിതി സിങ് എന്ന ശക്തമായ കഥാപാത്രത്തെ അവതരിപ്പിക്കുന്നതിനായി അമൃത്സറിൽ പോയി പ്രത്യേക പരിശീലനം നേടിയ താരം, ചിത്രത്തിലെ ആക്ഷൻ രംഗങ്ങളിലും അഭിനയമികവിലും ഒരുപോലെ തിളങ്ങി. തനിക്ക് ലഭിച്ച കഥാപാത്രത്തിനായി ഭാഷ പോലും അറിയാതെ രാത്രി ഉറക്കമിളച്ചിരുന്ന് ഡയലോഗുകൾ പഠിച്ച വാമികയുടെ ആത്മാർത്ഥത അണിയറപ്രവർത്തകരെപ്പോലും അദ്ഭുതപ്പെടുത്തിയിരുന്നു.

കരീനാ കപൂറിന്റെ അനുജതിയായി ‘ജബ് വി മെറ്റ്’ എന്ന ഹിന്ദി ചിത്രത്തിലൂടെ പതിമൂന്നാം വയസ്സിൽ അഭിനയരംഗത്തെത്തിയെങ്കിലും, ഗോഡ്ഫാദർമാരില്ലാതെ ബോളിവുഡിൽ പിടിച്ചുനിൽക്കാൻ വാമികയ്ക്ക് ഏറെ ബുദ്ധിമുട്ടേണ്ടിവന്നു. തുടക്കകാലത്ത് ചെറിയ വേഷങ്ങളിലും കുറഞ്ഞ പ്രതിഫലത്തിലുമൊക്കെ അഭിനയിക്കേണ്ടി വന്നതോടൊപ്പം അവസരങ്ങൾ തേടിയുള്ള യാത്രകളിൽ അപമാനങ്ങളും പരിഹാസങ്ങളും നേരിടേണ്ടി വന്നു. ബോളിവുഡിൽ തന്റെ ഭാവി ശോഭനമല്ലെന്ന് തിരിച്ചറിഞ്ഞ താരം പിന്നീട് പഞ്ചാബി, തെലുങ്ക്, തമിഴ് സിനിമകളിലേക്ക് തന്റെ കളം മാറ്റുകയായിരുന്നു.

പഞ്ചാബി സിനിമകളിലൂടെ ഭാഗ്യം പരീക്ഷിച്ച വാമിക വിജയങ്ങളും പരാജയങ്ങളും മാറിമറിഞ്ഞ ആ പാതയിലൂടെ മുന്നേറി. ഇതിനിടയിൽ ‘ഭലേ മാഞ്ചി റോജു’ എന്ന തെലുങ്ക് ചിത്രവും ‘മാലൈ നേരത്തു മയക്കം’ എന്ന തമിഴ് ചിത്രവും വഴിത്തിരിവായി. കരിയറിൽ ഒതുങ്ങിപ്പോകുമായിരുന്ന ഒരു ഘട്ടത്തിൽ നിന്നും നിരന്തരമായ പരിശ്രമം കൊണ്ടാണ് താരം തന്റെ അഭിനയശേഷി തെളിയിച്ചത്.

Also Read:ബാഹുബലി യുഗം കഴിഞ്ഞു; പ്രഭാസിന്റെ പുതിയ ലുക്ക് തരംഗമാകുന്നു!

പീര്യഡ് സിനിമയായ ‘ജൂബിലി’യിലെ നിലൂഫർ എന്ന കഥാപാത്രത്തിലൂടെ ഹിന്ദിയിൽ ശക്തമായ തിരിച്ചുവരവ് നടത്തിയ വാമിക, പിന്നീട് ‘ഖുഫിയ’ അടക്കമുള്ള ചിത്രങ്ങളിലൂടെയും വെബ് സീരീസുകളിലൂടെയും ശ്രദ്ധിക്കപ്പെട്ടു. പ്രാദേശിക സിനിമകളിൽ എത്ര തിളങ്ങിയാലും ദേശീയ ശ്രദ്ധ നേടാൻ ബോളിവുഡ് തന്നെ വേണമെന്ന തിരിച്ചറിവിലാണ് താരം ഹിന്ദിയിൽ വീണ്ടും സജീവമായത്. ഇതിനിടയിൽ ലോകേഷ് കനകരാജിന്റെ ചിത്രത്തിലും താരം ഗംഭീര പ്രകടനം കാഴ്ചവച്ചു.

ഉത്തരേന്ത്യയിലും ദക്ഷിണേന്ത്യയിലും ഒരുപോലെ താരമൂല്യമുളള നായികയായി ഉയർന്ന വാമിക, ഇപ്പോൾ ആസിഫ് അലിയുടെ നായികയായി ‘ടിക്കി ടാക്ക’ എന്ന ചിത്രത്തിലൂടെ വീണ്ടും മലയാളത്തിലേക്ക് എത്താൻ ഒരുങ്ങുകയാണ്. ജീവിതത്തിൽ മുൻകൂട്ടി പ്ലാൻ ചെയ്യുന്ന ശീലമില്ലെന്നും കിട്ടുന്ന അവസരങ്ങൾ ആത്മാർത്ഥമായി ചെയ്യുക എന്നതാണ് വിജയത്തിന്റെ അടിസ്ഥാനമെന്നും വിശ്വസിക്കുന്ന വാമികയുടെ സിനിമാജീവിതം നിശ്ചയദാർഢ്യത്തിന്റെ മികച്ച ഉദാഹരണമാണ്.

The post ബോളിവുഡിൽ തഴയപ്പെട്ടു; ഒടുവിൽ പാൻ-ഇന്ത്യൻ സ്റ്റാറായി വാമിക ഗബ്ബയുടെ അത്ഭുതപ്പെടുത്തുന്ന തിരിച്ചുവരവ്! appeared first on Express Kerala.