‘ജീവിതത്തിൽ തോൽക്കാത്ത ആ കുടുംബത്തെ ചേർത്തുപിടിച്ചു’; കൊച്ചിൻ ഹനീഫയുടെ കുടുംബത്തെ സന്ദർശിച്ച് കാർത്തിക | Karthika Cochin Haneefa family visit

കൊച്ചി: മലയാളികളുടെ പ്രിയതാരം കൊച്ചിൻ ഹനീഫയുടെ കുടുംബത്തെ സന്ദർശിച്ച് നടി കാർത്തിക. ഭർത്താവ് ഡോ. സുനിലിനൊപ്പമാണ് കാർത്തിക കൊച്ചിൻ ഹനീഫയുടെ ഭാര്യയും മക്കളും ചേർന്ന് നിർമിച്ച പുതിയ വീടായ ഹനീഫാസ് എ.ബി. മൻസിലിൽ എത്തിയത്. ഒരു മണിക്കൂറോളം കുടുംബത്തോടൊപ്പം ചെലവഴിച്ച ശേഷമാണ് താരം മടങ്ങിയത്. (Karthika Cochin Haneefa family visit)

കൊച്ചിൻ ഹനീഫയുടെ ഭാര്യാ സഹോദരൻ ഫിറോസാണ് കാർത്തികയുടെ സന്ദർശനത്തിന്റെ ദൃശ്യങ്ങൾ സമൂഹമാധ്യമങ്ങളിൽ പങ്കുവെച്ചത്. വീടിനുള്ളിൽ സന്തോഷത്തോടെ ചുറ്റിനടക്കുന്ന കാർത്തികയെയും കൊച്ചിൻ ഹനീഫയുടെ മക്കളെ ചേർത്തുപിടിക്കുന്നതിന്റെയും ദൃശ്യങ്ങൾ വീഡിയോയിലുണ്ട്. “1985 മുതൽ നാല് വർഷം മാത്രം സിനിമയിൽ അഭിനയിച്ചു. അഭിനയിച്ച സിനിമകളെല്ലാം സൂപ്പർ ഡൂപ്പർ ഹിറ്റുകൾ. പിന്നീട് അങ്ങോട്ട് നാൽപത് വർഷം നമ്മൾ അവരെ സ്നേഹിക്കുകയും ബഹുമാനിക്കുകയും ചെയ്തു” എന്ന കുറിപ്പോടെയാണ് ഫിറോസ് വീഡിയോ പങ്കുവെച്ചത്. വർഷങ്ങളായി സിനിമയിൽ നിന്ന് അകന്നുനിന്നിട്ടും കാർത്തികയോടുള്ള മലയാളികളുടെ സ്നേഹവും ബഹുമാനവും തുടരുകയാണെന്നും അദ്ദേഹം കുറിച്ചു.

കാർത്തികയുടെ സന്ദർശനം കുടുംബത്തിന് വലിയ സന്തോഷവും പോസിറ്റീവ് ഊർജവും നൽകിയെന്നും ഫിറോസ് പറഞ്ഞു. “ജീവിതത്തിൽ ഒരിക്കലും തോറ്റുപോകാത്ത ആ കുടുംബത്തെ ചേർത്തുപിടിച്ച്, അവർക്ക് പരമാവധി മോട്ടിവേഷനും സ്നേഹവും നൽകി” എന്നാണ് അദ്ദേഹം കുറിച്ചത്. കുടുംബാംഗങ്ങൾക്കൊപ്പമുള്ള കാർത്തികയുടെ സന്തോഷനിമിഷങ്ങളും വീഡിയോയിൽ കാണാം. കൊച്ചിൻ ഹനീഫയുടെ അടുത്ത സുഹൃത്തുക്കളിൽ ഒരാളായിരുന്നു കാർത്തിക. ഹനീഫയുടെ മരണത്തിന് ശേഷവും അദ്ദേഹത്തിന്റെ കുടുംബവുമായി താരം അടുത്ത ബന്ധം നിലനിർത്തിയിരുന്നു. വർഷങ്ങൾക്കുശേഷമുള്ള ഈ സന്ദർശനം പഴയ സൗഹൃദത്തിന്റെയും കുടുംബബന്ധത്തിന്റെയും ഓർമകൾ പുതുക്കുന്നതായി മാറി.

Summary: Actress Karthika visited the family of late Malayalam actor Cochin Haneefa along with her husband Dr Sunil. She spent around an hour with the family at their new home, Hanifas AB Manzil, with photos and videos of the warm visit gaining attention on social media.