റെക്കോർഡുകൾ ഭേദിച്ച് സ്വർണവില കുതിക്കുന്നു; വില 1,16,800 രൂപയിലെത്തി

സംസ്ഥാനത്ത് സ്വർണവിലയിൽ വമ്പൻ കുതിപ്പാണ് ഉണ്ടായിരിക്കുന്നത്. ഈ മാസത്തെ ഏറ്റവും ഉയർന്ന നിരക്കിലെത്തിയ സ്വർണവില പവന് ഒറ്റയടിക്ക് 3,160 രൂപ വർധിച്ച് 1,16,800 രൂപയായി. ഗ്രാമിന് 395 രൂപയുടെ മുന്നേറ്റത്തോടെ 14,600 രൂപയിലുമാണ് വ്യാപാരം നടക്കുന്നത്. ആഗോള വിപണിയിൽ സ്വർണം ഔൺസിന് 4,495 ഡോളർ നിലവാരത്തിലാണ് വ്യാപാരം പുരോഗമിക്കുന്നത്. അമേരിക്കൻ ട്രഷറി വകുപ്പിന്റെ ഇടപെടലിനെത്തുടർന്ന് അമേരിക്കൻ ഡോളർ ദുർബലമായതും ബോണ്ട് വിപണികൾക്ക് ആശ്വാസമായതുമാണ് ജൂൺ മാസത്തിനു ശേഷമുള്ള ഏറ്റവും ഉയർന്ന നിരക്കിലേക്ക് സ്വർണവില എത്തിച്ചത്.

ഇന്നത്തെ വിപണി വിലയനുസരിച്ച് 3 ശതമാനം ജി.എസ്.ടി. കൂടി ചേർത്താൽ എട്ട് ഗ്രാം സ്വർണം വാങ്ങാൻ മാത്രം 1,20,304 രൂപ വരും. ഇതിനുപുറമേ ജ്വല്ലറികൾ ഈടാക്കുന്ന പണിക്കൂലിയും നൽകേണ്ടതുണ്ട്. പത്ത് ശതമാനം പണിക്കൂലി കണക്കാക്കുകയാണെങ്കിൽ 11,680 രൂപയും, അതിന്മേൽ വരുന്ന ജി.എസ്.ടിയും ഉൾപ്പെടെ എട്ട് ഗ്രാം ആഭരണത്തിന് ഏകദേശം 1,32,334 രൂപയോളം ചെലവ് വരുമെന്നാണ് കണക്കാക്കുന്നത്.

Also Read:അമേരിക്കയേക്കാൾ പത്തിരട്ടി കുറവ്! ലോകത്ത് ഏറ്റവും കൂടുതൽ ഊർജം ഉപയോഗിക്കുന്ന രാജ്യങ്ങൾ ഏതൊക്കെ?

അതേസമയം, ആഗോള വിപണിയിലെ ക്രൂഡ് ഓയിൽ വിലയിലുള്ള ചാഞ്ചാട്ടവും സ്വർണവിലയെ സ്വാധീനിക്കുന്നുണ്ട്. ചൈന, യു.എസ്. തുടങ്ങിയ പ്രധാന രാജ്യങ്ങളിലെ സാമ്പത്തിക വളർച്ചയും വ്യാവസായിക ഡിമാൻഡിലെ മാറ്റങ്ങളും ഒപെക് പ്ലസ് രാജ്യങ്ങളുടെ ഉൽപാദന നയങ്ങളുമാണ് നിലവിൽ ആഗോള വിപണിയെ നിയന്ത്രിക്കുന്ന മറ്റ് പ്രധാന ഘടകങ്ങൾ.

The post റെക്കോർഡുകൾ ഭേദിച്ച് സ്വർണവില കുതിക്കുന്നു; വില 1,16,800 രൂപയിലെത്തി appeared first on Express Kerala.