സലാലയുടെ ആകാശക്കാഴ്ചകളിൽ പുതിയ വിസ്മയം; ‘സലാല ഐ’ സഞ്ചാരികൾക്കായി തുറന്നു നൽകി

ഒമാനിലെ ഖരീഫ് സീസൺ ആസ്വദിക്കാനെത്തുന്ന സഞ്ചാരികൾക്ക് സമാനതകളില്ലാത്ത ദൃശ്യവിരുന്നൊരുക്കിക്കൊണ്ട് പുതിയ ഭീമൻ ചക്രം യാഥാർത്ഥ്യമായി. ദുബായിലെയും ലണ്ടനിലെയും പ്രശസ്തമായ നിരീക്ഷണ ചക്രങ്ങളുടെ മാതൃകയിൽ നിർമ്മിച്ച ‘സലാല ഐ’ അൽ ഹാഫ ബീച്ചിൽ ഔദ്യോഗികമായി പൊതുജനങ്ങൾക്കായി തുറന്നു. സലാല നഗരത്തിന്റെയും അറബിക്കടലിന്റെയും 360 ഡിഗ്രി ആകാശക്കാഴ്ചയാണ് ഈ പുതിയ ടൂറിസം കേന്ദ്രം സന്ദർശകർക്ക് സമ്മാനിക്കുന്നത്.

സലാല സിറ്റി സെന്ററിൽ നിന്ന് കാർ മാർഗ്ഗം എട്ട് മിനിറ്റും സലാല രാജ്യാന്തര വിമാനത്താവളത്തിൽ നിന്ന് 12 കിലോമീറ്റർ ദൂരത്തിലും സ്ഥിതി ചെയ്യുന്ന ഈ കൂറ്റൻ ചക്രത്തിന് 55 മീറ്റർ ഉയരമുണ്ട്. അൽ സൂറൂഹ് ഗ്രൂപ്പാണ് ഇതിന്റെ നിർമ്മാണത്തിന് പിന്നിൽ. ഖരീഫ് സീസൺ അവസാനിക്കുന്ന സെപ്റ്റംബർ 21 വരെ ദിവസവും രാവിലെ 10 മണി മുതൽ രാത്രി 11 മണി വരെ ഇത് പ്രവർത്തിക്കും.

Also Read: മുന്നറിയിപ്പുകൾ അവഗണിച്ചു, ഒടുവിൽ കർശന നടപടി; ഭക്ഷ്യസുരക്ഷാ വീഴ്ചകളെ തുടർന്ന് അബുദാബിയിൽ ‘ദി ലസ്സി ഷോപ്പ്’ അടപ്പിച്ചു

കാലാവസ്ഥ വ്യതിയാനങ്ങളെ പ്രതിരോധിക്കാൻ തക്കവണ്ണം പൂർണ്ണമായും ശീതികരിച്ച 30 കാബിനുകളാണ് സലാല ഐയിലുള്ളത്. ഇതിനുള്ളിൽ കുന്തിരിക്കത്തിന്റെ മനോഹരമായ സുഗന്ധവും ഒരുക്കിയിട്ടുണ്ട്. ഒരേസമയം 180 പേർക്ക് പ്രവേശനം ലഭിക്കുന്ന ഇവിടെ ഒരു റൊട്ടേഷന് 8 മുതൽ 12 മിനിറ്റ് വരെയാണ് സമയമെടുക്കുന്നത്. ഒരു കാബിനിൽ പരമാവധി ആറ് പേർക്ക് യാത്ര ചെയ്യാം. ഭിന്നശേഷിക്കാർക്കായുള്ള പ്രത്യേക സൗകര്യങ്ങളും ഇവിടെ സജ്ജീകരിച്ചിട്ടുണ്ട്.

ഒരാൾക്ക് 7 ഒമാനി റിയാലാണ് സാധാരണ ടിക്കറ്റ് നിരക്ക്. ആറ് പേർക്ക് സഞ്ചരിക്കാവുന്ന ഫാമിലി കാബിന് 28 ഒമാനി റിയാലുമാണ് നിരക്ക്. ഔദ്യോഗിക വെബ്‌സൈറ്റായ salalaheye.om വഴിയോ നേരിട്ടോ ടിക്കറ്റുകൾ ബുക്ക് ചെയ്യാം. ജന്മദിനാഘോഷങ്ങൾക്കും പ്രൊപ്പോസലുകൾക്കുമായി പ്രത്യേക കാബിനുകൾ മുൻകൂട്ടി റിസർവ് ചെയ്യാനും സൗകര്യമുണ്ട്.

The post സലാലയുടെ ആകാശക്കാഴ്ചകളിൽ പുതിയ വിസ്മയം; ‘സലാല ഐ’ സഞ്ചാരികൾക്കായി തുറന്നു നൽകി appeared first on Express Kerala.