ഇറാനെതിരായ കൂടുതൽ യുഎസ് ഉപരോധങ്ങളെ പിന്തുണയ്ക്കില്ല; നിലപാട് വ്യക്തമാക്കി ചൈന | China Iran sanctions

ബെയ്ജിങ്: ഇറാനെതിരെ കൂടുതൽ സാമ്പത്തിക ഉപരോധങ്ങൾ ഏർപ്പെടുത്താനുള്ള അമേരിക്കൻ നീക്കത്തെ പിന്തുണയ്ക്കില്ലെന്ന് ചൈന ( China Iran sanctions). ഉപരോധങ്ങളും സാമ്പത്തിക സമ്മർദങ്ങളും പ്രശ്നപരിഹാരത്തിന് സഹായിക്കില്ലെന്നും മറിച്ച് സംഘർഷം കൂടുതൽ രൂക്ഷമാക്കുമെന്നും ചൈനീസ് വിദേശകാര്യ മന്ത്രാലയം വ്യക്തമാക്കി. ‘ഉപരോധങ്ങളും സമ്മർദങ്ങളും ഒരിക്കലും പരിഹാരമല്ല’ എന്ന നിലപാടാണ് ചൈനീസ് വിദേശകാര്യ മന്ത്രി ലിൻ ജിയാൻ മാധ്യമങ്ങളോട് വ്യക്തമാക്കിയത്. ഇറാനെതിരായ സാമ്പത്തിക നടപടികളിലൂടെ നിലവിലെ സംഘർഷാവസ്ഥ കൂടുതൽ വഷളാകുമെന്ന ആശങ്കയും ചൈന പ്രകടിപ്പിച്ചു.

അതേസമയം, അമേരിക്കയുടെ സാമ്പത്തിക ഉപരോധങ്ങളെ ഇറാൻ ശക്തമായി എതിർത്തു. ഇറാനെ സാമ്പത്തികമായി തകർക്കുമെന്ന അമേരിക്കയുടെ പ്രഖ്യാപനത്തെ ‘സാമ്പത്തിക ഭീകരവാദം’ എന്നാണ് ഇറാൻ വിശേഷിപ്പിച്ചത്. യുദ്ധം അവസാനിപ്പിക്കാനുള്ള സമയമായെന്നും നിലവിലെ സാഹചര്യത്തിൽ ഇറാൻ ശക്തമായി നിലകൊള്ളുന്നതിനാൽ സംഘർഷം അവസാനിപ്പിക്കുന്നതാണ് ഉചിതമെന്നും പ്രസിഡന്റ് മസൂദ് പെസഷ്‌കിയാൻ പറഞ്ഞു. അമേരിക്കൻ ഭീഷണികൾക്ക് ഇറാൻ വഴങ്ങില്ലെന്നും അദ്ദേഹം വ്യക്തമാക്കി. അമേരിക്കയുടെ പുതിയ ഉപരോധങ്ങളെ നേരിടാൻ രാജ്യത്തോട് തയാറെടുക്കണമെന്ന് ഇറാൻ പാർലമെന്റ് സ്പീക്കർ മുഹമ്മദ് ബഗേർ ഗാലിബഫ് ആവശ്യപ്പെട്ടു. ഉപരോധങ്ങൾ ആഗോള സമ്പദ്‌വ്യവസ്ഥയ്ക്ക് ഭീഷണിയാണെന്ന് വിദേശകാര്യ മന്ത്രി അബ്ബാസ് അരഗ്ചിയും പ്രതികരിച്ചു. സാമ്പത്തിക യുദ്ധത്തിൽ അമേരിക്ക പരാജയപ്പെടുമെന്നും ഉപരോധ ഭീഷണി നിയമവിരുദ്ധവും മനുഷ്യത്വരഹിതവുമാണെന്നും അദ്ദേഹം ആരോപിച്ചു.

അതേസമയം, ഹോർമുസ് കടലിടുക്കിന്റെ നിയന്ത്രണവുമായി ബന്ധപ്പെട്ട വിഷയത്തിൽ ഇറാനും ഒമാനും ചർച്ച തുടരാൻ തീരുമാനിച്ചു. ഇരുരാജ്യങ്ങളുടെയും വിദേശകാര്യ മന്ത്രിമാർ വിഷയത്തിൽ ഫോൺ സംഭാഷണം നടത്തിയതായാണ് വിവരം. അമേരിക്കയുടെ സമ്മർദം ശക്തമാകുന്നതിനിടെ ഇറാനെ പിന്തുണയ്ക്കുന്ന ചൈനയുടെ നിലപാട് മേഖലയിൽ പുതിയ നയതന്ത്ര ചർച്ചകൾക്ക് വഴിയൊരുക്കുമോയെന്നാണ് ഉറ്റുനോക്കുന്നത്.

Summary: China has opposed further US economic sanctions on Iran, warning that sanctions and economic pressure will only escalate tensions. Iran has also rejected the US pressure, while continuing diplomatic discussions with Oman over the Strait of Hormuz.