അപൂർവ്വതകൾ തേടി പൂർവ്വ വിദ്യാർഥിയുടെ പുരയിടത്തിൽ സെന്റ് തോമസിലെ പഠിതാക്കൾ

തൃശൂർ : പാഠപുസ്തകങ്ങൾക്കപ്പുറം പ്രകൃതിയെ നേരിട്ടറിയാനും നാട്ടറിവുകളുടെയും പരിസ്ഥിതി സംരക്ഷണത്തിന്റെയും പ്രായോഗിക മാതൃകകൾ മനസ്സിലാക്കാനും സെന്റ് തോമസ് കോളേജിലെ വിദ്യാർഥികൾ പൂർവ്വ വിദ്യാർത്ഥിയും പരിസ്ഥിതി പ്രവർത്തകനുമായ വി.കെ. ശ്രീധരന്റെ പുരയിടത്തിലേക്ക് പഠനയാത്ര നടത്തി.

മാള അണ്ണല്ലൂർ ആനപ്പാറയിൽ ഒരേക്കറിൽ വ്യാപിക്കുന്ന ഈ പുരയിടം ദേശീയ അംഗീകാരം നേടിയിട്ടുണ്ട്.

പ്രകൃതിയോടിണങ്ങിയ കൃഷിരീതികളും നാടൻ സസ്യജാലങ്ങളും പക്ഷികളും ശലഭങ്ങളും ഔഷധസസ്യങ്ങളും സംരക്ഷിച്ചുകൊണ്ടുള്ള ഈ ഇടം, ഒരു പുരയിടം എങ്ങനെ ജൈവവൈവിധ്യത്തിന്റെ ചെറിയൊരു ആവാസവ്യവസ്ഥയായി മാറ്റാം എന്നതിന്റെ മികച്ച ഉദാഹരണമാണ്.

ചീവീടുകളുടെ ശബ്ദത്തിനുമീതെ കിളിയൊച്ചകൾ നിറയുന്ന ശാന്തമായ അന്തരീക്ഷത്തിൽ ശലഭങ്ങൾ പാറിപ്പറക്കുന്നത് ഇവിടെ പതിവ് കാഴ്ചയാണ്. തൊണ്ടിപ്പഴം, ഓടപ്പഴം, പൂച്ചപ്പഴം, ചകിരിപ്പഴം, മുട്ടിപ്പഴം, വെട്ടിപ്പഴം തുടങ്ങി ഇന്ന് അപൂർവ്വമായ നിരവധി നാടൻ ഫലവൃക്ഷങ്ങളുടെയും സസ്യങ്ങളുടെയും തൈകൾ ഇവിടെ സമൃദ്ധമായി വളർത്തിയിട്ടുണ്ട്.

വൻമരങ്ങളുടെ തണലും കുളിർകാറ്റും വിവിധ ജീവികളുടെ ആവാസ വ്യവസ്ഥയും ചേർന്ന് ഒരു ചെറുകാടിന്റെ അനുഭവമാണ് ഈ ഭൂതലം സന്ദർശകർക്ക് നൽകുന്നത്. ശുദ്ധവായുവും ജൈവവൈവിധ്യവും മണ്ണ്- ജല സംരക്ഷണവും ഒരുമിച്ച് സാധ്യമാക്കുന്ന ഈ കൃഷിയിടം പ്രകൃതിയോട് ഇണങ്ങി ജീവിക്കാമെന്നതിന്റെ മനോഹരമായ മാതൃക കൂടിയാണ്.

പഞ്ചായത്ത് സെക്രട്ടറിയായി വിരമിച്ച ശ്രീധരന് പരിസ്ഥിതി സംരക്ഷണ പ്രവർത്തനങ്ങൾക്ക് വനമിത്ര, ഭൂമിമിത്ര അവാർഡുകൾ ഉൾപ്പെടെയുള്ള അംഗീകാരങ്ങൾ ലഭിച്ചിട്ടുണ്ട്.

അദ്ദേഹത്തോടൊപ്പം വാട്ടർ അതോറിറ്റിയിൽ നിന്ന് അസിസ്റ്റന്റ് എഞ്ചിനീയറായി വിരമിച്ച ഭാര്യ രമണിയും മകൻ ധനുസ്സും ഈ ഹരിത ഉദ്യമത്തിന്റെ പരിപാലനത്തിൽ സജീവരാണ്.

നിർമ്മിതബുദ്ധിയിൽ ബിരുദാനന്തര ബിരുദം നേടിയ ധനുസ്സിന് പക്ഷിനിരീക്ഷണത്തിലും നഴ്സറി പരിപാലനത്തിലും പ്രത്യേക താൽപര്യമുണ്ട്. കുടുംബത്തിന്റെ കൂട്ടായ പരിശ്രമത്തിലൂടെയാണ് അപൂർവ്വ സസ്യങ്ങളടക്കം ഇവിടെ സംരക്ഷിച്ചുവരുന്നത്.

വിദ്യാർത്ഥികൾക്ക് ഇതൊരു അസാധാരണ സന്ദർശനമായിരുന്നു. പ്രകൃതിയെ കാണുക, നാട്ടറിവുകൾ മനസ്സിലാക്കുക, ജൈവവൈവിധ്യത്തെ തിരിച്ചറിയുക, പരിസ്ഥിതി സംരക്ഷണം ജീവിതത്തിന്റെ ഭാഗമാക്കുക എന്നീ ലക്ഷ്യത്തോടെയുള്ള അനുഭവാധിഷ്ഠിത പഠനമായിരുന്നു. ഓരോ സസ്യത്തിന്റെയും പ്രത്യേകതകളും പക്ഷികളുടെയും ശലഭങ്ങളുടെയും സാന്നിധ്യവും നാടൻ സസ്യങ്ങളുടെ സംരക്ഷണവും ജൈവകൃഷിരീതികളും വിദ്യാർത്ഥികൾ അനുഭവിച്ചറിഞ്ഞു.

ജന്തുശാസ്ത്ര വിഭാഗവും ജൈവ വൈവിധ്യ ക്ലബ്ബും സംയുക്തമായാണ് പരിപാടി സംഘടിപ്പിച്ചത്. വകുപ്പു മേധാവി ഡോ. വിമല കെ. ജോൺ, ബയോഡൈവേഴ്സിറ്റി ക്ലബ്ബ് കോർഡിനേറ്റർമാരായ ഡോ. ഷോൺ പോൾ, ഡോ. ഷീബ റാഫേൽ, ഡോ. പ്രിയദ, കെൽവിൻ എന്നിവർ നേതൃത്വം
നൽകി.