വെറ്ററിനറി ബി.വി.എസ്‌സി. പ്രവേശനം; ഒന്നാം റൗണ്ട് അഖിലേന്ത്യാ ക്വാട്ട രജിസ്ട്രേഷൻ ഓഗസ്റ്റ് 18 മുതൽ

വെറ്ററിനറി കൗൺസിൽ ഓഫ് ഇന്ത്യയുടെ ബി.വി.എസ്‌സി. ആൻഡ് എ.എച്ച്. കോഴ്സുകളിലേക്കുള്ള 15 ശതമാനം അഖിലേന്ത്യാ ക്വാട്ട അലോട്ട്മെന്റ് പ്രക്രിയയുടെ നിബന്ധനകളും സമയക്രമവും ഔദ്യോഗികമായി പ്രസിദ്ധീകരിച്ചു. ഇതിന്റെ ഭാഗമായുള്ള ഒന്നാം റൗണ്ട് ഓൺലൈൻ രജിസ്ട്രേഷൻ ഓഗസ്റ്റ് 18-ന് ആരംഭിക്കും. ഒരു വർഷത്തെ നിർബന്ധിത ഇന്റേൺഷിപ്പ് ഉൾപ്പെടെ അഞ്ചര വർഷമാണ് കോഴ്സിന്റെ കാലാവധി.

രാജ്യത്തെ വിവിധ സംസ്ഥാനങ്ങളിലായി സർക്കാർ, സ്വകാര്യ സ്ഥാപനങ്ങളുടെ കീഴിലുള്ള 858 സീറ്റുകളാണ് 15 ശതമാനം അഖിലേന്ത്യാ ക്വാട്ടയിൽ കൗൺസലിങ്ങിനായി ഉൾപ്പെടുത്തിയിട്ടുള്ളത്. നീറ്റ് യു.ജി. റാങ്ക് പട്ടികയിലുള്ള എല്ലാ വിദ്യാർത്ഥികൾക്കും സംവരണ വ്യവസ്ഥകൾക്ക് വിധേയമായി ഈ സീറ്റുകളിലേക്ക് പങ്കെടുക്കാവുന്നതാണ്.

Also Read:യു.പി.ടി.ഇ.ടി 2026 ഫലം ഉടൻ പുറത്തുവരും; 17 ലക്ഷത്തിലധികം ഉദ്യോഗാർത്ഥികൾ കാത്തിരിപ്പിൽ

സംവരണ തത്ത്വം

കേന്ദ്ര സർക്കാരിന്റെ സംവരണ തത്ത്വങ്ങൾ പൂർണ്ണമായും പാലിച്ചായിരിക്കും അലോട്ട്മെന്റ് നടപ്പിലാക്കുന്നത്.

ഒ.ബി.സി. (നോൺ ക്രീമിലെയർ): 27%

എസ്.സി.: 15%

എസ്.ടി.: 7.5%

ഇക്കണോമിക്കലി വീക്കർ സെക്ഷൻ (EWS): 10%

ഭിന്നശേഷി വിഭാഗം (എല്ലാ വിഭാഗങ്ങളിലും കൂടി): 5%

ഓൺലൈൻ രജിസ്ട്രേഷൻ വിവരങ്ങൾ

താല്പര്യമുള്ള ഉദ്യോഗാർത്ഥികൾ vci.admissions.nic.in എന്ന ഔദ്യോഗിക വെബ്‌സൈറ്റ് വഴി യൂസർ ഐ.ഡി.യും പാസ്‌വേഡും നിർമ്മിച്ച് രജിസ്റ്റർ ചെയ്യണം. തുടർന്ന് തിരിച്ചുലഭിക്കാത്ത രജിസ്ട്രേഷൻ ഫീസ് ഓൺലൈനായി അടച്ചശേഷം കോളേജുകളുടെ ചോയ്‌സ് ഫില്ലിങ് നടത്താവുന്നതാണ്.

ഒന്നാം റൗണ്ട് ഓൺലൈൻ രജിസ്ട്രേഷനും ഫീസ് അടയ്ക്കുന്നതിനുമുള്ള അവസാന തീയതി ഓഗസ്റ്റ് 23 രാത്രി 11.55 വരെയാണ് (ആരംഭം: ഓഗസ്റ്റ് 18 രാവിലെ 11 മണി).