ഇറാനെ പേടിപ്പിക്കൽ, വിവാദം, വിഷാദം..! 250 ദിവസത്തെ സേവനത്തിന് വിരാമം; അറേബ്യൻ കടലിൽ പുതിയ കരുത്തായി ‘യുഎസ്എസ് ജോർജ് വാഷിംഗ്ടൺ’

പശ്ചിമേഷ്യൻ മേഖലയിൽ സൈനിക ചുമതലകൾ ഏറ്റെടുക്കാനായി അമേരിക്കൻ വിമാനവാഹിനിക്കപ്പലായ ‘യുഎസ്എസ് ജോർജ് വാഷിംഗ്ടൺ’ അറേബ്യൻ കടലിൽ പ്രവേശിച്ചു. തുടർച്ചയായി 250 ദിവസത്തിലധികം ഈ മേഖലയിൽ സേവനം അനുഷ്ഠിച്ച ‘യുഎസ്എസ് അബ്രഹാം ലിങ്കൻ’ കപ്പലിന് പകരമായാണ് ജോർജ് വാഷിംഗ്ടൺ ചുമതലയേൽക്കുന്നത്. ദക്ഷിണ ചൈനാ കടലിലെ പ്രവർത്തനങ്ങൾക്കും വിയറ്റ്നാമിലെ ഡാ നാംഗ് തുറമുഖ സന്ദർശനത്തിനും ശേഷമാണ് ഈ വിമാനവാഹിനിക്കപ്പൽ സെൻട്രൽ കമാൻഡ് (CENTCOM) മേഖലയിലേക്ക് എത്തിയിരിക്കുന്നത്. 1990-കളിലും 2000-കളുടെ തുടക്കത്തിലും ഇറാഖ് അധിനിവേശം, അഫ്ഗാൻ യുദ്ധം തുടങ്ങിയ നിർണ്ണായക ഘട്ടങ്ങളിലും ഈ കപ്പൽ സമാനമായ രീതിയിൽ പശ്ചിമേഷ്യയിൽ സജീവമായി പ്രവർത്തിച്ചിട്ടുണ്ട്.

അതേസമയം, കപ്പലിന്റെ ദീർഘകാലമായുള്ള വിന്യാസം ക്രൂ അംഗങ്ങളുടെ കുടുംബങ്ങൾക്കിടയിലും നാവികർക്കിടയിലും വലിയ പ്രതിഷേധങ്ങൾക്ക് കാരണമായിരുന്നു. തുടർച്ചയായ കാലാവധി നീട്ടലുകൾ കാരണം കപ്പലിലെ ഒരു നാവികൻ അടുത്തിടെ ലൈഫ് വെസ്റ്റുമായി കടലിലേക്ക് ചാടുകയും പിന്നീട് സുരക്ഷിതമായി രക്ഷപ്പെടുത്തുകയും ചെയ്തിരുന്നു. ക്രൂ അംഗങ്ങളുടെ കുടുംബങ്ങളും നിയമനിർമ്മാതാക്കളും ഉന്നയിച്ച പരാതികളെത്തുടർന്ന് കപ്പലിലെ മോശം സാഹചര്യങ്ങൾ വലിയ ചർച്ചയായിരുന്നു. കുടിവെള്ള ലഭ്യതയിലെ കുറവ്, കേടായ ടോയിലറ്റുകൾ, ഭക്ഷണ ലഭ്യതയിലെ ബുദ്ധിമുട്ടുകൾ എന്നിവയ്ക്കൊപ്പം ബഹ്റൈനിലെ യുഎസ് നാവിക ലോജിസ്റ്റിക്സ് ബേസിലുണ്ടായ ആക്രമണത്തെ തുടർന്ന് അടിസ്ഥാന സാധനങ്ങൾ ശേഖരിക്കാൻ കപ്പലിന് അഞ്ച് ദിവസത്തോളം വഴിതിരിച്ചുവിടേണ്ടി വരികയും ചെയ്തിരുന്നു.

ALSO READ;പ്രതിപട്ടികയിൽ റഷ്യയും അമേരിക്കയും..! കടലിൽ തള്ളിയത് 2 ലക്ഷത്തിലധികം ആണവ മാലിന്യ ബാരലുകൾ

ഈ പ്രതിസന്ധികൾക്കെല്ലാം ഒടുവിലാണ് യുഎസ്എസ് അബ്രഹാം ലിങ്കനെ പിൻവലിച്ച് ജോർജ് വാഷിംഗ്ടൺ കപ്പലിനെ പുതിയ ചുമതലകൾക്കായി മേഖലയിലേക്ക് നിയോഗിച്ചിരിക്കുന്നത്. അന്താരാഷ്ട്ര തലത്തിൽ ഏറെ ശ്രദ്ധിക്കപ്പെടുന്ന ഈ സൈനിക മാറ്റം മേഖലയിലെ സുരക്ഷാ സജ്ജീകരണങ്ങളിൽ പുതിയ വഴിത്തിരിവായി മാറിയിരിക്കുകയാണ്.

The post ഇറാനെ പേടിപ്പിക്കൽ, വിവാദം, വിഷാദം..! 250 ദിവസത്തെ സേവനത്തിന് വിരാമം; അറേബ്യൻ കടലിൽ പുതിയ കരുത്തായി ‘യുഎസ്എസ് ജോർജ് വാഷിംഗ്ടൺ’ appeared first on Express Kerala.