പരീക്ഷാ അട്ടിമറിക്കെതിരെ 800 നഗരങ്ങളിൽ പ്രക്ഷോഭം; ‘ഛാത്രോം കി ഗൂഞ്ച്’ വ്യാപിപ്പിക്കാൻ കോൺഗ്രസ് | Congress Chhatron Ki Goonj

ന്യുഡൽഹി : പരീക്ഷാ ക്രമക്കേടുകളും ചോദ്യപേപ്പർ ചോർച്ചയും ഉൾപ്പെടെയുള്ള വിഷയങ്ങൾ ഉയർത്തിക്കാട്ടി രാജ്യവ്യാപക പ്രക്ഷോഭം ശക്തമാക്കാൻ കോൺഗ്രസ് തീരുമാനം. ‘ഛാത്രോം കി ഗൂഞ്ച്’ (Congress Chhatron Ki Goonj) പ്രചാരണം രാജ്യത്തെ 800 നഗരങ്ങളിലേക്ക് വ്യാപിപ്പിക്കാനാണ് കോൺഗ്രസ് പ്രവർത്തക സമിതി തീരുമാനിച്ചത്. പ്രധാന നഗരങ്ങളിൽ നടക്കുന്ന പരിപാടികളിൽ രാഹുൽ ഗാന്ധി നേരിട്ട് പങ്കെടുക്കും.

സംസ്ഥാന തലത്തിലും മണ്ഡല അടിസ്ഥാനത്തിലും നടക്കുന്ന പ്രചാരണങ്ങൾക്ക് അതത് സംസ്ഥാനങ്ങളിലെ കോൺഗ്രസ് നേതാക്കൾ നേതൃത്വം നൽകും. വിദ്യാർഥികളുമായി ബന്ധപ്പെട്ട പ്രശ്നങ്ങൾ പൊതുസമൂഹത്തിന്റെ ശ്രദ്ധയിൽ കൊണ്ടുവരുന്നതിനൊപ്പം വിദ്യാഭ്യാസ-പരീക്ഷാ സംവിധാനങ്ങളിലെ പരിഷ്കാരങ്ങൾക്കായുള്ള നിർദേശങ്ങളും പ്രചാരണത്തിന്റെ ഭാഗമായി രൂപപ്പെടുത്തും.

അതേസമയം, കോൺഗ്രസ് ഭരിക്കുന്ന നാല് സംസ്ഥാനങ്ങളായ തെലങ്കാന, കേരളം, കർണാടക, ഹിമാചൽ പ്രദേശ് എന്നിവിടങ്ങളിലെ മുഖ്യമന്ത്രിമാർക്ക് കോൺഗ്രസ് പ്രവർത്തക സമിതി പ്രത്യേക നിർദേശം നൽകി. സംസ്ഥാനങ്ങളുടെ ആവശ്യങ്ങൾക്കനുസരിച്ച് വിദ്യാഭ്യാസ പരിഷ്കരണത്തിനുള്ള വ്യക്തമായ പദ്ധതി തയ്യാറാക്കുന്നതിനായി വിദ്യാഭ്യാസ വിദഗ്ധർ, വിദ്യാർഥി സംഘടനകൾ, ബന്ധപ്പെട്ട മറ്റ് വിഭാഗങ്ങൾ എന്നിവരുമായി ഒരു മാസം നീണ്ട ചർച്ച നടത്തണമെന്നാണ് നിർദേശം.

വിദ്യാഭ്യാസ, പരീക്ഷാ സംവിധാനങ്ങളിൽ നടപ്പാക്കേണ്ട പരിഷ്കാരങ്ങളെക്കുറിച്ചുള്ള വിശദമായ റിപ്പോർട്ട് അടുത്ത ഒരു മാസത്തിനുള്ളിൽ കോൺഗ്രസ് അധ്യക്ഷന് സമർപ്പിക്കണമെന്നും നാല് മുഖ്യമന്ത്രിമാരോട് നിർദേശിച്ചിട്ടുണ്ട്. രാഹുൽ ഗാന്ധിയും മല്ലികാർജുൻ ഖാർഗെയും ഇതുസംബന്ധിച്ച നിർദേശം നൽകിയതായി റിപ്പോർട്ടിൽ പറയുന്നു.

പ്രചാരണത്തിന്റെ നാലാം ഘട്ടം ഈ മാസം 22-ന് പൂനെയിൽ നടക്കും. രാജ്യത്തെ വിവിധ പരീക്ഷകളുമായി ബന്ധപ്പെട്ട ചോദ്യപേപ്പർ ചോർച്ചയും പരീക്ഷാ ക്രമക്കേടുകളുമാണ് കോൺഗ്രസ് ഉയർത്തുന്ന പ്രധാന വിഷയങ്ങളിലൊന്ന്.

വിദ്യാഭ്യാസ-പരീക്ഷാ വിഷയങ്ങളിൽ കേന്ദ്ര സർക്കാർ പ്രതിരോധത്തിലാണെന്നും വിദ്യാർഥി പ്രതിഷേധങ്ങൾ ഫലപ്രദമായി കൈകാര്യം ചെയ്യുന്നതിൽ സർക്കാർ പൂർണമായും പരാജയപ്പെട്ടുവെന്നും കോൺഗ്രസ് പ്രവർത്തക സമിതി യോഗത്തിൽ വിമർശനം ഉയർന്നു.

അതേസമയം, വന്ദേമാതരം സംബന്ധിച്ച പാർട്ടിയുടെ മുൻ നിലപാടിൽ മാറ്റമില്ലെന്നും കോൺഗ്രസ് വ്യക്തമാക്കി. പാർട്ടി ആസ്ഥാനത്ത് ഉണ്ടായത് ആശയവിനിമയത്തിലെ പിഴവാണെന്നാണ് നേതൃത്വത്തിന്റെ വിശദീകരണം. വന്ദേമാതരത്തിന്റെ ആദ്യ രണ്ട് ചരണങ്ങൾ ആലപിച്ചാൽ മതിയെന്ന മുൻ നിലപാട് തുടരുമെന്നും പാർട്ടി തീരുമാനിച്ചു.

സ്വാതന്ത്ര്യദിനത്തിൽ എഐസിസി ആസ്ഥാനത്ത് വന്ദേമാതരം മുഴുവനായും ആലപിച്ചതിനെ തുടർന്ന് വിവാദം ഉയർന്ന സാഹചര്യത്തിലാണ് കോൺഗ്രസ് നിലപാട് വ്യക്തമാക്കിയത്.

Story Summary: The Congress Working Committee has decided to expand its ‘Chhatron Ki Goonj’ campaign against exam irregularities and paper leaks to 800 cities across India, with Rahul Gandhi participating in major events. The party has also asked its four state governments to prepare education reform plans after consultations with experts and student groups.